ഇനിയൊരിക്കലും അമ്മ വരില്ലെന്നറിയാതെ ആദ്യ കുര്‍ബാനയ്ക്കായി ഇസ്രായേലില്‍ നിന്ന് അമ്മ കൊടുത്തു വിട്ട സമ്മാനങ്ങളുമായി അഡോണ്‍ നടക്കുന്ന കാഴ്ച ഏവരേയും കണ്ണീരിലാഴ്ത്തി. ഇനിയൊരിക്കലും അമ്മ വരില്ലെന്ന് ഒന്‍പത് വയസുകാരന്‍ ഇതുവരെ തിരിച്ചറിഞ്ഞിട്ടില്ല.

ആശ്വസിപ്പിക്കാന്‍ അടുത്ത് കൂടുന്നവരെയൊക്കെ അമ്മ അയച്ചു കൊടുത്ത സമ്മാനങ്ങള്‍ അവന്‍ കാണിച്ചു കൊടുക്കുന്നുണ്ട്. ഒക്ടോബറിലായിരുന്നു വീട്ടുകാര്‍ സ്‌നേഹത്തോടെ മത്തായിയെന്ന് വിളിക്കുന്ന അഡോണിന്റെ ഒന്‍പതാം പിറന്നാള്‍.

സൗമ്യ കൂടി നാട്ടിലെത്തിയ ശേഷം ആദ്യകുര്‍ബാന വലിയ ചടങ്ങായി നടത്താനിരിക്കുകയായിരുന്നു കുടുംബം. സൗമ്യയുടെ അമ്മ സാവിത്രി കരയുന്നത് അവന്‍ ശ്രദ്ധിച്ചു. 'മമ്മി എന്തിനാ എപ്പോഴും ഇങ്ങനെ കരയുന്നത്' എന്ന് അവന്‍ ഇടയ്ക്കിടെ ചോദിക്കുന്നുണ്ട്. അതു കേള്‍ക്കുമ്പോള്‍ അടുത്തു നില്‍ക്കുന്നവര്‍ക്കും ദുഃഖം താങ്ങാനാകുന്നില്ല.

ഹമാസിന്റെ ആക്രമണത്തില്‍ കൊല്ലപ്പെട്ട സൗമ്യയുടെ മൃതദേഹം ഇന്ത്യയിലെത്തിച്ചു. രാത്രിയോടെ ഇടുക്കി കീരിത്തോടിലെ വീട്ടിലെത്തിക്കും. കോവിഡ് ചട്ടങ്ങള്‍ പാലിച്ചാവും സംസ്‌കാരചടങ്ങുകള്‍ നടക്കുക.