സലീം കുമാറിന് വേണ്ടി സ്മാരം പണിയേണ്ടത് പൊതുജനത്തിന്റെ പണമെടുത്തല്ല. രൂക്ഷ വിമർശനവുമായി മാമുക്കോയയുടെ മകൻ. കെപിസിസിയോ സിനിമാ സംഘടനകളോ ആണ് ഇതേറ്റെടുക്കേണ്ടത് എന്നും നിസാർ പറഞ്ഞു. തന്റെ പിതാവിന് സ്മാരകം പണിയുമെന്ന് പലരും പറഞ്ഞെങ്കിലും ഇതുവരെ നടന്നില്ലെന്നും നിസാർ പറയുന്നു. സിഎംപി നേതാവ് വിജയകൃഷ്ണനും കോഴിക്കോട് ഡെപ്യൂട്ടി മേയർ ആയിരുന്ന മുസാഫിറുമെല്ലാം ഇക്കാര്യം പറഞ്ഞിരുന്നു. പ്രമുഖ സാഹിത്യകാരന്മാരുമായി അടുത്ത സൗഹൃദമുള്ള വ്യക്തിയാണ് പിതാവ്. പരന്ന വായനയുള്ള വ്യക്തിയായിരുന്നു മാമുക്കോയ. 14 ജില്ലകളിലും ഉപ്പയുടെ പേരിൽ ലൈബ്രറി വന്നാൽ നന്നാകുമെന്നും നിസാർ പറഞ്ഞു.

സാമൂഹിക-സാംസ്‌കാരിക രംഗത്ത് മാമുക്കോയ സജീവമായിരുന്നു. വെറുമൊരു കലാകരനോ സിനിമാ അഭിനേതാവോ മാത്രമായിരുന്നില്ല പിതാവ്. മൊബൈലിൽ 10 മിനുട്ട് നോക്കിയിരിക്കുന്നവർക്ക് പിതാവിന്റെ ഒരു റീൽ എങ്കിലും കാണാൻ സാധിക്കും. ഇങ്ങനെ ഒരു നടൻ ലോകത്തില്ല. സ്‌നേഹിക്കുന്നവരും ആദരിക്കുന്നവരുമാണ് സ്മാരകം പണിയേണ്ടത്. നമ്മൾ ആവശ്യപ്പെട്ട് ചെയ്യേണ്ടതല്ലെന്നും നിസാർ പറയുന്നു.
സലീം കുമാർ വലിയ നടനാണ്. അദ്ദേഹത്തെ ആദരിക്കേണ്ടതുണ്ട്. അതിന് കെപിസിസിയോ സിനിമാ സംഘടനയോ ഒരു പ്രത്യേക സമിതി രൂപീകരിച്ച് ചെയ്യണം. ജനങ്ങൾക്ക് ഉപകാരപ്പെടുന്ന ലൈബ്രറിയോ മറ്റോ സ്ഥാപിക്കണം. മന്ത്രി ഇക്കാര്യം പ്രഖ്യാപിച്ച് നടപ്പാക്കുന്നതിനോട് യോജിപ്പില്ല. അക്കാര്യത്തിൽ സാമൂഹിക മാധ്യമങ്ങളിൽ വന്നിട്ടുള്ള കമന്റിനൊപ്പമാണ് താൻ എന്നും നിസാർ മാമുക്കോയ അഭിപ്രായപ്പെട്ടു.

സലീം കുമാറിന് സ്മാരകം പണിയാൻ ഒരു കോടി രൂപയാണ് ബജറ്റിൽ നീക്കിയിരിക്കുന്നത്. സലീം കുമാർ കോൺഗ്രസുകാരനായിരുന്നു. തന്റെ പിതാവും കോൺഗ്രസുകാരനായിരുന്നു, എന്നിട്ടും പിതാവിന് സ്മാരകം പണിയാൻ ആരും മുൻകൈ എടുത്തില്ലെന്നും നിസാർ ചൂണ്ടിക്കാട്ടുന്നു. ഇത്തരം ആദരവ് നൽകുന്നു എങ്കിൽ എല്ലാവർക്കും ലഭിക്കണമെന്നും നിസാർ പറയുന്നു. പിതാവിന് അർഹമായ പരിഗണന കിട്ടിയില്ല. പെരുമഴക്കാലം എന്ന സിനിമയ്ക്ക് സംസ്ഥാന അവാർഡ് ലഭിക്കുമായിരുന്നു. എന്നാൽ തന്നെ വന്ന് കാണണം എന്നാണ് അന്നത്തെ സാംസ്‌കാരിക വകുപ്പ് മന്ത്രി ആവശ്യപ്പെട്ടത്. ആരുടെയും കാല് പിടിച്ചുകൊണ്ട് തനിക്ക് വേണ്ട എന്ന നിലപാടാണ് പിതാവ് സ്വീകരിച്ചത്. അതോടെ ആ വർഷം ജൂറി പരാമർശം മാത്രമായി പിതാവിന്റെ ബഹുമതി ഒതുക്കിയെന്നും നിസാർ എടുത്തു പറയുന്നു.