'ഇളവ് കൊടുക്കാന്‍ പോയാല്‍ അത് ഒരാളില്‍ നില്‍ക്കില്ല'; വനിതാമന്ത്രിയെ മാത്രമാണ് മാറ്റിനിര്‍ത്തിയതെന്ന വാദം ശരിയല്ലെന്ന് കോടിയേരി ബാലകൃഷ്ണന്‍
വനിതാമന്ത്രിയെ മാത്രമാണ് മാറ്റിനിര്‍ത്തിയതെന്ന വാദം ശരിയല്ലെന്ന് സി.പി.എം പി.ബി അംഗം കോടിയേരി ബാലകൃഷ്ണന്‍. മാറ്റിനിര്‍ത്തിയവരില്‍ കൂടുതല്‍ പുരുഷന്മാരാണെന്നും അദ്ദേഹം ഒരു ചാനലിന് അനുവദിച്ച അഭിമുഖത്തില്‍ പറഞ്ഞു.
'ഇളവ് കൊടുക്കാന്‍ പോയാല്‍ അത് ഒരാളില്‍ നില്‍ക്കില്ല. ശൈലജക്ക് ഇളവ് കൊടുക്കുന്നത് ശരിയായി തോന്നും. എന്നാല്‍, ടി.പി. രാമകൃഷ്ണനും എം.എം. മണിക്കും കടകംപള്ളി സുരേന്ദ്രനും കെ.ടി. ജലീലിനും എ.സി. മൊയ്തീനും എങ്ങനെ ഇളവ് നിഷേധിക്കും. ഇ.പി. ജയരാജനെയും ടി.എം. തോമസ് ഐസക്കിനെയും സി. രവീന്ദ്രനാഥിനെയും എ.കെ. ബാലനെയും വനിതകളായതുകൊണ്ടല്ല മത്സരിക്കുന്നതില്‍നിന്ന് മാറ്റിനിര്‍ത്തിയത്. പാര്‍ട്ടിയുടെ സംഘടനാതത്ത്വം അംഗങ്ങള്‍ക്കെല്ലാം ബാധകമാണെന്നും അദ്ദേഹം പറഞ്ഞു.
പിണറായി പറയുന്നത് അതേപടി എല്ലാ പി.ബി അംഗങ്ങളും അംഗീകരിക്കുമെന്ന വാദം തങ്ങളെ കുറച്ചുകാണലാണ്. നാല് പി.ബി അംഗങ്ങള്‍ ചര്‍ച്ച ചെയ്യുന്ന സന്ദര്‍ഭത്തില്‍ ഒാരോരുത്തരും തങ്ങളുടെ അഭിപ്രായം പറയും. അതില്‍ ശരിയെന്ന് തോന്നുന്നത് സംസ്ഥാനം കേന്ദ്രീകരിച്ച്‌ പ്രവര്‍ത്തിക്കുന്ന പി.ബി അംഗങ്ങളുടെ പൊതു അഭിപ്രായമായി മാറും. അത് അതേപടി അംഗീകരിപ്പിക്കാന്‍ ശ്രമിക്കാറില്ല. സെക്രേട്ടറിയറ്റിന് മുന്നില്‍ ആരെങ്കിലും ഒരാള്‍ അഭിപ്രായം വെക്കേണ്ടേ. തീരുമാനം എടുക്കാന്‍ കേന്ദ്രീകൃത നേതൃത്വം ഇല്ലെങ്കില്‍ പാര്‍ട്ടിയില്‍ അരാജകത്വം സംഭവിക്കുമെന്നും കോടിയേരി കൂട്ടിച്ചേര്‍ത്തു.
https://www.facebook.com/Malayalivartha
