തിരുവനന്തപുരം വെഞ്ഞാറമൂട്ടിലെ ബ്ലോക്ക് കാരണം അമ്മയെ കാണാന്‍ കഴിഞ്ഞില്ലെന്ന് പറഞ്ഞ് പരിതപിച്ച ഗണേഷ് കുമാര്‍ സഭയില്‍ കയ്യടി നേടിയിരുന്നു. എന്നാല്‍ ആപത്ത് മണത്ത ധനമന്ത്രിയും കിഫ്ബിയും ഗണേഷ് കുമാറിനെതിരെ രംഗത്ത് വരികയായിരുന്നു. തുടര്‍ന്ന് സൈലന്റിലായ ഗണേഷ് കുമാറിന്റെ മറ്റൊരു വീഡിയോ വൈറലാകുകയാണ്.

കോവിഡ് കാലത്തു ലോറി ഡ്രൈവര്‍മാരെ മോട്ടര്‍ വാഹന വകുപ്പ് ഉദ്യോഗസ്ഥര്‍ നിരന്തരം ദ്രോഹിക്കരുതെന്നു കെ.ബി.ഗണേഷ്‌കുമാര്‍ എംഎല്‍എ. കൊല്ലം പത്തനാപുരത്ത് ടിപ്പര്‍ ലോറി ഡ്രൈവറോട് എംവിഐ മോശമായി പെരുമാറി വാഹനം പിടിച്ചെടുത്തെന്ന പരാതിയിലാണ് എംഎല്‍എയുടെ ഇടപെടല്‍. കൂടല്‍ ഇഞ്ചപ്പാറ സ്വദേശി സുമേഷിനാണ് കഴിഞ്ഞദിവസം പത്തനാപുരം മോട്ടര്‍ വെഹിക്കിള്‍ ഇന്‍സ്‌പെക്ടറുടെ ഭാഗത്തുനിന്നു ദുരനുഭവം ഉണ്ടായത്.

അമിതഭാരം കയറ്റിയതിന് ടിപ്പര്‍ ലോറി പിടിച്ചെടുക്കുകയും മോശമായി പെരുമാറുകയും ചെയ്‌തെന്നാണു പരാതി. വിഷയത്തില്‍ ഇടപെട്ട കെ.ബി. ഗണേഷ്‌കുമാര്‍ എംവിഐയെ ഫോണില്‍ വിളിച്ചു. കോവിഡ് കാലത്ത് ഡ്രൈവര്‍മാരെ നിരന്തരം ദ്രോഹിക്കരുതെന്ന് ആവശ്യപ്പെട്ടു. പിടിച്ചെടുത്ത വണ്ടി വിട്ടു കൊടുക്കാനും നിര്‍ദേശിച്ചു. ലോറിയിലെ അധിക ഭാരത്തിന്റെ പേരില്‍ കൊല്ലത്തുവച്ചു സുമേഷിന് 25,000 രൂപയുടെ പിഴ ലഭിച്ചതാണ്.

അഞ്ചു ദിവസത്തിന് ശേഷമാണ് പത്തനാപുരത്തുവച്ചു വീണ്ടും വണ്ടി പിടികൂടിയത്. വീണ്ടും പിഴ ഈടാക്കിയാല്‍ ജീവിക്കാന്‍ പറ്റാത്ത സ്ഥിതിയാകുമെന്ന് പറഞ്ഞപ്പോള്‍ എംവിഐ മോശമായി പെരുമാറിയെന്ന് സുമേഷ് പറഞ്ഞു. ലോറിയുടെ ടയറുകള്‍ നശിപ്പിച്ചതായും പരാതിയുണ്ട്. ഡ്രൈവര്‍മാരുടെയും ഉടമകളുടെയും കൂട്ടായ്മയും ഉദ്യോഗസ്ഥനെതിരെ പരാതിയുമായി രംഗത്തുവന്നിട്ടുണ്ട്.

മന്ത്രി ആന്റണി രാജു മുന്‍പാകെ വിഷയം ബോധിപ്പിക്കുമെന്ന് ഗണേഷ്‌കുമാര്‍ ഡ്രൈവര്‍മാര്‍ക്ക് ഉറപ്പ് നല്‍കി. മോശമായി പെരുമാറിയതിന് ഉദ്യോഗസ്ഥനെതിരെ സുമേഷ് പൊലീസിലും പരാതി നല്‍കി. അതേസമയം നിരന്തരം താക്കീതു ചെയ്തിട്ടും നിയമലംഘനം നടത്തിയതിനാണു വാഹനം പിടികൂടിയതെന്നാണ് എംവിഐയുടെ വിശദീകരണം.

കിഫ്ബി പദ്ധതികളില്‍ കാലതാമസം ഉണ്ടാകുന്നതിനെതിരെ കഴിഞ്ഞ ദിവസമാണ് നിയമസഭയില്‍ കെ.ബി. ഗണേഷ് കുമാറിന്റെ വൈകാരിക പ്രതികരണം ഉണ്ടായത്. 2017ല്‍ പത്തനാപുരം മണ്ഡലത്തില്‍ പ്രഖ്യാപിച്ച കിഫ്ബി റോഡുകളുടെ പണി പൂര്‍ത്തിയായിട്ടില്ലെന്നു വ്യക്തമാക്കുന്നതിനിടെയാണ് സംസ്ഥാന ഹൈവേയിലെ ഗതാഗതക്കുരുക്കിനെക്കുറിച്ച് സ്വന്തം അനുഭവം മുന്‍മന്ത്രി വൈകാരികമായി പങ്കുവച്ചത്.

അമ്മയ്ക്കു ഹൃദയാഘാതമുണ്ടായ വിവരമറിഞ്ഞ് കൊട്ടാരക്കരയിലേക്കു പുറപ്പെട്ടപ്പോള്‍ 20 മിനിറ്റ് വെഞ്ഞാറമൂട്ടില്‍ ഗതാഗതക്കുരുക്കില്‍ കുടുങ്ങിയെന്നും അവസാനമായി അമ്മയെ ജീവനോടെ കാണാനായില്ലെന്നും ഗണേഷ് കുമാര്‍ പറഞ്ഞു. വെഞ്ഞാറമൂട്ടിലെ മേല്‍പ്പാലത്തിന്റെ നിര്‍മാണം കിഫ്ബി തടഞ്ഞു. ഇതിനു കിഫ്ബിക്ക് എന്ത് അധികാരമെന്നും ഗണേഷ് കുമാര്‍ ചോദിച്ചു.

പത്തനാപുരത്ത് പ്രഖ്യാപിക്കപ്പെട്ട റോഡുകളുടെ പണി പൂര്‍ത്തിയായിട്ടില്ല. റീ ഷെഡ്യൂള്‍ ചെയ്ത് ടെന്‍ഡര്‍ മാറ്റിയതാണ് കാരണമായി പറയുന്നത്. തിരഞ്ഞെടുപ്പ് പ്രഖ്യാപനം വന്ന ശേഷം റോഡു പണി നിര്‍ത്തിവയ്ക്കാന്‍ കിഫ്ബി സ്‌റ്റോപ്പ് മെമ്മോ കൊടുത്തു എന്നും ഗണേഷ് കുമാര്‍ പറഞ്ഞു. ഇതിനെതിരെയാണ് ധനകാര്യ വകുപ്പ് മന്ത്രിയും കിഫ്ബിയും രംഗത്തെത്തിയത്.