മുൻ ആരോഗ്യമന്ത്രി കെ. കെ. ശൈലജ ടീച്ചറെ തേടി വീണ്ടും അന്താരാഷ്ട്ര പുരസ്കാരം... നേടിക്കൊടുത്തത് കൊവിഡ്...
ഒന്നാം പിണറായി വിജയൻ സർക്കാരിൽ ആരോഗ്യവകുപ്പ് കൈകാര്യം ചെയ്തതിൽ 100 ശതമാനം നേട്ടമാണ് മുൻ ആരോഗ്യമന്ത്രി കെ.കെ. ശൈലജ ടീച്ചർ നേടിയത്. ആരോഗ്യമന്ത്രി എന്ന നിലയിൽ കഴിഞ്ഞ 5 വർഷം ചെയ്ത നേട്ടങ്ങൾ ആർക്കും തന്നെ മറക്കാൻ കഴിയാത്തതാണ്.
നിപ്പ മുതൽ കൊവിഡ് വരെ പിടിച്ചു കെട്ടിയ ടീച്ചർ മലയാളികളുടെ എല്ലാ ഇന്ത്യാക്കാരുടേയും യശ്ശസ്സ് വാനോളം ഉയർത്തിയിട്ടുണ്ട്. എന്നാലിപ്പോൾ രണ്ടാം പിണറായി സർക്കാർ അധികാരത്തിൽ എത്തിയപ്പോൾ പോലും ഏവരും ആഗ്രഹിച്ചത് ടീച്ചർ വീണ്ടും വരണമെന്നായിരുന്നു.
എന്നാൽ ഭരണത്തിൽ ഇല്ലാ എങ്കിൽ പോലും അർഹിച്ച അംഗീകാരങ്ങൾ ടീച്ചറെ തേടിയെത്തി കൊണ്ട് ഇരിക്കുകയാണ്. ഏറ്റവുമൊടുവിലായി മുൻ ആരോഗ്യമന്ത്രിയും സി.പി.എം സെക്രട്ടറിയറ്റ് അംഗവുമായ കെ.കെ ശൈലജയ്ക്ക് വീണ്ടും ലഭിച്ചിരിക്കുന്നത് അന്താരാഷ്ട്ര പുരസ്കാരമാണ്. സെൻട്രൽ യൂറോപ്യൻ യൂണിവേഴ്സിറ്റിയുടെ 2021 ലെ ഓപ്പൺ സൊസൈറ്റി പ്രൈസ് പുരസ്കാരമാണ് ശൈലജ ടീച്ചറെ ഇപ്പോൾ തേടി എത്തിയിരിക്കുന്നത്.
വെള്ളിയാഴ്ച വിയന്നയിലാണ് പുരസ്കാര സമർപ്പണം. തത്ത്വചിന്തയുടെ ചരിത്രത്തിലെ അതികായനായ കാൾ പോപ്പർ, യു.എൻ സെക്രട്ടറി ജനറൽ കോഫി അന്നൻ, ചെക് പ്രസിഡന്റും നാടകകൃത്തുമായ വക്ലാവ് ഹാവൽ, ലോകപ്രശസ്ത സാമ്പത്തിക ചിന്തകൻ ജോസഫ് സ്റ്റിഗ്ലിറ്റ്സ് തുടങ്ങിയവരൊക്കെയാണ് ഈ പുരസ്കാരം മുൻപ് നേടിയിട്ടുള്ളത്.
2020ൽ നോബൽ പുരസ്കാര ജേതാവ് സ്വെറ്റ്ലാന അലക്സിയേവിച്ചിനായിരുന്നു ഓപ്പൺ സൊസൈറ്റി പ്രൈസ് ലഭിച്ചത്. പൊതുപ്രവർത്തക എന്ന നിലയിലും വനിതാ നേതാവ് എന്ന നിലക്കും പൊതുജനാരോഗ്യത്തിനായി നടത്തിയ സേവനങ്ങൾക്കുള്ള ആദരമാണ് പുരസ്കാരമെന്ന് സംഘാടകർ പറഞ്ഞു.
കെ.കെ. ശൈലജ ടീച്ചറിന്റെ നേതൃത്വത്തിൽ കേരളത്തിൽ നടത്തിയ കൊവിഡ് പ്രതിരോധ പ്രവർത്തനങ്ങൾ ലോക ശ്രദ്ധ നേടിയിരുന്നു. 2020 ജൂൺ 23 ന് ഐക്യരാഷ്ട്രസഭ കെ.കെ. ശൈലജ ടീച്ചറെ ആദരിച്ചിരുന്നു. ‘റോക്ക് സ്റ്റാർ ആരോഗ്യമന്ത്രി’ എന്നാണ് ഗാർഡിയൻ വിശേഷിപ്പിച്ചത്.
ബ്രിട്ടനിലെ പ്രോസ്പെക്ട് മാഗസിൻ 2020ലെ ലോകത്തെ മികച്ച ആശയങ്ങൾ സംഭാവന ചെയ്തവരുടെ പട്ടികയിൽ കെ.കെ. ശൈലജ ടീച്ചറെ തെരഞ്ഞെടുത്തിരുന്നു. ന്യൂസീലൻഡ് പ്രധാനമന്ത്രി ജസീന്താ അർഡേനെ പിന്തള്ളിയാണ് കൊവിഡ് കാലത്തെ മികച്ച ആശയങ്ങൾ പ്രായോഗികതലത്തിൽ എത്തിച്ച മികച്ച 50 പേരിൽ നിന്ന് കെ.കെ. ശൈലജ ടീച്ചര് ഒന്നാം സ്ഥാനത്തെത്തിയത്.
സംസ്ഥാനത്ത് കൊവിഡ് പ്രതിരോധ പ്രവർത്തനങ്ങൾക്ക് മാതൃകാപരമായ നേതൃത്വം കൊടുത്തതിനാണ് അംഗീകാരം കിട്ടിയിരിക്കുന്നത്. പൊതു പ്രവർത്തനത്തിലേക്കിറങ്ങാൻ യുവതികൾക്ക് പ്രചോദനം നൽകുന്ന വ്യക്തിത്വാണ് ശൈലജ ടീച്ചറുടേതെന്ന് പുരസ്കാര നിർണ്ണയ സമിതി വിലയിരുത്തിയിട്ടുണ്ട്.
ലോകം വലിയ വെല്ലുവിളികൾ നേരിടുന്ന കാലത്ത് കൂടുതൽ പേർ നേതൃസ്ഥാനങ്ങളിലേക്കെത്തട്ടെയെന്ന് പുരസ്കാരം ഏറ്റുവാങ്ങിയ ശേഷം ശൈലജ ടീച്ചർ വ്യക്തമാക്കി. ഓൺലൈനായായിരുന്നു ചടങ്ങ് സംഘടിപ്പിച്ചതും.
https://www.facebook.com/Malayalivartha