മേയര്‍ ആര്യ രാജേന്ദ്രനെതിരെ ആഞ്ഞടിച്ച്‌ ബി.ജെ.പി നേതാവ് എസ്.സുരേഷ്. മേയറുടെ കുട്ടിത്തരങ്ങളാണ് നഗരസഭയുടെ അഴിമതി എന്നും, ആര്യയുടെ പ്രശ്‌നം പ്രായവും പക്വതയും ഒരുപോലെ കുറവാണ് എന്നതാണെന്നും അദ്ദേഹം പറഞ്ഞു. സി.പി.എം മേയറാക്കാന്‍ നിര്‍ത്തിയവരെ എല്ലാം തോല്‍പ്പിച്ച ബി.ജെ.പിക്കും ഇക്കാര്യത്തില്‍ ചെറിയ പങ്കുണ്ടെന്ന് അദ്ദേഹം പരിഹസിക്കുന്നു.

സഹോദരി, അമ്മ എന്നീ പദങ്ങള്‍ അഴിമതി മൂടാനുള്ള പദപ്രയോഗമാക്കിയത് കുട്ടിത്തമായി പോയെന്നു പറഞ്ഞ എസ്.സുരേഷ് മേയറുടെ നേതൃത്വത്തില്‍ നഗരസഭയില്‍ നടന്നു എന്നാരോപിക്കുന്ന അഴിമതികള്‍ എണ്ണിപ്പറഞ്ഞു. അഴിമതികളെ ചോദ്യം ചെയ്യുന്നവരോട് നിങ്ങള്‍ക്ക് സഹോദരിയില്ലേ? അമ്മയില്ലേ ? എന്ന ചോദ്യങ്ങള്‍ ചോദിക്കുന്നത് കുട്ടിത്തമാണെന്നും അദ്ദേഹം തന്റെ ഫേസ്ബുക്ക് പോസ്റ്റില്‍ പറഞ്ഞു.

എസ്.സുരേഷിന്റെ ഫേസ്ബുക്ക് പോസ്റ്റിന്റെ പൂര്‍ണ്ണരൂപം.

മേയറുടെ കുട്ടിത്തങ്ങള്‍. നഗരസഭയുടെ അഴിമതി. BJP യുടെ പോരാട്ടം.
ഞങ്ങള്‍ എതിര്‍ത്തത് നിങ്ങളെ അല്ല. ഞങ്ങള്‍ എതിര്‍ത്തത് നിങ്ങളുടെ പ്രായത്തെ അല്ല. ഞങ്ങള്‍ എതിര്‍ത്തത് അഴിമതിയെ ആണ്. അഴിമതിക്ക് കാരണം. നിങ്ങളുടെ കുട്ടിത്തവും കഴിവുകേടുമാണ്.
കുട്ടിത്തം കുട്ടികള്‍ക്ക് മാത്രമല്ല പ്രായമായവര്‍ക്ക് ഉണ്ടാകാറുണ്ട്. കുട്ടികളില്‍ തന്നെ, പക്വത കാണിക്കുന്നവരും ഉണ്ട് . നിങ്ങളുടെ പ്രശ്നം പ്രായവും പക്വതയും ഒരുപോലെ കുറവാണ് എന്നതാണ്.
അതും നിങ്ങളുടെ കുറവല്ല ; CPM ന്റേതാണ്. CPM മേയറാക്കാന്‍ നിര്‍ത്തിയവരെ എല്ലാം തോല്‍പ്പിച്ച BJP ക്കും ചെറിയ പങ്കുണ്ട്! എങ്കിലും സഹോദരി, അമ്മ എന്നീ പദങ്ങള്‍ അഴിമതി മൂടാനുള്ള പദപ്രയോഗമാക്കിയത് കുട്ടിത്തമായി പോയി. ആറ്റുകാല്‍ ക്ഷേത്രത്തില്‍ മാത്രം നടന്ന പൊങ്കാലയുടെ മറവില്‍ ലക്ഷങ്ങളുടെ വെട്ടിപ്പ് ചോദ്യം ചെയ്തൂടെ ?

നഗരസഭക്ക് ആവശ്യത്തിന് ടിപ്പര്‍ ഉണ്ടെന്നിരിക്കെ ഒരു ടിപ്പറു പോലും ഇല്ലാത്ത ആളെ കൊണ്ട് എന്തിന് 20 ലേറെ ടിപ്പര്‍ ഇറക്കി തട്ടിപ്പ് നടത്തി ? നഗരസഭയുടെ രണ്ട് 'ഹിറ്റാച്ചി ' മാലിന്യക്കുഴിയില്‍ തള്ളിയിട്ട് വന്‍ തുകക്ക് വാടകക്ക് എടുത്തത് എന്തിന്? ദരിദ്രരുടെ ആശ്രയമായിരുന്ന SAT മെഡിക്കല്‍ കോളേജിലെ ന്യായവില മെഡിക്കല്‍ ഷോപ്പ് നിങ്ങള്‍ നേരിട്ട് ചെന്ന് നിന്ന് അടപ്പിച്ചത്, തൊട്ടടുത്ത കുത്തക സഖാവിന്റെ സഹായിക്കാനല്ലേ? ഇതൊക്കെ ചോദിച്ചാല്‍ നിങ്ങള്‍ക്ക് സഹോദരിയില്ലേ? അമ്മയില്ലേ ? എന്ന ചോദ്യം കുട്ടിത്തമാണ്.