പൊതുസ്ഥലങ്ങളില്‍ പെൺകുട്ടികളുടെ മുന്നിലെത്തി അശ്ലീല ചേഷ്ടകള്‍ കാണിച്ച്, യൂട്യൂബർ... റേറ്റിങ് കൂട്ടാൻ സ്ത്രീകളെ അപമാനിക്കുന്ന തരത്തില്‍ പ്രാങ്ക് വീഡിയോ ചിത്രീകരിച്ച പ്രാങ്കോളിക്ക് ഒടുവിൽ എട്ടിന്റെ പണികൊടുത്തത് പോലീസ്: പൊല്ലാപ്പായപ്പോൾ ഒളിഞ്ഞിരുന്ന് വീഡിയോ ഷൂട്ട് ചെയ്ത സുഹൃത്തുക്കൾ മുങ്ങി.....
സോഷ്യല്‍ മീഡിയയില്‍ സ്ത്രീകള്‍ക്കെതിരെ അശ്ലീല ചേഷ്ടകള്‍ കാട്ടുന്ന 'പ്രാങ്ക് വീഡിയോ' ചിത്രീകരിച്ച യുവാവിനെ പൊലീസ് അറസ്റ്റ് ചെയ്തു. യൂട്യൂബറായ എറണാകുളം ചിറ്റൂര്‍ റോഡ് വലിയ പറമ്പിൽ ആകാശ് സൈമണ്‍ മോഹന്‍ (26) എന്നയാളാണ് അറസ്റ്റിലായത്. സൂഹൃത്തുക്കളോടൊപ്പമാണ് ആകാശ് പ്രാങ്ക് വീഡിയോ ചിത്രീകരിച്ചത്. പൊതുസ്ഥലങ്ങളില്‍ സ്ത്രീകളെ സമീപിച്ച്‌ അശ്ലീല ചേഷ്ടകള്‍ കാട്ടുകയും അരോചകമായി സംസാരിക്കുകയും ചെയ്യുന്ന തരത്തിലുള്ള പ്രാങ്കാണ് പൊല്ലാപ്പായത്. അശ്ലീല ചേഷ്ടകള്‍ കാണിക്കുമ്പോഴുള്ള സ്ത്രീകളുടെ പ്രതികരണമുള്‍പ്പെടെ സുഹൃത്തുക്കള്‍ ഒളിഞ്ഞുനിന്ന് ചിത്രീകരിക്കും. ഇത് യൂട്യൂബ് ചാനലില്‍ അപ്‌ലോഡ് ചെയ്യും. എറണാകുളം കച്ചേരിപ്പടി ജംങ്ഷനിലാണ് ഇയാള്‍ സ്ത്രീകളെ ശല്യപ്പെടുത്തും വിധം പ്രാങ്ക് ചെയ്തത്.
സ്ത്രീകളെ അപമാനിക്കുന്ന തരത്തില്‍ പ്രാങ്ക് വീഡിയോ ചിത്രീകരിച്ച്‌ യുട്യൂബില്‍ അപ് ലോഡ് ചെയ്യുകയാണ് ഇയാള്‍ ചെയ്തിരുന്നത് എന്നാണ് നോര്‍ത്ത് പൊലീസ് പറയുന്നത്. അശ്ലീല ചേഷ്ടകളും ആംഗ്യങ്ങളും കാണിച്ചെന്നും മോശമായി സംസാരിച്ചെന്നും പരാതി വന്നതോടെയാണ് പൊലീസ് നടപടി.
പരാതിയുടെ അടിസ്ഥാനത്തില്‍ പൊലീസ് ഇയാളെ കസ്റ്റഡിയിലെടുക്കുകയും യൂട്യൂബ് ചാനല്‍ പരിശോധിച്ചപ്പോള്‍ പെണ്‍കുട്ടികളോട് മോശമായി പെരുമാറുന്ന വീഡിയോ ദൃശ്യങ്ങള്‍ കണ്ടെത്തുകയും ചെയ്തു. പാര്‍ക്കിലിരിക്കുന്ന പെണ്‍കുട്ടികളുടെ മുന്നില്‍ ഇംഗ്ലീഷില്‍ ആരോടോ അവരെ പറ്റി സംസാരിക്കുന്ന രീതിയിലാണ് ഒരു വീഡിയോ.
പെണ്‍കുട്ടികള്‍ ഇയാളുടെ പ്രവൃത്തി കണ്ട് തിരിച്ച്‌ പ്രതികരിക്കുകയും ചെയ്യുന്നുണ്ട്. മാനസിക പ്രശ്നമുള്ളയാളോണോ എന്നൊക്കെ അവര്‍ ചോദിക്കുമ്ബോള്‍ മറുപടി പറയാതെ പെണ്‍കുട്ടികള്‍ ധരിച്ചിരിക്കുന്ന വസത്രങ്ങളെപറ്റി ഫോണില്‍ സംസാരിക്കുന്നതു പോലെ അഭിനയിക്കും. ഇത് കേള്‍ക്കുമ്ബോള്‍ പെണ്‍കുട്ടികള്‍ക്ക് ഭയം ഉണ്ടാവുന്നതായും മനസ്സിലാക്കാം.
മറ്റൊരു വീഡിയോയില്‍ റോഡിലൂടെ നടന്നു പോകുന്ന സ്ത്രീകള്‍ക്ക് നേരെ സംസാരിച്ചു കൊണ്ടെത്തുകയും അവരുടെ ഷൂസും ബാഗുമൊക്കെ വേണമെന്ന് ആവശ്യപ്പെടുന്നതും കാണാം. അതില്‍ തന്നെ പെണ്‍കുട്ടികളുടെ പിന്നാലെ ചെന്ന് അപശബ്ദമുണ്ടാക്കി ഭയപ്പെടുത്തുന്നുമുണ്ട്. സ്ത്രീകളുടെ പ്രതികരണമടക്കം സുഹൃത്തുക്കള്‍ മറഞ്ഞുനിന്ന് വീഡിയോയിലാക്കും. ഡിസ്റ്റര്‍ബിംഗ് ദ ഫീമേല്‍സ്, കേരള പ്രാങ്ക് എന്ന തലക്കെട്ടില്‍ ഇയാളുടെ യൂട്യൂബ് ചാനലില്‍ ഏതാനും വിഡിയോകള്‍ അപ്‌ലോഡ് ചെയ്തിട്ടുണ്ട്. ഇത് നീക്കം ചെയ്യാനുള്ള നടപടി പൊലീസ് ആരംഭിച്ചു. ഇയാളെ പിന്നീട് ജാമ്യത്തില്‍ വിട്ടു. വീഡിയോ ചിത്രീകരിക്കാന്‍ സഹായിച്ച ആകാശിന്റെ സുഹൃത്തുക്കള്‍ ഒളിവിലാണ്. ഇവര്‍ക്കായി പൊലീസ് അന്വേഷണം ആരംഭിച്ചിട്ടുണ്ട്.
https://www.facebook.com/Malayalivartha
