വാക്കുകള്‍ ഉപയോഗിക്കുമ്പോള്‍ സൂക്ഷിച്ച് പറയണമെന്ന് കാരണവന്‍മാര്‍ പറയുന്നത് ചുമ്മാതല്ല. ചാനലുകാര്‍ റേറ്റിംഗ് കൂട്ടാന്‍ ചോദിച്ച ചോദ്യത്തിന് ആവേശം കയറി പറഞ്ഞ ഉത്തരത്തിനാണ് അയിഷ സുല്‍ത്താന എന്ന നടിയും യുവ സംവിധായികയുമായ തീ തിന്നുന്നത്.

രാജ്യദ്രോഹക്കേസില്‍ ജയിലിലാകാതിരിക്കാന്‍ പാട് പെടുകയാണ്. ഹൈക്കോടതിയില്‍ പോകണമെങ്കില്‍ വക്കീലിനും മറ്റുമായി ചെലവാകേണ്ടത് ലക്ഷങ്ങളും.

കേന്ദ്ര സര്‍ക്കാര്‍ ലക്ഷദ്വീപിലെ ജനങ്ങള്‍ക്കുനേരെ ബയോവെപ്പണ്‍ (ജൈവായുധം) പ്രയോഗിച്ചെന്ന വിവാദ പരാമര്‍ശമാണ് കുരുക്കിലാക്കിയത്. ഇതിനെത്തുടര്‍ന്ന് കവരത്തി പൊലീസ് രജിസ്റ്റര്‍ ചെയ്ത രാജ്യദ്രോഹക്കേസില്‍ അയിഷ സുല്‍ത്താനയ്ക്ക് ഹൈക്കോടതി ഒരാഴ്ച ഇടക്കാല മുന്‍കൂര്‍ ജാമ്യം അനുവദിച്ചു. ഇന്നലെ അയിഷയുടെ മുന്‍കൂര്‍ ജാമ്യാപേക്ഷയില്‍ വാദം പൂര്‍ത്തിയായതോടെ ജസ്റ്റിസ് അശോക് മേനോന്റെ ബെഞ്ച് വിധി പറയാന്‍ മാറ്റി.

ജൂണ്‍ 20നു വൈകിട്ട് നാലിന് ചോദ്യം ചെയ്യലിന് ഹാജരാകാനാണ് അയിഷ സുല്‍ത്താനയ്ക്ക് പൊലീസ് നോട്ടീസ്. അന്ന് അയിഷ ഹാജരാകണം. അതിനുശേഷം അറസ്റ്റ് ചെയ്താല്‍ 50,000 രൂപയുടെ ബോണ്ടും തുല്യ തുകയ്ക്കുള്ള രണ്ട് ആള്‍ജാമ്യവും വ്യവസ്ഥ ചെയ്ത് ജാമ്യത്തില്‍ വിടണം. അറസ്റ്റിനു ശേഷം അയിഷയെ വീണ്ടും ചോദ്യം ചെയ്യേണ്ടി വന്നാല്‍ അഭിഭാഷകന്റെ സാന്നിദ്ധ്യത്തില്‍ വേണമെന്ന ആവശ്യവും സിംഗിള്‍ബെഞ്ച് അനുവദിച്ചു.

കേസില്‍ കക്ഷി ചേരാനെത്തിയ പരാതിക്കാരില്‍ ഒരാളായ പ്രതീഷ് വിശ്വനാഥന്റെ അപേക്ഷ തള്ളിയെങ്കിലും അഭിഭാഷകന്റെ വാദങ്ങള്‍ കോടതി കേട്ടു.

ജൂണ്‍ ഏഴിന് ടി.വി ചാനല്‍ ചര്‍ച്ചയിലാണ് അയിഷ വിവാദ പരാമര്‍ശം നടത്തിയത്. ലക്ഷദ്വീപ് ഭരണകൂടത്തിന്റെ വാദം കൊവിഡിനെ ജൈവായുധമായി ഉപയോഗിച്ചെന്ന പരാമര്‍ശം കേന്ദ്രസര്‍ക്കാരിനെതിരെ വിദ്വേഷം വളര്‍ത്താനാണ്. നടിയും സംവിധായികയുമായ ഹര്‍ജിക്കാരിയുടെ പരാമര്‍ശം ദ്വീപിലെ സ്‌കൂള്‍ കുട്ടിയില്‍ പോലും വിദ്വേഷമുണ്ടാക്കും. പ്രഥമദൃഷ്ട്യാ രാജ്യദ്രോഹക്കുറ്റം നിലനില്‍ക്കും. വിവാദ പരാമര്‍ശത്തെ സര്‍ക്കാരിനെതിരായ വിമര്‍ശനമായി കാണാനാവില്ല. മുന്‍കൂര്‍ ജാമ്യം നല്‍കുന്നത് സമൂഹത്തിന് തെറ്റായ സന്ദേശം നല്‍കുമെന്നും സര്‍ക്കാരിന് വേണ്ടി വാദിച്ചു

അതേസമയം ഈ പരാമര്‍ശം ചാനലിലെ ചൂടുപിടിച്ച വാദപ്രതിവാദത്തില്‍ സംഭവിച്ചുപോയതാണെന്ന് അയിഷയും വാദിച്ചു. ഇത് ഗുരുതരമായ പ്രത്യാഘാതമുണ്ടാക്കുമെന്ന് തിരിച്ചറിഞ്ഞപ്പോള്‍ തിരുത്തി ഫേസ്ബുക്കിലടക്കം പോസ്റ്റിട്ടു. പുതിയ അഡ്മിനിസ്‌ട്രേറ്ററുടെ പരിഷ്‌കാരങ്ങള്‍ക്കെതിരെയാണ് പരാമര്‍ശം. കേന്ദ്രസര്‍ക്കാരിനെ നിന്ദിക്കാന്‍ ഉദ്ദേശിച്ചില്ല. കസ്റ്റഡിയില്‍ ചോദ്യം ചെയ്യേണ്ട സാഹചര്യമില്ലാത്തതിനാല്‍ മുന്‍കൂര്‍ ജാമ്യം നല്‍കണമെന്നും അയിഷയ്ക്ക് വേണ്ടി വാദിച്ചു.

ആ വാക്ക് പ്രയോഗിച്ചത് പ്രഫുല്‍ പട്ടേലിനെ മാത്രം ഉദ്ദേശിച്ച് തന്നെയാണെന്നും പ്രഫുല്‍ പട്ടേലും അയാളുടെ നയങ്ങളും തികച്ചും ഒരു വെപ്പന്‍ പൊലെ തനിക്ക് തോന്നിയെന്നും ഫേസ്ബുക്ക് കുറിപ്പില്‍ അയിഷ സുല്‍ത്താന നേരത്തെ വ്യക്തമാക്കുന്നു. അതിന് കാരണം ഒരു വര്‍ഷത്തോളമായി പൂജ്യം കോവിഡ് ആയ ലക്ഷദ്വീപില്‍ പ്രഫുല്‍ പട്ടേലും ആളുടെ കൂടെ വന്നവരില്‍ നിന്നുമാണ് ആ വൈറസ് നാട്ടില്‍ വ്യാപിച്ചതെന്നും ഐഷ സുല്‍ത്താന പറയുന്നു.

അതേസമയം ചോദ്യം ചെയ്യല്ലിന് ഹാജരാകുമെന്നും അടുത്ത ദിവസം ലക്ഷ ദ്വീപിലേക്ക് പോകുമെന്നും ആയിഷ സുല്‍ത്താന പറഞ്ഞു. മറ്റന്നാള്‍ തന്നെ ലക്ഷദ്വീപിലേക്ക് പോകുമെന്നും അയിഷ സുല്‍ത്താന വ്യക്തമാക്കി.