നെടുങ്കണ്ടത്ത് യുവതി ശുചിമുറിയില്‍ തൂങ്ങിമരിച്ചത് ഭര്‍ത്തൃ വീട്ടിലെ മാനസിക പീഡനം കാരണമെന്ന് ബന്ധുക്കളുടെ ആരോപണം.... മരണത്തിലെ ദുരൂഹത നീക്കണമെന്ന് ആവശ്യപ്പെട്ട് ബന്ധുക്കള്‍ മുഖ്യമന്ത്രി, പൊലീസ് മേധാവി, വനിതാ കമ്മിഷന്‍ എന്നിവര്‍ക്ക് പരാതി നല്‍കി.

മാതാപിതാക്കള്‍ വിവാഹ മോചനം നേടിയതിനെ തുടര്‍ന്ന് അമ്മാവന്‍മാരുടെ സംരക്ഷണയിലാണ് ദേവിക വളര്‍ന്നത്. അഞ്ച് വര്‍ഷം മുമ്പായിരുന്നു വിവാഹം. ദേവികുളം സബ്ജയിലിലെ വാര്‍ഡനാണ് ഭര്‍ത്താവ് അര്‍ജുന്‍.

അര്‍ജുന്റെ സഹോദരന്റെ വിവാഹ ശേഷം വീട്ടില്‍ പലപ്പോഴും വഴക്കുണ്ടാകുമായിരുന്നെന്ന് ദേവിക ബന്ധുക്കളോട് പറഞ്ഞിരുന്നു. ഉയര്‍ന്ന സാമ്പത്തിക ശേഷിയുള്ള വീട്ടില്‍ നിന്നാണ് അര്‍ജുന്റെ സഹോദരന്‍ വിവാഹം കഴിച്ചത്.

ദേവികയെ വിവാഹം ചെയ്ത ശേഷമാണ് അര്‍ജുന് സര്‍ക്കാര്‍ സര്‍വീസില്‍ ജോലി ലഭിച്ചത്. പിന്നീടാണ് വഴക്കുകള്‍ ഉണ്ടായതെന്ന് ദേവിക ബന്ധുക്കളോട് പറഞ്ഞിരുന്നു.

കഴിഞ്ഞ ദിവസം രാത്രി ഭര്‍ത്താവും വീട്ടുകാരും ഉറങ്ങിയ സമയത്താണ് ദേവിക ആത്മഹത്യ ചെയ്തത്. രാത്രി 1.30ന് മരിച്ചിട്ടും ദേവികയുടെ ബന്ധുക്കള്‍ വിവരം അറിഞ്ഞത് 3.30നാണ്. അര്‍ജുന്റെ വീട്ടുകാര്‍ക്ക് പകരം മറ്റൊരു ബന്ധുവാണ് വിവരങ്ങള്‍ അറിയിച്ചത്.


പുലര്‍ച്ചെ 4.30 ആയപ്പോഴാണ് സ്വകാര്യ ആശുപത്രിയില്‍ എത്തി മൃതദേഹം കണ്ടത്. നേരം പുലരുന്നതിനു മുമ്പേ മൃതദേഹം തിടുക്കത്തില്‍ ഇടുക്കി മെഡിക്കല്‍ കോളജിലേക്ക് മാറ്റി. ആസൂത്രിത നീക്കം ഇതിനായി ഉണ്ടായെന്നും ബന്ധുക്കളും നാട്ടുകാരും ആരോപിച്ചു.




നിസാര പ്രശ്നങ്ങളുടെ പേരില്‍ ആത്മഹത്യ ചെയ്യുമെന്ന് ദേവിക പലപ്പോഴും പറഞ്ഞിട്ടുണ്ടെന്നാണ് ഭര്‍ത്താവ് അര്‍ജുന്‍ പറയുന്നത്. അപ്പോഴെല്ലാം താന്‍ സമാധാനിപ്പിച്ചിരുന്നു. സംഭവ ദിവസവും ആത്മഹത്യ ചെയ്യുമെന്ന് ഫോണില്‍ വിളിച്ചു പറഞ്ഞു. വീട്ടിലെത്തി ഇതേചൊല്ലി വഴക്കുണ്ടായി. വീട്ടിലെ കസേര തകര്‍ത്ത് ദേഷ്യം തീര്‍ത്തെങ്കിലും ദേവികയെ മര്‍ദ്ദിച്ചിട്ടില്ലെന്ന് അര്‍ജുന്‍ പറയുന്നു.

മര്‍ദ്ദനത്തിന്റെ ലക്ഷണങ്ങളൊന്നും ഇന്‍ക്വസ്റ്റില്‍ കണ്ടെത്തിയില്ലെന്ന് നെടുങ്കണ്ടം പൊലീസ് പറഞ്ഞു. വീട്ടില്‍ കണ്ടെത്തിയ രക്തം ദേവികയുടേതാണെന്നും ഇത് ആത്മഹത്യാ സമയത്ത് മൂക്കില്‍ നിന്ന് വന്നതാണെന്നും പൊലീസ് സ്ഥിരീകരിച്ചു.അന്വേഷണം ഊര്‍ജ്ജിതത്തിലാക്കി.