'ഡെങ്കിപ്പനി പ്രതിരോധം വീട്ടില് നിന്നാരംഭം' ... ദേശീയ ഡെങ്കിപ്പനി വിരുദ്ധ ദിനത്തിന്റെ ഭാഗമായി കേരളത്തില് ഇന്ന് വീടും പരിസരങ്ങളും പൊതുസ്ഥലങ്ങളും വെള്ളം കെട്ടിനില്ക്കാതെ ശുചീകരിച്ച് ഡ്രൈ ഡേ ആചരിക്കും
ദേശീയ ഡെങ്കിപ്പനി വിരുദ്ധ ദിനത്തിന്റെ ഭാഗമായി കേരളത്തില് ഇന്ന് വീടും പരിസരങ്ങളും പൊതുസ്ഥലങ്ങളും വെള്ളം കെട്ടിനില്ക്കാതെ ശുചീകരിച്ച് ഡ്രൈ ഡേ ആചരിക്കും.
ഇപ്പോഴത്തെ മഴ ഡെങ്കിപ്പനി പടര്ത്താന് സാദ്ധ്യതയുള്ളതിനാല് വരുന്ന കാലവര്ഷം കൂടി കണക്കിലെടുത്താണ് ശുചീകരണത്തിന് സര്ക്കാര് ആഹ്വാനം ചെയ്തത്.
ഡെങ്കിപ്പനി ഉണ്ടായ പ്രദേശങ്ങളില് വീടുകളിലും പരിസരത്തുമാണ് കൊതുകിന്റെ ഉറവിടങ്ങള് കണ്ടെത്തിയത്. 'ഡെങ്കിപ്പനി പ്രതിരോധം വീട്ടില് നിന്നാരംഭം' എന്നതാണ് ദിനാചരണ സന്ദേശം.
ചെയ്യേണ്ടത്? കെട്ടിനില്ക്കുന്ന ചെറിയ അളവിലുളള വെള്ളത്തില് പോലും ഈഡിസ് കൊതുകുകള് മുട്ടയിട്ട് വളരും. വീടുകളുടെയും മറ്റ് കെട്ടിടങ്ങളുടെയും അകത്തും മേല്ക്കൂരയിലും പരിസരത്തും വെള്ളം കെട്ടിക്കിടക്കരുത്. കെട്ടിടത്തിലും ടെറസ്, സണ്ഷേഡുകള് എന്നിവയിലും കെട്ടിനില്ക്കുന്ന വെളളം ഒഴുക്കിക്കളയണം.
പാഴ് വസ്തുക്കള് സംസ്കരിക്കണം. ബ്രേക്ക് ദ ചെയിന്റെ ഭാഗമായി സ്ഥാപനങ്ങളുടെ മുന്നില് കൈകഴുകാന് വെള്ളം വയ്ക്കുന്ന പാത്രങ്ങള് ദിവസവും കഴുകണം.? മാര്ക്കറ്റുകളിലെ മത്സ്യം സൂക്ഷിക്കുന്ന പെട്ടികള്, വീട്ടുമുറ്റത്തും പുരയിടത്തിലും ഉപേക്ഷിച്ച പാത്രങ്ങള്, ചിരട്ടകള്, തൊണ്ട്, ടയര്, മുട്ടത്തോട്, ടിന്നുകള്, റബ്ബര് മരങ്ങളില് വച്ച ചിരട്ടകള് തുടങ്ങിയവയില് കെട്ടിനില്ക്കുന്ന വെള്ളത്തില് കൊതുക് വളരാം. അവ വലിച്ചെറിയാതെ നശിപ്പിക്കുകയോ വെള്ളം കെട്ടിനില്ക്കാതെ കമഴ്ത്തി വയ്ക്കുകയോ ചെയ്യുക.
ഡെങ്കിപ്പനിപുലിക്കൊതുക് എന്നറിയപ്പെടുന്ന ഈഡിസ് കൊതുക് പരത്തുന്ന വൈറസ് രോഗമാണ് ഡെങ്കിപ്പനി. കെട്ടിക്കിടക്കുന്ന ശുദ്ധജലത്തിലാണ് ഇവ മുട്ടയിട്ട് വളരുന്നത്.കൊതുകു വഴി മാത്രമേ ഡെങ്കിപ്പനി ഒരാളില് നിന്ന് മറ്റൊരാളിലേക്ക് പകരുകയുള്ളൂ. പകല് കടിക്കുന്ന ഈഡിസ് കൊതുകുകളാണ് രോഗമുണ്ടാക്കുന്നത്.
വൈറല് പനിയുടെ ലക്ഷണങ്ങളാണ് ആദ്യം. കടുത്ത പനി, തലവേദന, കണ്ണിനു പുറകിലും പേശികളിലും സന്ധികളിലും വേദന, അഞ്ചാംപനി പോലെ നെഞ്ചിലും മുഖത്തും തടിപ്പുകള് എന്നിവയാണ് തുടര് ലക്ഷണങ്ങള്.
വയറുവേദന, മൂക്ക്, വായ, മോണ എന്നിവയിലെ രക്തസ്രാവം, രക്തത്തോടുകൂടിയോ അല്ലാതെയോ ഛര്ദ്ദി, ഉറക്കമില്ലായ്മ, അമിതമായ ദാഹം, നാഡിമിടിപ്പ് കുറയല് എന്നിവ ഗുരുതരമായ ലക്ഷണങ്ങളാണ്.
അതേസമയം പനിയും മറ്റ് ലക്ഷണങ്ങളും കണ്ടാല് പൂര്ണ വിശ്രമം എടുക്കണം. വീടുകളില് ലഭ്യമായ പാനീയങ്ങള്, ഉപ്പിട്ട കഞ്ഞിവെള്ളം, കരിക്കിന് വെള്ളം എന്നിവ ധാരാളമായി കുടിക്കണം. ആരോഗ്യ പ്രവര്ത്തകരെയും, ഇ-സഞ്ജീവനിയെയും ബന്ധപ്പെടേണ്ടതാണ്.
"
https://www.facebook.com/Malayalivartha