പകര്‍ച്ചവ്യാധികള്‍ നിയന്ത്രണവിധേയമാകാത്ത സാഹചര്യത്തില്‍ ആരോഗ്യവകുപ്പ് കര്‍ശനനടപടികള്‍ക്കൊരുങ്ങുന്നു. ഹോട്ടലുകളിലെ പതിവു പരിശോധനകള്‍ വീടുകളിലേക്കുകൂടി വ്യാപിപ്പിക്കാനാണു തീരുമാനം. ആരോഗ്യവകുപ്പിന്റെ നിര്‍ദേശങ്ങള്‍ അവഗണിക്കുന്ന പൊതുജനങ്ങളില്‍നിന്നും പിഴയീടാക്കും. ഇത്തരം പരിശോധനകള്‍ ആദ്യമായാണു വീടുകളിലേക്കു വ്യാപിപ്പിക്കുന്നത്.

ആരോഗ്യവകുപ്പിനു കീഴിലുള്ള സന്നദ്ധപ്രവര്‍ത്തകര്‍, പ്രാഥമികാരോഗ്യകേന്ദ്രങ്ങളിലെ ജീവനക്കാര്‍, വിവിധ സന്നദ്ധസംഘടനകള്‍ എന്നിവര്‍ പദ്ധതിയില്‍ പങ്കാളികളാകും. പകര്‍ച്ചവ്യാധികള്‍ കൂടുതലായുള്ള പ്രദേശങ്ങളിലായിരിക്കും ആദ്യഘട്ടം പരിശോധന.
വീടുകളില്‍ പരിശോധനയ്‌ക്കെത്തുന്ന സംഘം നിയമപരമായ കാര്യങ്ങളില്‍ ബോധവത്കരണം നടത്തും. ഇതിനായി നിയോഗിക്കപ്പെടുന്ന സന്നദ്ധപ്രവര്‍ത്തകര്‍ക്കു യാത്രാബത്ത ഉള്‍പ്പെടെ നല്‍കും. നഗര-ഗ്രാമവ്യത്യാസമില്ലാതെയാകും പദ്ധതി നടപ്പാക്കുക.

ബോധവത്കരണംകൊണ്ടു പ്രയോജനമുണ്ടായില്ലെങ്കില്‍ രണ്ടാംഘട്ടത്തില്‍ പിഴ ചുമത്തും. വീടുകള്‍, കടകള്‍ എന്നിവയെല്ലാം പദ്ധതിയില്‍ ഉള്‍പ്പെടുത്തും. വീടുകളുടെ അകത്തും പുറത്തും പരിശോധനയുണ്ടാകും.

കടകളിലെ മാലിന്യസംസ്‌കരണസംവിധാനത്തിന്റെ കാര്യത്തില്‍ വിട്ടുവീഴ്ചയുണ്ടാകില്ല. എതിര്‍പ്പുയര്‍ന്നാലും ഏതുവിധേനയും പദ്ധതി നടപ്പാക്കാനാണ് ഉദ്യോഗസ്ഥര്‍ക്കുള്ള നിര്‍ദേശം. ഇതിനായി തദ്ദേശസ്ഥാപനങ്ങളുടെ സഹകരണം തേടും.വൃത്തിഹീനമായ സാഹചര്യങ്ങള്‍ സൃഷ്ടിക്കുന്നവരില്‍നിന്നു പിഴയീടാക്കാന്‍ നിലവില്‍ നിയമമുണ്ടെങ്കിലും അതു കര്‍ക്കശമായി നടപ്പാക്കാന്‍ ഇതുവരെ ഉദ്യോഗസ്ഥര്‍ രംഗത്തിറങ്ങിയിരുന്നില്ല. പദ്ധതി ആദ്യം കോഴിക്കോട്ട് നടപ്പാക്കുമെന്നു ജില്ലാ മെഡിക്കല്‍ ഓഫീസര്‍ അറിയിച്ചു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha