സംസ്ഥാനങ്ങള്‍ക്ക് നല്‍കിയ കൊവിഡ് വാക്‌സിന്‍ ഉപയോഗിക്കുന്നതില്‍ രാജ്യത്തിനാകെ മാതൃകയായി മാറിയിരിക്കുകയാണ് കേരളം. ഇതുവരെ വാക്‌സിന്‍ ഒട്ടും ഉപയോഗശൂന്യമാകാതെ ഉപയോഗിച്ച സംസ്ഥാനം കേരളമാണ് എന്നാണ് റിപ്പോർട്ട്. എന്നാല്‍ സംസ്ഥാനങ്ങള്‍ക്ക് നല്‍കിയ വാക്‌സിനില്‍ 23 ശതമാനവും ഉപയോഗശൂന്യമായതായാണ് വിവരാവകാശ രേഖ. ഏപ്രില്‍ 11 വരെയുളള കണക്കാണ് കാണിക്കുന്നത്.

എന്നാൽ ലഭ്യമാകുന്ന കണക്ക് അനുസരിച്ച് തമിഴ്‌നാട്ടിലാണ് ഏറ്റവും കൂടുതല്‍ വാക്‌സിന്‍ ഉപയോഗശൂന്യമായത്. തമിഴ്‌നാട് ഉപയോഗശൂന്യമാക്കിയത് 12.10 ശതമാനമാണ്. ഹരിയാന (9.74%), പഞ്ചാബ് (8.12%), മണിപ്പൂര്‍ (7.8%), തെലങ്കാന (7.55%) എന്നീ സംസ്ഥാനങ്ങളാണ് വാക്‌സിന്‍ ഉപയോഗശൂന്യമാക്കിയതില്‍ മുന്നിലുളളത്. ഏറ്റവും കാര്യക്ഷമമായി ഉപയോഗിച്ച സംസ്ഥാനങ്ങളില്‍ കേരളം കഴിഞ്ഞാല്‍ തൊട്ടുപിന്നിലുളളത് പശ്ചിമ ബംഗാള്‍, ഹിമാചല്‍ പ്രദേശ്, മിസോറം, ഗോവ, ദാമന്‍ ദ്യൂ, ആന്‍ഡമാന്‍-നിക്കോബാര്‍, ലക്ഷദ്വീപ് എന്നിവയാണ്.

അതേസമയം വാക്‌സിന്റെ ഒരു വയലില്‍ 10 ഡോസാണ് ഉളളത്. തുറന്നു കഴിഞ്ഞാല്‍ നാല് മണിക്കൂറിനുളളില്‍ പത്ത് ഡോസും ഉപയോഗിക്കണം എന്നതാണ്. ബാക്കിവന്നാല്‍ അത് ഉപയോഗശൂന്യമാകും. ഇത്തരത്തില്‍ വിവിധ സംസ്ഥാനങ്ങളിലായി ഉപയോഗശൂന്യമായതാണ് 23 ശതമാനം. ഏപ്രില്‍ 11 വരെ വിതരണം ചെയ്‌ത 10.34 കോടി ഡോസ് വാക്‌സിനുകളില്‍ 44.78 ലക്ഷം ഡോസുകള്‍ ഉപയോഗശൂന്യമായി.

രാജ്യത്ത് ഇതുവരെ വിതരണം ചെയ്‌ത വാക്സിന്‍ ഡോസുകളുടെ ആകെ എണ്ണം 12.71 കോടി കടന്നു. ഇന്ന് രാവിലെ ഏഴ് മണി വരെയുളള കണക്കുപ്രകാരം 18,83,241 സെഷനുകളിലായി 12,71,29,113 വാക്‌സിന്‍ ഡോസ് വിതരണം ചെയ്‌തിട്ടുണ്ട്. ഇന്നലെ 32,76,555 ഡോസ് വാക്‌സിനാണ് ആകെ വിതരണം ചെയ്‌തത്.