പാലക്കാട്ട് റയില്‍വേട്രാക്കില്‍ മരിച്ച നിലയില്‍ കണ്ടെത്തിയ പെണ്‍കുട്ടികള്‍ ഒന്നിലധികം മൊബൈല്‍ സിം കാര്‍ഡുകള്‍ ഉപയോഗിച്ചതായും രണ്ട് തവണ ബെംഗളൂരുവില്‍ പോയിരുന്നു എന്നും കണ്ടെത്തി. ടാബ്‌ലറ്റിനൊപ്പം മൊബൈല്‍ഫോണും പെണ്‍കുട്ടികളുടെ പക്കലുണ്ടായിരുന്നു. മരിച്ച രണ്ടു പെണ്‍കുട്ടികളും ആശുപത്രിയില്‍ ചികില്‍സയില്‍ കഴിയുന്ന പെണ്‍കുട്ടിയും ഉപയോഗിച്ചിരുന്നത് ഒരേ ഫോണ്‍ ആണ്.
എന്നാല്‍ ഇവരെ കാണാതായതിനുശേഷം മൊബൈല്‍ഫോണിന്റെ ഉപയോഗം നിര്‍ത്തുകയായിരുന്നു. പത്തനംതിട്ട ജില്ലയ്ക്ക് പുറത്തുനിന്ന് ഫോണിലേക്ക് വിളിച്ചവര്‍ പൊലീസ് നിരീക്ഷണത്തിലാണ്. ആശുപത്രിയില്‍ ചികില്‍സയിലുള്ള ആര്യ എന്ന കുട്ടിയുടെ അമ്മയുടെ പേരിലുള്ള മൊബൈല്‍ ഫോണാണ് കുട്ടികള്‍ ഉപയോഗിച്ചിരുന്നത്. ഇതുകൂടാതെ മറ്റൊരു സിം കാര്‍ഡും ഇവരുടെ കൈവശമുണ്ടായിരുന്നു.
നേരത്തെ, പെണ്‍കുട്ടികള്‍ മൊബൈല്‍ ഫോണ്‍ സിം കാര്‍ഡ് സംഘടിപ്പിച്ചത് വ്യാജമായിട്ടാണെന്നു പൊലീസ് കണ്ടെത്തിയിരുന്നു. കോന്നിയിലെ അയല്‍ക്കാരിയുടെ പേരിലാണ് അവര്‍ അറിയാതെ സിം എടുത്തത്. ഇക്കാര്യത്തെക്കുറിച്ച് അന്വേഷിക്കാനായി പൊലീസ് സ്‌റ്റേഷനില്‍ വിളിച്ചുവരുത്തിയപ്പോഴാണ് അയല്‍വാസിയായ മോളി ഇക്കാര്യം അറിഞ്ഞത്. പെണ്‍കുട്ടികള്‍ക്ക് തന്റെ തിരിച്ചറിയല്‍ കാര്‍ഡ് നല്‍കിയിട്ടില്ലെന്ന് അവര്‍ പറഞ്ഞു.
മരിച്ച പെണ്‍കുട്ടികളിലൊരാള്‍ മോളി എന്ന സ്ത്രീയുടെ അയല്‍വാസിയാണ്. ഇവരുടെ വ്യാജ ഐഡി കാര്‍ഡുപയോഗിച്ചാണ് ടാബ്‌ലെറ്റില്‍ ഉപയോഗിക്കുന്ന സിം കാര്‍ഡ് എടുത്തിരിക്കുന്നതെന്നാണ് പൊലീസിന് ലഭിച്ചിരിക്കുന്ന വിവരം. ടാബ്‌ലെറ്റ് ഇതുവരെ കണ്ടെത്താനായിട്ടില്ല. മോളിയുടെ കൈയ്യില്‍ നിന്നും ഐഡി കാര്‍ഡോ കളഞ്ഞു പോയിട്ടില്ല. അതിനാല്‍ തന്നെ എവിടെയെങ്കിലും ഫോട്ടോസ്റ്റാറ്റ് എടുക്കാന്‍ കൊടുത്തപ്പോള്‍ അവിടെ നിന്നും ഇതിന്റെ പകര്‍പ്പ് പെണ്‍കുട്ടികള്‍ കൈക്കലാക്കിയതാവാം എന്നാണ് പൊലീസിന്റെ പ്രാഥമിക നിഗമനം.
അതേസമയം, പെണ്‍കുട്ടികള്‍ ആത്മഹത്യയ്ക്ക് ശ്രമിച്ചത് ട്രെയിനില്‍നിന്ന് ചാടിയാണെന്നു വ്യക്തമായി. എറണാകുളത്തു നിന്നും ബംഗളൂരുവിലേക്ക് പോയ പെണ്‍കുട്ടികള്‍ അവിടെ ബൊട്ടാണിക്കല്‍ ഗാര്‍ഡന്‍ സന്ദര്‍ശനവും കഴിഞ്ഞ് മടങ്ങും വഴി ഐലന്‍ഡ് എക്‌സ്പ്രസില്‍നിന്നു ചാടി. തെറിച്ചു പോയവരില്‍ ഒരാള്‍ ഇഴഞ്ഞു നീങ്ങുന്നതിനിടെ വീണ്ടും ട്രാക്കില്‍ വീഴുകയും മറ്റു ട്രെയിന്‍ കയറി മൃതദേഹം ഛിന്നഭിന്നമാവുകയുമായിരുന്നു.
തൃശൂര്‍ മെഡിക്കല്‍ കോളജ് ആശുപത്രിയില്‍ ചികില്‍സയില്‍ കഴിയുന്ന ആര്യ കെ. സുരേഷിന്റെ നില അതീവഗുരുതരമായി തുടരുകയാണ്. സംഭവവുമായി ബന്ധപ്പെട്ട് പൊലീസിന് കുട്ടിയുടെ മൊഴി രേഖപ്പെടുത്താന്‍ സാധിച്ചില്ല.
അതിനിടെ, പെണ്‍കുട്ടികള്‍ രണ്ടു തവണ ബെംഗളൂരുവില്‍ പോയിരുന്നുവെന്ന് പൊലീസ് കണ്ടെത്തി. ട്രെയിന്‍, ബസ് വഴിയായിരുന്നു യാത്ര. മൂന്നുപേര്‍ക്ക് മാത്രമാണ് ടിക്കറ്റ് എടുത്തിരുന്നത്. മറ്റാരെങ്കിലും ഒപ്പമുണ്ടായിരുന്നോയെന്ന് സൂചനയില്ല. ആദ്യം പോയതിനുശേഷം തിരിച്ച് കൊച്ചിയില്‍ വന്നു, പിന്നീടും പോയി. ഇവരുടെ കൈവശമുണ്ടായിരുന്ന ടാബ്‌ലറ്റ് കാണാനില്ലെന്നും ഇത് വിറ്റെന്നാണ് സംശയമെന്നും പൊലീസ് പറയുന്നു.
പെണ്‍കുട്ടികളുടെ മരണവുമായി കസ്റ്റഡിയിലെടുത്ത യുവാവിന് ബന്ധമില്ലെന്ന് പൊലീസ് കണ്ടെത്തി. തൃശൂര്‍ സ്വദേശി പെണ്‍കുട്ടികളുടെ സുഹൃത്ത് മാത്രമെന്നും ഫേസ് ബുക്ക് ചാറ്റില്‍ അസ്വഭാവികതയില്ലെന്നുമാണ് പൊലീസ് കണ്ടെത്തല്‍. പെണ്‍കുട്ടികളുടേത് ആത്മഹത്യയെന്നു തന്നെയാണ് സൂചനയെന്നും കോന്നിയില്‍ അന്വേഷണ ഉദ്യോഗസ്ഥരുടെ യോഗത്തിനു ശേഷം ഐ.ജി മനോജ് ഏബ്രഹാം പറഞ്ഞു. പെണ്‍കുട്ടികളുടെ കൂടുതല്‍ സുഹൃത്തുക്കളെ ചോദ്യം ചെയ്യുന്നതിനാണ് പൊലീസ് തീരുമാനം.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha