അഫ്ഗാനിസ്ഥാനില്‍ താലിബാന്‍ ആധിപത്യം സ്ഥാപിച്ചതോടെ കാബൂളില്‍ കുടുങ്ങിയ സ്ത്രീകളും കുട്ടികളും ഉള്‍പ്പെടെ 41 മലയാളികളെ സുരക്ഷിതരായി നാട്ടില്‍ എത്തിക്കണമെന്ന് കേന്ദ്രത്തോട് സംസ്ഥാന സര്‍ക്കാര്‍.

മുഖ്യമന്ത്രിയുടെ നിര്‍ദ്ദേശപ്രകാരം ഇതുസംബന്ധിച്ച് നോര്‍ക്ക പ്രിന്‍സിപ്പല്‍ സെക്രട്ടറി ഡോ. കെ. ഇളങ്കോവന്‍, വിദേശകാര്യ സെക്രട്ടറി സഞ്ജയ് ഭട്ടാചാര്യയ്ക്ക് കത്തയച്ചു. അതേസമയം, അഫ്ഗാനിസ്ഥാനിലെ ഇന്ത്യന്‍ അംബാസഡര്‍ രുദ്രേന്ദ ടാണ്ഠന്‍ അടക്കം 130 ഇന്ത്യക്കാരെ അമേരിക്കന്‍ സഹായത്തോടെ രക്ഷപ്പെടുത്തി ഇന്നലെ ഡല്‍ഹിയില്‍ എത്തിച്ചു.




കാബൂളിലെ അതിസുരക്ഷയുള്ള ഗ്രീന്‍ സോണിലെ ഇന്ത്യന്‍ എംബസിയില്‍ നിന്ന് രുദ്രേന്ദ ടാണ്ഠനെയും ജീവനക്കാരെയും ഇന്നലെ പുലര്‍ച്ചെയാണ് വിമാനത്താവളത്തില്‍ എത്തിച്ചത്.

15 ഇടങ്ങളില്‍ താലിബാന്‍ പരിശോധന ഉണ്ടായിരുന്നു.കാബൂളിലെ വിവിധ കമ്പനികളില്‍ ജോലി ചെയ്തവരും കുടുംബാംഗങ്ങളുമാണ് കുടുങ്ങിയ മലയാളികള്‍. താലിബാന്‍ തങ്ങളുടെ വിവരങ്ങള്‍ ശേഖരിച്ചതായും പാസ്‌പോര്‍ട്ട് അടക്കമുള്ള രേഖകള്‍ പിടിച്ചെടുത്തതായും നോര്‍ക്കയിലേക്ക് വിളിച്ചവര്‍ അറിയിച്ചു.

കുടുങ്ങിയവരെ അമേരിക്കന്‍ സൈന്യത്തിന്റെ സഹായത്തോടെ കാബൂള്‍ വിമാനത്താവളത്തില്‍ എത്തിച്ച് പ്രത്യേക വിമാനത്തില്‍ നാട്ടിലെത്തിക്കുമെന്നാണ് വിവരം.


അഫ്ഗാനിസ്ഥാനിലെ സ്ഥിതി വിലയിരുത്താന്‍ പ്രധാനമന്ത്രി നരേന്ദ്രമോദി ഇന്നലെ കേന്ദ്ര മന്ത്രിസഭയുടെ സുരക്ഷാ സമിതി യോഗം വിളിച്ചു. അഫ്ഗാനിലെ പുതിയ സാഹചര്യങ്ങളും അത് ദേശീയ സുരക്ഷയ്ക്കുണ്ടാക്കുന്ന ഭീഷണിയും യോഗം ചര്‍ച്ച ചെയ്തു.

അതേസമയം കാബൂളിലെ ഇന്ത്യന്‍ എംബസി പൂര്‍ണമായി അടച്ചിട്ടില്ല. പ്രാദേശിക ജീവനക്കാരെ വച്ച് എംബസി പ്രവര്‍ത്തിപ്പിക്കുമെന്ന് കേന്ദ്രസര്‍ക്കാര്‍ വ്യക്തമാക്കി. ഇന്ത്യയിലേക്ക് മടങ്ങാനുള്ള നിരവധി പേരുടെ അപേക്ഷകള്‍ എംബസിയില്‍ ലഭിക്കുന്നുണ്ടെന്നും കേന്ദ്രം അറിയിച്ചു.