യുഡിഎഫ് പ്രതിപക്ഷ നേതാവിനെ തെരഞ്ഞെടുത്തതിന് പിന്നാലെ പ്രതിപക്ഷനേതാവിന്റെ ഔദ്യോഗിക വസതിയായ കന്റോണ്‍മെന്റ് ഹൗസ് ഒഴിഞ്ഞ് രമേശ് ചെന്നിത്തല. തിരുവനന്തപുരത്തെ ഈശ്വര വിലാസം റോഡിലെ സ്വന്തം വീട്ടിലേക്കാണ് അദ്ദേഹം താമസം മാറിയത്.

ദിവസങ്ങള്‍ നീണ്ടു നിന്ന അനിശ്ചിതത്വങ്ങള്‍ക്ക് ഒടുവില്‍ ഇന്നാണ് കേരളത്തിലെ പ്രതിപക്ഷ നേതാവിന് സംബന്ധിച്ച്‌ എഐസിസി തീരുമാനം പ്രഖ്യാപിച്ചത്.

അവസാന നിമിഷം വരെ ചെന്നിത്തല പ്രതീക്ഷ പുലർത്തിയെങ്കിലും തീര്‍ത്തും അപ്രതീക്ഷിതമായാണ് പ്രതിപക്ഷ നേതൃസ്ഥാനത്ത് നിന്ന് രമേശ് ചെന്നിത്തലയെ ഹൈക്കമാന്റ് ഇടപെട്ട് മാറ്റിയത്. ഉമ്മന്‍ ചാണ്ടിയുടേയും രമേശ് ചെന്നിത്തലയുടെയും അഭിപ്രായം മറികടന്ന് ഹൈക്കമാന്റ് നടത്തിയ നിര്‍ണ്ണായക ഇടപെടലാണ് വിഡി സതീശനിലൂടെ തലമുറമാറ്റത്തിലേക്ക് എത്തിയത്.

അതേസമയം, പ്രതിപക്ഷ നേതാവായി തെരഞ്ഞെടുക്കപ്പെട്ടതിന് ശേഷം നടത്തിയ ആദ്യ പത്രസമ്മേളനത്തില്‍ രമേശ് ചെന്നിത്തലക്കെതിരെ വിമര്‍ശനവുമായി വി ഡി സതീശന്‍ രംഗത്തെത്തിയിരുന്നു. നല്ല പ്രതിപക്ഷം എങ്ങനെയാവണമെന്ന് വരും നാളുകളില്‍ കാണാമെന്ന് അദ്ദേഹം പറഞ്ഞു.

ഉമ്മന്‍ചാണ്ടിയും,കരുണാകരനും നല്ല പ്രതിപക്ഷ നേതാക്കളായിരുന്നു. കെ പി സി സി പ്രസിഡന്റെന്ന നിലയില്‍ മാത്രമാണ് കോണ്‍​ഗ്രസില്‍ ചെന്നിത്തലയുടെ മികച്ച പ്രവര്‍ത്തനമുണ്ടായത്. കോണ്‍​ഗ്രസില്‍ എല്ലാ നേതാക്കളും തക്കോല്‍ സ്ഥാനം നേടാനുള്ള ശ്രമത്തിലാണ്. കാലത്തിനനുസരിച്ചുള്ള മാറ്റത്തിന് കോണ്‍​ഗ്രസും തയ്യാറാവണം. കാലം ആവശ്യപ്പെടുന്ന മാറ്റത്തോടു കൂടിയതായിരിക്കും പുതിയ പ്രതിപക്ഷമെന്നും വിഡി സതീശന്‍ കൂട്ടിചേര്‍ക്കുകയുണ്ടായി.