വ്യത്യസ്തമായ പ്രണയവും വിവാഹവുമൊക്കെ എപ്പോഴും വാർത്തകളിൽ നിറയാറുണ്ട്. യുവാവ് സെക്സ് ഡോളിനെ വിവാഹം ചെയ്തതും പിന്നീട് വിവാഹമോചനം നേടിയതുമൊക്കെ ഈയടുത്ത് വൈറൽ വർത്തയായതായിരുന്നു.

ഇപ്പോഴിതാ 93 വർഷം പഴക്കമുള്ള വിളക്കുമായി വിവാഹത്തിന് തയ്യാറായി നിൽക്കുകയാണ് ഒരു യുവതി. അമാന്‍ഡ് ലിബര്‍ട്ടി എന്ന യുവതിയാണ് ഇവരുടെ മനം കവർന്ന ഒരു ചാന്‍ഡലിയര്‍ (വലിയ തൂക്കുവിളക്ക്)മായി രംഗത്ത് എത്തിയിരിക്കുന്നത്.

'ലൂമിനിയര്‍'എന്ന് പേരുള്ള ആ വിളക്കിനെ വിവാഹം ചെയ്യാനുള്ള ആഗ്രഹം ഒരു ടെലിവിഷന്‍ ഷോയിലാണ് യുവതി വെളിപ്പെടുത്തിയത്. തന്‍റെ ഒബ്ജക്ടോഫീലിയയെക്കുറിച്ചും നിര്‍ജ്ജീവ വസ്തുക്കളോട് തോന്നുന്ന ആകര്‍ഷണത്തെക്കുറിച്ചും ഈ ലൈവ് ഷോയ്ക്കിടെ യുവതി വ്യക്തമാക്കിയിരിക്കുന്നു.

'അതൊരു വസ്തു മാത്രമല്ല. നിങ്ങള്‍ക്ക് അറിയാന്‍ കഴിയുന്ന ഒരു ഊര്‍ജ്ജം അതിനുണ്ട്. അങ്ങനെയാണ് എനിക്ക് തോന്നുന്നത്. പ്രണയത്തിലായ നിമിഷമല്ല.. കാലക്രമേണ സംഭവിച്ച ഒന്നാണ്' എന്നായിരുന്നു അമാന്‍ഡയുടെ വാക്കുകള്‍. ആദ്യം ഒരു ഡ്രം കിറ്റുമായി പ്രണയത്തിലായിരുന്നു എന്നാല്‍ ലൂമിനിയറിനെ കണ്ടതോടെ ആദ്യനോട്ടത്തില്‍ തന്നെ പ്രണയം ഉണ്ടായി എന്നു യുവതി പറഞ്ഞു.

'സത്യസന്ധമായി പറയുകയാണെങ്കില്‍ എന്താണ് സംഭവിക്കുന്നതെന്ന് വളരെക്കാലത്തോളം എനിക്ക് മനസ്സിലായിരുന്നില്ല എങ്കില്‍പ്പോലും അതുപോലെ തന്നെ അംഗീകരിച്ചു.

എന്തിനാണ് വസ്തുക്കളുമായി പ്രണയത്തിലാകുന്നത് എന്ന് എനിക്കറിയില്ല, ഇപ്പോള്‍ പോലും വിശദീകരിക്കാന്‍ ബുദ്ധിമുട്ടാണ്. എനിക്ക് 'ചാന്‍ഡിലിയറുകള്‍' വളരെ ഇഷ്ടമാണ്. വിശദീകരിക്കാന്‍ കഴിയാത്ത അതിശയകരമായ ഒരു ബന്ധം അതുമായുണ്ടാകുന്നു'. അമാന്‍ഡ വെളിപ്പെടുത്തി.

ഇത്തരത്തില്‍ വസ്തുക്കളോട് പ്രണയം തോന്നി സ്വന്തം ബ്ലാങ്കറ്റിനെയും ബ്രീഫ് കേസിനെയും വരെ ആളുകള്‍ വിവാഹം ചെയ്തുവെന്ന റിപ്പോര്‍ട്ടുകളും നേരത്തെയും വന്നിട്ടുണ്ട്.

2019 ലാണ് ഏറെക്കാലമായി പ്രണയത്തിലുള്ള തന്‍റെ ബ്ലാങ്കറ്റിനെ വിവാഹം ചെയ്യാനുള്ള ആഗ്രഹം വെളിപ്പെടുത്തി ഒരു യുവതി രംഗത്തു വന്നത്. ഇക്കഴിഞ്ഞ ഡിസംബറിലാണ് ബ്രീഫ് കേസുമായി വിവാഹം നടന്നു എന്ന അവകാശവാദം ഉന്നയിച്ച്‌ മറ്റൊരു യുവതിയും രംഗത്തു വന്നത്.

ഈ അവസ്ഥയെക്കുറിച്ച് ആദ്യം കേള്‍ക്കുമ്പോള്‍ അതിശയപ്പെടുമെങ്കിലും ഒബ്ജക്ടോഫീലിയ (Objectophilia) എന്ന അവസ്ഥയാണിത്. നിര്‍ജ്ജീവ വസ്തുക്കളോട് തോന്നുന്ന പ്രണയം അല്ലെങ്കില്‍ ലൈംഗിക ആകര്‍ഷണമാണ് ഒബ്ജക്ടോഫീലിയ. ഈ അവസ്ഥയുള്ളവര്‍ക്ക് ജീവനില്ലാത്ത ചില വസ്തുക്കളോട് കടുത്ത പ്രണയവും ആകര്‍ഷണവുമൊക്കെ തോന്നാനുള്ള സാധ്യതയുണ്ട്.