മുംബൈ പോലീസിന് തങ്ങളോട് ഇത്രയും വിരോധമെന്തെന്നാണ് ശില്‍പ ഷെട്ടിയുടെ ചോദ്യം. അശ്ലീല ചിത്രം നിര്‍മിച്ചതിന്റെ പേരില്‍ അറസ്റ്റിലായ രാജ് കുന്ദ്രയ്ക്ക് ജാമ്യം ലഭിച്ചാല്‍ നീരവ് മോദിയെപ്പോലെ രാജ്യം വിട്ടേക്കുമെന്ന് മുംബൈ പോലീസ്.

കുന്ദ്രയ്ക്ക് ജാമ്യം നല്‍കുന്നതു സമൂഹത്തിന് തെറ്റായ സന്ദേശം നല്‍കുമെന്നും ജാമ്യാപേക്ഷയെ എതിര്‍ത്ത് മുംബൈ പൊലീസ് വ്യക്തമാക്കി. ജാമ്യം ലഭിച്ചാല്‍ കുറ്റം വീണ്ടും ചെയ്‌തേക്കുമെന്നും പൊലീസ് കോടതിയെ അറിയിച്ചു. അതേസമയം, കേസ് ഇനി ഓഗസ്റ്റ് 20ന് പരിഗണിക്കും.

കഴിഞ്ഞ മാസമാണ് കുന്ദ്രയെ അറസ്റ്റ് ചെയ്തത്. ഏപ്രിലില്‍ ഫയല്‍ ചെയ്ത എഫ്‌ഐആറില്‍ തന്റെ പേരില്ലായിരുന്നുവെന്നാണ് നിലവില്‍ ജുഡീഷ്യല്‍ കസ്റ്റഡിയില്‍ കഴിയുന്ന കുന്ദ്രയുടെ വാദം. അന്നത്തെ കുറ്റപത്രത്തില്‍ പേരുള്ളവര്‍ ഇപ്പോള്‍ ജാമ്യം നേടി പുറത്തു നടക്കുകയാണെന്നും കുന്ദ്ര കോടതിയില്‍ നല്‍കിയ ജാമ്യാപേക്ഷയില്‍ പറയുന്നു.

ഇതിനുള്ള മറുപടിയിലാണു ഗുരുതര സ്വഭാവമുള്ള കുറ്റകൃത്യമാണെന്നും എല്ലാ വിഡിയോകളും അപ്‌ലോഡ് ചെയ്തിട്ടുണ്ടോയെന്ന് പരിശോധിക്കുകയാണെന്നും മുംബൈ പൊലീസ് അറിയിച്ചത്. ജാമ്യം നേടിയാല്‍ കുന്ദ്ര വീണ്ടും ഇതേ കുറ്റം ചെയ്‌തേക്കാം. അതു നമ്മുടെ സംസ്‌കാരത്തെ ബാധിക്കും. സമൂഹത്തിനു തെറ്റായ സന്ദേശം നല്‍കും. കേസിലെ പ്രതിയും ഇപ്പോള്‍ ഒളിവില്‍ കഴിയുകയും ചെയ്യുന്ന പ്രദീപ് ബക്ഷിയുടെ ബന്ധു കൂടിയാണ് കുന്ദ്ര. അതിനാല്‍ കുന്ദ്ര പുറത്തുവന്നാല്‍ ഇരുവരും തമ്മില്‍ ബന്ധപ്പെടാനും ബക്ഷിയെ കേസില്‍നിന്നു രക്ഷിക്കാനുമുള്ള സാധ്യതയുണ്ടാകും. ബ്രിട്ടിഷ് പൗരന്‍ കൂടിയായ കുന്ദ്ര രക്ഷപ്പെടാനുള്ള സാധ്യതയുണ്ടെന്നും മുംബൈ പൊലീസ് കൂട്ടിച്ചേര്‍ത്തു.

സിനിമാ വ്യവസായവുമായി ബന്ധപ്പെട്ടയാള്‍ ആയതിനാല്‍ ജാമ്യം ലഭിച്ചാല്‍ വിഡിയോകള്‍ ഇന്ത്യയ്ക്കു പുറത്ത് അപ്‌ലോഡ് ചെയ്യാനുള്ള സാധ്യതയുണ്ട്. കേസിലെ ഇരകള്‍ സാമ്പത്തിക പരാധീനതയില്‍പ്പെട്ട സ്ത്രീകളാണ്. പ്രതി പുറത്തെത്തിയാല്‍ ഈ സ്ത്രീകള്‍ നിര്‍ണായക തെളിവുകള്‍ നല്‍കാന്‍ മുന്നോട്ടു വന്നെന്നിരിക്കില്ലെന്നും പൊലീസ് പറയുന്നു.

അതേസമയം ഭര്‍ത്താവ് രാജ് കുന്ദ്ര അശ്ലീല ചിത്ര നിര്‍മാണത്തിന് അറസ്റ്റിലായതിനു പിന്നാലെ ബോളിവുഡ് താരം ശില്‍പ ഷെട്ടിയും വിവാദത്തില്‍. വെല്‍നെസ് സെന്ററിന്റെ പേരില്‍ ഉത്തര്‍ പ്രദേശില്‍ തട്ടിപ്പു നടത്തിയതിനു ശില്‍പയ്ക്കും അമ്മ സുനന്ദ ഷെട്ടിക്കുമെതിരെ ലക്‌നൗ പൊലീസ് കേസെടുത്തു.

ഇരുവരെയും ചോദ്യം ചെയ്യാന്‍ പൊലീസ് സംഘം ഉടന്‍ മുംബൈയില്‍ എത്തുമെന്നാണു റിപ്പോര്‍ട്ടുകള്‍. ഇയോസിസ് വെല്‍നെസ് സെന്റര്‍ എന്ന പേരില്‍ ഫിറ്റ്‌നെസ് ഷോപ്പുകളുടെ ശ!!ൃംഖല ശില്‍പ നടത്തുന്നുണ്ടെന്നാണു പൊലീസ് റിപ്പോര്‍ട്ട്. ശില്‍പ, കമ്പനിയുടെ ചെയര്‍മാനും അമ്മ സുനന്ദ ഡയറക്ടറുമാണ്. വെല്‍നെസ് സെന്റര്‍ തുറക്കുന്നതിനായി 2 പേരുടെ കയ്യില്‍നിന്നു കോടിക്കണക്കിനു രൂപ വാങ്ങിയതിനു ശേഷം വഞ്ചിച്ചു എന്നതാണ് ഇരുവര്‍ക്കും എതിരെയുള്ള കുറ്റം.

തട്ടിപ്പിന് ഇരയായെന്നു കാട്ടി രണ്ടു പരാതികളാണു ലഭിച്ചിരിക്കുന്നത്. ശില്‍പയെയും അമ്മയെയും ചോദ്യം ചെയ്യുന്നതിനായുള്ള നോട്ടിസ് പൊലീസ് അയച്ചു. അന്വേഷണത്തിന്റെ ചുമതലയുള്ള ഉദ്യോഗസ്ഥന്‍ ഇരുവരെയും ചോദ്യം ചെയ്യാന്‍ മുംബൈയ്ക്കു പോകുമെന്നു ഡിസിപി സഞ്ജീവ് സുമന്‍ സ്ഥിരീകരിച്ചു.