പ്രണയാഭ്യര്‍ത്ഥന നിരസിച്ചതിന് എല്‍എല്‍ബി വിദ്യാര്‍ത്ഥിനിയെ യുവാവ് കുത്തിക്കൊന്നു. ഏലംകുളത്ത് ചെമ്മാട്ട് വീട്ടില്‍ സി.കെ. ബാലചന്ദ്രന്റെ മകള്‍ ദൃശ്യ (21) ആണ് മരിച്ചത്. പ്രതിയെ തടയാന്‍ ശ്രമിക്കുന്നതിനിടെ നെഞ്ചില്‍ കുത്തേറ്റ സഹോദരി ദേവശ്രീയെ (13) സ്വകാര്യ ആശുപത്രിയില്‍ അടിയന്തര ശസ്ത്രക്രിയയ്ക്ക് വിധേയയാക്കി. ദേവശ്രീയുടെ നില ഗുരുതരമായി തുടരുകയാണ്. പ്രതി മുട്ടുങ്ങല്‍ പൊതുവയില്‍ കൊണ്ടിപ്പറമ്ബ് വീട്ടില്‍ വിനീഷ് വിനോദിനെ (21) പൊലീസ് അറസ്റ്റ് ചെയ്തു. ഓടി രക്ഷപ്പെടുന്നതിനിടെ കണ്ട ഓട്ടോയില്‍ വിനീഷ് കയറിയെങ്കിലും ഡ്രൈവര്‍ തന്ത്രപരമായി പൊലീസ് സ്‌റ്റേഷനില്‍ എത്തിക്കുകയായിരുന്നു.

ഇന്നലെ രാവിലെ 7.30 ഓടെയാണ് നാടിനെ നടുക്കിയ കൊലപാതകം നടന്നത്. ബുധനാഴ്ച രാത്രി 9.45ഓടെ പെണ്‍കുട്ടിയുടെ പിതാവ് ബാലചന്ദ്രന്റെ ഉടമസ്ഥതയിലുള്ള ഫാന്‍സി കടയ്ക്ക് യുവാവ് തീയിട്ടിരുന്നു. ദൃശ്യയെ കൊലപ്പെടുത്തുന്നതിനായി ബാലചന്ദ്രനെയും ബന്ധുക്കളെയും വീട്ടില്‍ നിന്ന് മാറ്റിനിറുത്തുകയായിരുന്നു വിനീഷിന്റെ ലക്ഷ്യം. എന്നാല്‍, മറ്റ് ബന്ധുക്കള്‍ വീട്ടില്‍ ഉണ്ടായിരുന്നതിനാല്‍ അതിന് കഴിഞ്ഞില്ല. ഇന്നലെ പിതാവും ബന്ധുക്കളും രാവിലെ കടയിലേക്ക് പോയ സമയത്താണ് പ്രതി വീട്ടിലെത്തി ആക്രമിച്ചത്.
പാമ്ബാടി പി.കെ. ദാസ് മെമ്മോറിയല്‍ കോളേജില്‍ രണ്ടാംവര്‍ഷ എല്‍എല്‍.ബി വിദ്യാര്‍ത്ഥിനിയാണ് ദൃശ്യ. ദീപയാണ് മാതാവ്.
പ്രണയം നിരസിച്ചതാണ് കൊലപാതകത്തിന് കാരണമായതെന്ന് മലപ്പുറം എസ്.പി. എസ്. സുജിത് ദാസ് പറഞ്ഞു.
രണ്ട് മാസം മുമ്ബ് വിവാഹാലോചനയുമായി വിനീഷ് പെണ്‍കുട്ടിയുടെ വീട്ടിലെത്തിയിരുന്നു. എന്നാല്‍, വിനീഷിനോട് വീട്ടുകാര്‍ താത്പര്യം കാണിച്ചില്ല. ഫോണിലടക്കം ദൃശ്യയെ ശല്യം ചെയ്യുന്നത് പതിവായതോടെ പിതാവ് പെരിന്തല്‍മണ്ണ പൊലീസില്‍ പരാതി നല്‍കി. തുടര്‍ന്ന് ഇരുകുടുംബങ്ങളെയും വിളിച്ചുവരുത്തി വിനീഷിനെ താക്കീത് ചെയ്തിരുന്നു. ഏലംകുളം കുന്നക്കാവ് ജി.എച്ച്.എസ്.എസില്‍ പ്ലസ് ടുവിന് ഒരുമിച്ചായിരുന്നു പഠനം. അക്കാലത്തും വിനീഷ് പലതവണ പ്രണയാഭ്യര്‍ത്ഥന നടത്തിയിരുന്നു.