കേരളത്തിൽ തിരഞ്ഞടുപ്പ് മത്സരം NDA യും ഇൻഡി സഖ്യവും തമ്മിൽ എന്ന രീതിയിലേക്ക് മാറുന്നു; ബിജെപി ഭരണ സമിതി മാറേണ്ടത് സിപി എമ്മിൻ്റെ ആവശ്യമായി മാത്രം മാറിയിരിക്കുന്നു; ആരോപണവുമായി ബിജെപി സിറ്റി ജില്ലാ അദ്ധ്യക്ഷൻ കരമന ജയൻ

കമ്മ്യുണിസ്റ്റും കോൺഗ്രസ്സും തിരുവനന്തപുരം നഗരസഭയിൽ ഒന്നിച്ച് നീങ്ങുന്നത് കേരളത്തിലും ത്രികോണ മത്സരം അവസാനിക്കുന്നതിൻ്റെ ലക്ഷണമാണന്നും, ഇനി കേരളത്തിൽ തിരഞ്ഞടുപ്പ് മത്സരം NDA യും ഇൻഡി സഖ്യവും തമ്മിൽ എന്ന രീതിയിലേക്ക് മാറുന്നു എന്നും ബിജെപി സിറ്റി ജില്ലാ അദ്ധ്യക്ഷൻ കരമന ജയൻ.

തിരുവനന്തപുരം നഗരസഭയിൽ അവിശ്വാസ പ്രമേയം അവതരിപ്പിക്കാൻ കുറഞ്ഞത് ഒരു കക്ഷിക്ക് മുപ്പത്തി നാല് അംഗങ്ങളുടെ പിന്തുണ വേണം എന്നിരിക്കെ, അത്രയും അംഗങ്ങൾ ഇല്ലാത്ത കോൺഗ്രസ് അവിശ്വാസ പ്രമേയം അവതരണവുമായി മുന്നോട്ട് പോകുന്നത് ഇതിൻ്റെ തെളിവാണന്നും കരമന ജയൻ പറഞ്ഞു.

തിരുവനന്തപുരം നഗരസഭയിലെ ബിജെപി ഭരണ സമിതി കഴിഞ്ഞ ആറ് മാസമായി അഴിമതിക്ക് എതിരെയും, കൈയ്യേറ്റങ്ങൾക്ക് എതിരെയും സ്വീകരിച്ചു വരുന്ന ശക്തമായ നിലപാടുകൾ പതിറ്റാണ്ടുകളായി മാറി മാറി അഡ്ജസ്റ്റ്മെൻ്റ് ഭരണം നടത്തുന്ന ഇരു കൂട്ടരിലും പരിഭ്രാന്തി സൃഷ്‌ടിച്ചിരിക്കുകയാണന്നും, തിരുവനന്തപുരം നഗരസഭയിൽ ബിജെപി വിഭാവനം ചെയ്യുന്ന വികസിത തിരുവനതപുരത്തിന് വേണ്ടിയുള്ള ഭരണം തുടരുമെന്നും, ജന ഹിതം അട്ടിമറിക്കാൻ കോൺഗ്രസ്സും കമ്മ്യുണിസ്റ്റും നടത്തുന്ന ശ്രമങ്ങൾ വില പോവിലെന്നു കരമന ജയൻ പറഞ്ഞു.

CPM ഭരണകാലത്തെ പാളയം മാർക്കറ്റ് കൈയ്യേറ്റം, കുറവൻകോണം പാർക്ക് കൈയ്യേറ്റം, വിഴിഞ്ഞം ഫ്‌ളാറ്റ് നിർമ്മാണ അഴിമതി, സ്‌കൂൾ കെട്ടിട നിർമ്മാണ അഴിമതി, നഗരസഭ നടത്തുന്ന ലേലങ്ങളിലെ അഴിമതി, ഭരണ കാര്യങ്ങളിലെ കെടുകാര്യസ്ഥത തുടങ്ങിയവ ഇതിനകം തന്നെ ബിജെപി ഭരണ സമിതി പുറത്ത് കൊണ്ട് വന്നത് CPM നേതൃത്വത്തെയും തിരുവനന്തപുരത്തെ ചില നേതാക്കളെയും അങ്കലാപ്പിലാക്കിയിരിക്കുകയാണന്നും, ബിജെപി ഭരണ സമിതി മാറേണ്ടത് സിപി എമ്മിൻ്റെ ആവശ്യമായി മാത്രം മാറിയിരിക്കുകയാണന്നും, നഗരസഭയിലേക്ക് വരുന്ന ജനങ്ങളെ പോലും തടഞ്ഞ് ഭരണ സ്‌തംഭനം സൃഷ്‌ടിക്കാൻ ശ്രമം നടത്തിയിട്ട് ഒരു കാര്യവുമില്ലന്നും, 45 വർഷം തിരുവനന്തപുരംനഗരം ഭരിച്ച് നശിപ്പിച്ച് കീശ നിറച്ചവർ ജനങ്ങൾക്ക് മുന്നിൽ ഉത്തരം പറഞ്ഞേ പറ്റൂ എന്നും കരമന ജയൻ അറിയിച്ചു.