ആഹാ എന്തെളുപ്പം... ഇന്ത്യയെ ഡിജിറ്റലാക്കുമെന്ന് മോദി ഒരു വാക്ക് പറഞ്ഞാല് വാക്കാണ്; വാസ്കിന് രജിസ്ട്രേഷനിലൂടെ എല്ലാവരേയും ഒരിക്കലെങ്കിലും ഡിജിറ്റില് എന്താണെന്ന് പഠിപ്പിച്ചു; വാക്സിന് സര്ട്ടിഫിക്കറ്റ് ഇനി വാട്ട്സ്ആപ്പിലൂടെയും; ചെയ്യേണ്ടത് മൂന്ന് കാര്യങ്ങള് മാത്രം; അഭിനന്ദിച്ച് ശശി തരൂര്
മോദിയുടെ സ്വപ്ന ഡിജിറ്റല് ഇന്ത്യയെന്നു വച്ചാല് ഇതാണ്. കോവിഡ് വാക്സിനേഷന് സര്ട്ടിഫിക്കറ്റ് ഇപ്പോള് നിമിഷങ്ങള്ക്കകം വാട്ട്സ്ആപ്പ് വഴി ലഭിക്കുമെന്ന് കേന്ദ്ര ആരോഗ്യ മന്ത്രാലയം അറിയിച്ചു.
അന്തര് സംസ്ഥാന രാജ്യാന്തര യാത്രകള്ക്കടക്കം വാക്സിനേഷന് സര്ട്ടിഫിക്കറ്റുകള് നിര്ബന്ധമാകുന്ന സാഹചര്യത്തില് ഈ തീരുമാനം ഏറെ ശ്രദ്ധേയമാണ്. കോവിന് വാക്സിനേഷന് പോര്ട്ടലില് നിന്നും സര്ട്ടിഫിക്കറ്റുകള് എളുപ്പത്തില് ലഭിക്കുന്നതിന് വാട്ട്സ്ആപ്പ് സംവിധാനം ഏറെ ഗുണകരമാകും.
വാക്സിന് സര്ട്ടിഫിക്കറ്റ് ഡൗണ്ലോഡ് ചെയ്യുന്നതിനായി ഒരുക്കിയിരിക്കുന്ന ഫോണ് നമ്പരിലേക്ക് വാട്ട്സ്ആപ്പ് സന്ദേശം അയച്ച് സര്ട്ടിഫിക്കറ്റ് സ്വന്തമാക്കാവുന്നതാണെന്ന് ആരോഗ്യ മന്ത്രി മന്സുഖ് മാണ്ഡവ്യയുടെ ഓഫീസ് ട്വിറ്ററിലൂടെ അറിയിച്ചു. സാങ്കേതികവിദ്യ ഉപയോഗിച്ച് സാധാരണക്കാരന്റെ ജീവിതത്തില് വിപ്ലവം സൃഷ്ടിക്കുന്നു!
ഇപ്പോള് മൂന്ന് എളുപ്പ ഘട്ടങ്ങളിലൂടെ MyGov കൊറോണ ഹെല്പ് ഡെസ്ക് വഴി കൊവിഡ് വാക്സിനേഷന് സര്ട്ടിഫിക്കറ്റ് നേടാം. +91 9013151515 എന്ന നമ്പര് നിങ്ങളുടെ ഫോണില് സേവ് ചെയ്യുക. 'കൊവിഡ് സര്ട്ടിഫിക്കറ്റ്' എന്ന് ആ നമ്പരിലേക്ക് വാട്ട്സ്ആപ്പില് സന്ദേശം അയക്കുക. പിന്നീട് ലഭിക്കുന്ന ഒ.ടി.പി എന്റര് ചെയ്യുക, നിങ്ങള്ക്ക് നിമിഷങ്ങള്ക്കുളളില് വാക്സിന് സര്ട്ടിഫിക്കറ്റ് ലഭിക്കും.
അതേസമയം ഈ പ്രക്രിയ പരീക്ഷിച്ച പലര്ക്കും തെറ്റായ ഫലങ്ങള് ലഭിച്ചതായി ദേശീയ മാദ്ധ്യമങ്ങള് റിപ്പോര്ട്ട് ചെയ്തു. രണ്ട് ഡോസുകള്ക്കും ഒരേ തീയതിയാണ് സര്ട്ടിഫിക്കറ്റില് സൂചിപ്പിച്ചതെന്നും രണ്ട് ഡോസ് ലഭിച്ചിട്ടും കുത്തിവയ്പ് എടുത്തിട്ടില്ലെന്ന് അറിയിച്ചതായും ചിലര് പറഞ്ഞതായി റിപ്പോര്ട്ടുകള് പറയുന്നു.
അതേസമയം, മന്ത്രാലയത്തിന്റെ ഈ നീക്കത്തെ അഭിനന്ദിച്ച് കോണ്ഗ്രസ് നേതാവ് ശശി തരൂര് എം.പി രംഗത്തെത്തി. 'അര്ഹിക്കുമ്പോള് ഞാന് എല്ലായ്പ്പോഴും കേന്ദ്രസര്ക്കാരിനെ അംഗീകരിക്കുകയും അഭിനന്ദിക്കുകയും ചെയ്യാറുണ്ട്. കോവിനെ നിരീക്ഷിക്കുന്ന ആളെന്ന നിലയില് ഞാന് പറയട്ടെ, അവര് മികച്ച ഒരു കാര്യം ചെയ്തു. 'ഡൗണ്ലോഡ് സര്ട്ടിഫിക്കറ്റ്' എന്നൊരു വാട്ട്സ്ആപ്പ് സന്ദേശം 9013151515 ലേക്ക് അയയ്ക്കുക. ഒ.ടി.പി സ്വീകരിച്ച് തിരികെ വാട്ട്സ്ആപ്പില്തന്നെ നിങ്ങളുടെ വാക്സിനേഷന് സര്ട്ടിഫിക്കറ്റ് നേടുക. ലളിതമായും വേഗത്തിലും' എന്നും തരൂര് ട്വീറ്റ് ചെയ്തു.
കോവിന് വെബ് സൈറ്റ് വഴിയും സര്ട്ടിഫിക്കറ്റ് ലഭിക്കുന്നതാണ്. ബാച്ച് നമ്പരുള്ള ഫൈനല് സര്ട്ടിഫിക്കറ്റ് ലഭിക്കാന് ഇങ്ങനെ ചെയ്യേണ്ടതാണ്.
വാക്സിന് നല്കിയ തീയതിയും ബാച്ച് നമ്പരും ഉള്ള ഫൈനല് സര്ട്ടിഫിക്കറ്റ് ലഭിക്കാന് കോവിന് വെബ്സൈറ്റിലെ (https://selfregistration.cowin.gov.in) ലിങ്കില് പോയി ഒ.ടി.പി. നമ്പര് നല്കി വെബ് സൈറ്റില് കയറുക. അപ്പോള് അക്കൗണ്ട് ഡീറ്റൈല്സില് രജിസ്റ്റര് ചെയ്തവരുടെ പേര് വിവരങ്ങള് കാണിക്കും. അതിന് വലതുവശത്തായി കാണുന്ന സര്ട്ടിഫിക്കറ്റ് ക്ലിക്ക് ചെയ്ത് സര്ട്ടിഫിക്കറ്റ് ഡൗണ്ലോഡ് ചെയ്യാവുന്നതാണ്. ഇതിന് മറ്റ് വിവരങ്ങള് നല്കേണ്ടതില്ല.
ഒരു മൊബൈല് നമ്പരില് നിന്നും 4 പേരെ രജിസ്റ്റര് ചെയ്യാന് സാധിക്കുന്നതാണ്. അതിനാല് നാലു പേരുടേയും വിവരങ്ങള് ഇതുപോലെ തിരുത്താനോ സര്ട്ടിഫിക്കറ്റ് ഡൗണ്ലോഡ് ചെയ്യാനോ സാധിക്കും.
സംശയങ്ങള്ക്ക് ദിശ 104, 1056 എന്നീ നമ്പരുകളില് ബന്ധപ്പെടാവുന്നതാണ്.
"
https://www.facebook.com/Malayalivartha
