ചലചിത്ര സീരിയല്‍ താരം ശരണ്യയുടെ മരണത്തിൽ വിഷമിച്ച് മുൻ ആരോഗ്യ മന്ത്രി കെ കെ ശൈലജ ടീച്ചർ. ഫെയ്‌സ്ബുക്ക് കുറിപ്പിലൂടെയാണ് തന്റെ സങ്കടം പങ്കു വച്ചത്. കുറിപ്പിന്റെ പൂർണ്ണ രൂപം ഇങ്ങനെ; ചലചിത്ര സീരിയല്‍ താരം ശരണ്യ ശശിയുടെ വിയോഗം ഏറെ വേദനാജനകമാണ്.

നിഷ്‌കളങ്കമായ ചിരികൊണ്ട് ഏവരെയും ആകര്‍ഷിക്കുന്ന വ്യക്തിത്വമാണ് ശരണ്യ. അര്‍ബുദത്തിന്റെ പിടിയിലായിരുന്നപ്പോഴും പ്രതീക്ഷയോടെ ജീവിതത്തിലെ വെല്ലുവിളികളോട് പൊരുതി അതിജീവനം അടയാളപ്പെടുത്തിയ ശരണ്യയുടെ ജീവിതം സമൂഹത്തില്‍ നിരവധി പേര്‍ക്ക് പ്രചോദനവും ശുഭാപ്തി വിശ്വാസവും നല്‍കി.

കേരളം പ്രളയക്കെടുതിയില്‍ അകപ്പെട്ട സമയത്ത് തന്റെ ചികിത്സയ്ക്കായി നീക്കിവച്ച തുകയില്‍ നിന്നും സര്‍ക്കാറിന്റെ പ്രളയപ്രതിരോധ പ്രവര്‍ത്തനങ്ങളിലേക്ക് സംഭാവന നല്‍കിയ ശരണ്യയുടെ സാമൂഹ്യ പ്രതിബദ്ധത സമൂഹത്തിനാകെ മാതൃകയാണ്.

മന്ത്രിയായിരുന്ന സമയത്ത് ശരണ്യയുടെ ചികിത്സയ്ക്ക് തുക ലഭ്യമാക്കിക്കൊണ്ട് സർക്കാരും ശരണ്യയുടെ അതിജീവന പോരാട്ടത്തിനൊപ്പം ചേർന്ന് നിന്നിരുന്നു. ശരണ്യയുടെ ബന്ധുക്കളുടെയും സുഹൃത്തുക്കളുടെയും ആരാധകരുടെയും ദു:ഖത്തിൽ പങ്കുചേരുന്നു.