കോവിഡ് മഹാമാരിയുടെ പശ്ചാത്തലത്തില്‍ നടക്കുന്ന ടോക്കിയോ ഒളിമ്പിക്‌സ് ഏറെ പ്രാധാന്യമുണ്ട്. ഇതോടൊപ്പം ശ്രദ്ധ നേടുകയാണ് ഒളിമ്പിക് വില്ലേജില്‍ ഒരുക്കിയ പുതിയ സജ്ജീകരണം.

ലൈംഗിക ബന്ധം തടസപ്പെടുത്തുന്ന കിടക്കകള്‍ വില്ലേജില്‍ ഒരുക്കുന്നതായാണ് പുറത്തുവരുന്ന റിപ്പോര്‍ട്ടുകള്‍ പറയുന്നത്. കോവിഡ് സാഹചര്യം പരിഗണിച്ചാണ് കായികതാരങ്ങള്‍ക്കും ഒഫീഷ്യല്‍സിനും ഇത്തരം കിടക്കകള്‍ തയ്യാറാക്കുന്നത്. കൊവിഡ് മഹാമാരി കാരണം, ലൈംഗിക ബന്ധത്തിലടക്കം അനാവശ്യമായ സാമൂഹിക ഇടപെടലിലോ അടുത്തിടപഴകുന്നതില്‍ നിന്നും അത്‌ലറ്റുകളെ നിരുത്സാഹപ്പെടുത്തുന്നതിനാണ് പുതിയ പരീക്ഷണം.

കാര്‍ഡ്‌ബോര്‍ഡ് ഉപയോഗിച്ചാണ് കിടക്കകള്‍ നിര്‍മ്മിച്ചിരിക്കുന്നത്. അവയ്ക്ക് ഒരാളുടെ മാത്രം ഭാരം താങ്ങാന്‍ കഴിയുന്ന തരത്തിലാണ് രൂപകല്പന. ചെയ്തിട്ടുള്ളതാണെന്നും റിപ്പോര്‍ട്ടിലുണ്ട്. പെട്ടെന്നുള്ള ചലനങ്ങളിലൂടെ കിടക്കകള്‍ തകരാറിലാകുന്ന തരത്തിലാണ് അവ കൂട്ടിയോജിപ്പിച്ചിരിക്കുന്നത്. എന്നാല്‍ തകരാറിലായ കിടക്കകള്‍ വീണ്ടും യോജിപ്പിക്കാനാകുമെന്നതാണ് ഇതിന്റെ സവിശേഷത.

ഓരോരുത്തര്‍ക്കും അനുവദിച്ചിരിക്കുന്ന കിടക്ക, അവരുടെ ഭാരം താങ്ങാന്‍ സാധിക്കുന്ന തരത്തിലുള്ളതാണ്. അതില്‍ കൂടുതല്‍ ഭാരം കിടക്കയിലേക്ക് വന്നാല്‍ അത് തകര്‍ന്നു വീഴും. കൂടാതെ പെട്ടെന്നുള്ള ചലനങ്ങളും കിടക്ക തകരാനിടയാക്കും. പിന്നീട് ഇവ കൂട്ടിയോജിപ്പിക്കാന്‍ സമയമെടുക്കും, അതിനാല്‍ ഈ കിടക്കകളില്‍ ലൈംഗിക ബന്ധം സാദ്ധ്യമാകില്ലെന്നും ഒളിംപിക് വില്ലേജ് നടത്തിപ്പുകാര്‍ പറയുന്നു.

ഒളിമ്പിക് പാരമ്പര്യമനുസരിച്ച് കായികതാരങ്ങള്‍ക്കും ഒഫീഷ്യല്‍സിനും നല്‍കുന്ന സൗജന്യ കോണ്ടം ഉപയോഗിക്കരുതെന്നും അത്‌ലറ്റുകള്‍ക്ക് മുന്നറിയിപ്പ് നല്‍കിയിട്ടുണ്ട്. പകരം, എച്ച്‌ഐവി സംബന്ധിച്ച് അവബോധം വളര്‍ത്തുന്നതിനായി അവര്‍ക്കായി സുവനീറുകള്‍ നല്‍കുമെന്നാണ് സംഘാടകര്‍ അറിയിക്കുന്നത്.

ചരിത്രത്തിലാദ്യമായി കാണികളില്ലാതെയാണ് ഒളിമ്പിക്‌സ് മത്സരങ്ങള്‍ സംഘടിപ്പിക്കുന്നത്. വിജയികള്‍ക്കുള്ള മെഡലുകള്‍ സമ്മാനിക്കാന്‍ ഇത്തവണ വിശിഷ്ട വ്യക്തികളുടെ സാന്നിദ്ധ്യവും ഉണ്ടാകില്ല. വിജയികള്‍ മെഡലുകളെടുത്ത് ഒഴിഞ്ഞ ഗാലറികള്‍ സാക്ഷിനിര്‍ത്തി സ്വയം കഴുത്തിലണിയണം.

അതേസമയം സംഘാടകരെ പ്രതിസന്ധിയിലാക്കി ടോക്കിയോ ഒളിമ്പിക്‌സ് വില്ലേജില്‍ ആദ്യമായി കൊവിഡ് സ്ഥിരീകരിച്ചു. വിദേശിയായ ആളാണ് കഴിഞ്ഞ ദിവസം നടന്ന കൊവിഡ് ടെസ്റ്റില്‍ പോസിറ്റീവായതെന്നും അദ്ദേഹം ഐസൊലേഷനിലാണെന്നും ഗെയിംസ് വില്ലേജില്‍ റിപ്പോര്‍ട്ട് ചെയ്യുന്ന ആദ്യ കൊവിഡ് കേസാണിതെന്നും ഒളിമ്പിക്‌സ് സംഘാടക സമിതിയുടെ വക്താവ് മസ ടക്കായ പറഞ്ഞു.

എന്നാല്‍ ഇക്കാര്യത്തില്‍ പരിഭ്രമിക്കാനില്ലെന്നും എല്ലാദിവസവും വില്ലേജില്‍ കൊവിഡ് ടെസ്റ്റ് നടത്തുന്നുണ്ടെന്നും പോസിറ്റീവാകുന്നവരെ ഉടന്‍ ഐസൊലേഷനിലാക്കുമെന്നും ടോക്കിയോ ഒളിമ്പിക്‌സ് സി.ഇ.ഒ തോഷിറോ മൂട്ടോയും പറഞ്ഞു.

അതേസമയം ജപ്പാനിലെ ജനങ്ങള്‍ ഒളിമ്പിക്‌സിന് എല്ലാ പിന്തുണയും നല്‍കി മുന്നോട്ട് വരണമെന്ന് അന്താരാഷ്ട്ര ഒളിമ്പിക് കമ്മിറ്റി ചെയര്‍മാന്‍ തോമസ് ബക്ക് ആഹ്വാനം ചെയ്തു. അദ്ദേഹം ജപ്പാനിലെത്തിയപ്പോള്‍ മുതല്‍ ഒളിമ്പിക്‌സ് നടത്തരുതെന്ന് ആവശ്യപ്പെട്ടുള്ള പ്രതിഷേധങ്ങളും ചിലയിടങ്ങളില്‍ നിന്ന് ഉയരുന്നുണ്ട്. ജപ്പാനീസ് പ്രധാന മന്ത്രി യോഷിഡെ സുഗ ഉള്‍പ്പെടെയുള്ളവരെ ഇന്ന് ബക്ക് കാണും.

വലിയ മെഡല്‍ പ്രതീക്ഷയോടെ ഇന്ത്യന്‍ ഷൂട്ടിംഗ് ടീം ടോക്കിയോയില്‍ എത്തി. എയര്‍പോര്‍ട്ടില്‍ വച്ച് എല്ലാവര്‍ക്കും കൊവിഡ് ടെസ്റ്റ് നടത്തിയിരുന്നു. എല്ലാവരും നെഗറ്റീവാണ്.