ട്രാന്‍സ്‌ജെന്‍ഡര്‍ ആക്ടിവിസ്റ്റ് അനന്യകുമാരി അലക്സിനെ കഴിഞ്ഞ ദിവസം ഇടപ്പള്ളിയിലെ ഫ്ളാറ്റില്‍ മരിച്ച നിലയില്‍ കണ്ടെത്തിയ സംഭവത്തില്‍ അന്വേഷണത്തിന് കഴിഞ്ഞ ദിവസം സര്‍ക്കാര്‍ ഉത്തരവിടുകയുണ്ടായി. ലിംഗമാറ്റ ശസ്ത്രക്രിയയ്ക്ക് ശേഷം ഒരു വര്‍ഷമായി ബുദ്ധിമുട്ടുകള്‍ അവര്‍ അനുഭവിക്കുകയായിരുന്നു. ചികിത്സയിലുണ്ടായ പിഴവാണ് ഇതിന് കാരണമായതെന്നും ആരോപണം ഉയരുന്നുണ്ട്. ഇതു സംബന്ധിച്ച്‌ അനന്യ പരാതി നല്‍കിയിട്ടും ഗുണമുണ്ടായില്ലെന്നും സുഹൃത്തുക്കള്‍ അഭിപ്രായപ്പെടുന്നത്. ഈ വിഷയത്തില്‍ യുവജന സംഘടനയായ ഡി വൈ എഫ് ഐ എന്താണ് സ്വീകരിച്ചതെന്ന് ചോദിക്കുകയാണ് രാഷ്ട്രീയ നിരീക്ഷകനായ ശ്രീജിത്ത് പണിക്കര്‍.

ഫേസ്ബുക്ക് പോസ്റ്റിന്റെ പൂര്‍ണരൂപം

സഖാവ് എ എ റഹിമിനോടാണ്. നാലു വര്‍ഷം മുന്‍പ് ട്രാന്‍സ്‌ജെന്‍ഡര്‍ വിഭാഗത്തിനു ഭൂരിപക്ഷമുള്ള സംഘടനാ യൂണിറ്റ് സ്ഥാപിച്ച പ്രസ്ഥാനമാണ് ഡിവൈഎഫ്‌ഐ. അവരുടെ സാമൂഹ്യ സ്വീകാര്യതയും സുരക്ഷിതത്വവും വര്‍ധിപ്പിക്കാന്‍ നിയമനിര്‍മ്മാണവും ആനുകൂല്യങ്ങളും വേണമെന്ന ഡിവൈഎഫ്‌ഐ നിര്‍ദേശങ്ങള്‍ ഉള്‍പ്പെടുത്തിയാണ് സിപിഎം ലോക്സഭാ തിരഞ്ഞെടുപ്പ് പ്രകടന പത്രിക തയ്യാറാക്കിയത്.

അതോടെ കഴിഞ്ഞോ സംരക്ഷണം?അനന്യ കുമാരി അലക്സ് എന്നൊരാളുടെ മരണം താങ്കളുടെ ശ്രദ്ധയില്‍പ്പെട്ടില്ലേ?ചികിത്സാ പിഴവുമൂലം തന്റെ സ്വകാര്യഭാഗം വെട്ടിമുറിച്ചതുപോലെ ഭീകരമായിപ്പോയെന്ന് അവര്‍ വിലപിച്ചത് താങ്കളെ ഞെട്ടിച്ചില്ലേ?

പൂത്തിരി ചീറ്റുന്നതു പോലെയാണ് മൂത്രം പോകുന്നതെന്ന് കേട്ടപ്പോള്‍ ഒരുതരം മരവിപ്പ് അനുഭവപ്പെട്ടില്ലേ?ഇരുപത്തിനാല് മണിക്കൂറും നാപ്കിനുകള്‍ ഉപയോഗിക്കേണ്ടി വന്ന അവസ്ഥയെക്കുറിച്ചോര്‍ത്ത് ദുഃഖം തോന്നിയില്ലേ?

വിവരം ശ്രദ്ധയില്‍ പെടുത്തിയിട്ടും ആരോഗ്യമന്ത്രി വീണാ ജോര്‍ജില്‍ നിന്ന് അനുകൂല സമീപനം ഉണ്ടായില്ലെന്ന പരാതി താങ്കളെ അസ്വസ്ഥനാക്കിയില്ലേ? കെ കെ ഷൈലജ ആയിരുന്നു മന്ത്രിയെങ്കില്‍ ഈ അവസ്ഥ വരില്ലായിരുന്നെന്ന് പറഞ്ഞത് താങ്കളെ നിരാശപ്പെടുത്തിയില്ലേ?

എന്നിട്ട് താങ്കളും പ്രസ്ഥാനവും ഒരു ചെറുവിരല്‍ അനക്കിയോ? അതെ, 'മനുഷ്യരാവണം' നമ്മള്‍! വിദേശത്തെ പ്രശ്നങ്ങള്‍ക്ക് ഇവിടെ ഞായറാഴ്ച സമരം നടത്താനും മാര്‍ച്ച്‌ നടത്താനും എളുപ്പമാണ് റഹിം. എന്നാല്‍ നിലപാട് എന്നൊന്നുണ്ട്. ഭൂതദയ എന്നൊന്നുണ്ട്. മനുഷ്യരാവണമെന്ന് ഈണത്തില്‍ പാടിയതുകൊണ്ട് നാം മനുഷ്യരാവില്ല. നടക്കുന്നതു കൊണ്ടും, ശ്വസിക്കുന്നതു കൊണ്ടും, സമരം ചെയ്യുന്നതുകൊണ്ടും നാം മനുഷ്യരാവില്ല. അതിനു മനുഷ്യത്വം തന്നെ വേണം.

ചോദിക്കാനും പറയാനും ഇന്നും അധികമാരും ഇല്ലാത്തവരാണ് ട്രാന്‍സ്‌ജെന്‍ഡര്‍ വിഭാഗം. അവര്‍ക്കൊപ്പം എന്ന പ്രഖ്യാപനം ആത്മാര്‍ത്ഥമെങ്കില്‍ അനന്യയ്ക്ക് മരണാനന്തരമെങ്കിലും നീതി ലഭിക്കുന്നത് താങ്കളുടെ പ്രസ്ഥാനത്തിലൂടെ ആവണം. അല്ലെങ്കില്‍ മേല്പറഞ്ഞ യൂണിറ്റ് സ്ഥാപനവും, പ്രകടന പത്രികയുമൊക്കെ വെറും പ്രഹസനം മാത്രമായിപ്പോകും റഹിം; പ്രസ്താവനകള്‍ വെറുംവാക്കുകളും. അങ്ങനെ രാഷ്ട്രീയ ലാഭത്തിന് ഉപയോഗിക്കേണ്ട ജീവിതങ്ങളല്ല അവരുടേത്.

അവരും മനുഷ്യരാണ്. ഈ സമൂഹത്തില്‍ ജീവിക്കേണ്ടവര്‍.

പണിക്കര്‍