കൊല്ലം-തേനി ദേശീയപാതയില്‍ ടോറസ് ലോറികള്‍ തമ്മില്‍ കൂട്ടിയിടിച്ച്‌ രണ്ട് ലോറികളുടെയും ഡ്രൈവര്‍മാര്‍ക്ക് പരിക്കേറ്റു. ഡ്രൈവര്‍മാരായ മുഹമ്മദ് റാഫി, പ്രമോദ് എന്നിവര്‍ക്കാണ് ഗുരുതരമായി പരിക്കേറ്റത്. കോടുകുളഞ്ഞി ഭാഗത്തേക്ക് ലോഡുമായി പോയ ലോറിയിലേക്ക് എതിര്‍ദിശയില്‍ നിന്നും വന്ന ലോറി ടയര്‍ പൊട്ടി നിയന്ത്രണം നഷ്ടപ്പെട്ട് വന്ന് ഇടിച്ചുകയറുകയായിരുന്നു.

സംഭവ സ്ഥലത്ത് ഓടിക്കൂടിയ നാട്ടുകാരാണ് പ്രമോദിനെ ലോറിക്കുള്ളില്‍നിന്ന് രക്ഷപ്പെടുത്തി ആശുപത്രിയിലെത്തിച്ചത്. ഒരു ഡ്രൈവറുടെ കാലുകള്‍ പുറത്തെടുക്കാന്‍ കഴിയാത്തവിധം കാബിനില്‍ കുടുങ്ങിയ നിലയിലായിരുന്നു. ഒടുവില്‍ ചെങ്ങന്നൂരില്‍ നിന്ന് അഗ്നിരക്ഷാസേന എത്തി ലോറിയുടെ കാബിന്‍ കട്ടറുപയോഗിച്ച്‌ മുറിച്ചുമാറ്റിയാണ് ഇയാളെ പുറത്തെടുത്തത്. ഇയാള്‍ക്ക് കാലില്‍ ഒടിവ് പറ്റുകയും ചെയ്തിട്ടുണ്ട്.