ശബരിമല വിഷയം ഇപ്പോള്‍ ശാന്തമാണ്. തടയാന്‍ ആരുമില്ലെങ്കിലും ഒരാള്‍ക്കും ഇപ്പോള്‍ ശബരിമലയില്‍ സ്ത്രീകളെ കയറ്റേണ്ട. എന്നാല്‍ ഇപ്പോഴും ശബരിമലയുടെ പേര് പറഞ്ഞ് പരിഹാസം നേടുന്നുവെന്ന പരാതിയുമായി ആക്ടിവിസ്റ്റ് ബിന്ദു അമ്മിണി

ബസ് ഡ്രൈവറില്‍ നിന്നും മോശം പെരുമാറ്റം ഉണ്ടായാതായാണ് പോലീസില്‍ നല്‍കിയ പരാതിയില്‍ പറയുന്നത്. കണ്ണൂര്‍ കോഴിക്കോട് റൂട്ടില്‍ ഓടുന്ന ബസില്‍ ഞായറാഴ്ച രാത്രിയാണ് പരാതിക്കിടയായ സംഭവം നടന്നത്. രാത്രി 8 മണിയോടെ കോഴിക്കോട് പൊയില്‍ക്കാവ് നിന്നും ബസ് കയറിയ തന്നെ ബസ് ഡ്രൈവര്‍ ശബരിമലയുടെ പേര് പറഞ്ഞ് പരിഹസിച്ചെന്നും അശ്ലീല ചുവയോടെ സംസാരിച്ചെന്നും നടക്കാവ് പോലീസ് സ്‌റ്റേഷനില്‍ നല്‍കിയ പരാതിയില്‍ ബിന്ദു പറയുന്നു. തനിക്ക് ഇറങ്ങേണ്ടിയിരുന്ന വെസ്റ്റ്ഹില്‍ ബസ് സ്‌റ്റോപ്പില്‍ ബസ് നിര്‍ത്തിയില്ലെന്നും ബിന്ദു ആരോപിക്കുന്നു.

കണ്ണൂര്‍ കോഴിക്കോട് റൂട്ടിലെ ലിമിറ്റഡ് സ്‌റ്റോപ്പ് ബസുകളില്‍ നിന്നും തനിക്ക് മുന്‍പും മോശം അനുഭവങ്ങള്‍ ഉണ്ടായിട്ടുണ്ടെന്ന് ബിന്ദു അമ്മിണി തന്റെ ഫേസ്ബുക്ക് പോസ്റ്റിലൂടെ പറഞ്ഞു. 'സംഘികളായിട്ടുള്ള ഡ്രൈവര്‍മാരില്‍ നിന്ന് ഒരുപാട് പ്രശ്‌നങ്ങള്‍ മുന്‍പും ഉണ്ടായിട്ടുണ്ട്. ഈ ബസിലെ ഡ്രൈവറുടെ കൈയില്‍ രാഖിയുണ്ട്. കണ്ടക്ടറുടെ നെറ്റിയില്‍ കുറിയും ഉണ്ടായിരുന്നു. അവര്‍ സംഘപരിവാര്‍ അനുഭാവമുള്ള ആളുകളാണെന്ന് എനിക്ക് ആദ്യമേ തോന്നിയിരുന്നു'. എന്നാണ് നടക്കാവ് പോലീസ് സ്‌റ്റേഷനില്‍ നിന്നെടുത്ത വീഡിയോയില്‍ ബിന്ദു വ്യക്തമാക്കി.

സുപ്രീംകോടതിയുടെ പ്രൊട്ടക്ഷന്‍ ഉത്തരവ് ഉള്ളയാളാണ് താനെന്നും എന്നാല്‍ താന്‍ ദളിത് ആയതിന്റെ പേരില്‍ കേരള പോലീസ് സംരക്ഷണം നല്‍കാതിരിക്കുകയാണെന്നും ബിന്ദു ആരോപിച്ചു. ഇത്തരത്തില്‍ തനിക്ക് അനീതി നേരിടേണ്ടി വന്നപ്പോഴും സഹയാത്രക്കാരായ ആളുകള്‍ തന്നെ പിന്തുണച്ചില്ലെന്നും താന്‍ ശബ്ദമുയര്‍ത്തി സംസാരിച്ചപ്പോള്‍ സ്ത്രീകള്‍ ഇങ്ങനെയല്ല എന്നാണ് അവര്‍ പറഞ്ഞതെന്നും ബിന്ദു അമ്മിണി പറയുന്നു. െ്രെഡവര്‍ മോശം വാക്കുകള്‍ ഉപയോഗിച്ചതായും ബിന്ദു പറഞ്ഞു.

പിന്നീട് വെസ്റ്റ്ഹില്‍ എത്തിയപ്പോള്‍ ഇറങ്ങണം എന്ന് ആവശ്യപ്പെട്ടിട്ടും ബസ് നിര്‍ത്താതെ വളരെ ദൂരം കഴിഞ്ഞാണ് നിര്‍ത്തിയതെന്നും ബിന്ദു പറഞ്ഞു. താന്‍ ഒരു സ്ത്രീയാണ്, രാത്രി ഒറ്റയ്ക്കാണ് എന്ന് പറഞ്ഞിട്ടും ബസ് നിര്‍ത്താന്‍ ഡ്രൈവര്‍  തയാറായില്ലെന്നും തന്നെ ഒരു സ്ത്രീയായി കണക്കാക്കാന്‍ കഴിയില്ല എന്ന് അവര്‍ പറഞ്ഞതായും ബിന്ദു ആരോപിച്ചു.

ഞായറാഴ്ച രാത്രി ഏകദേശം എട്ടു മണിയോടെ പൊയില്‍ക്കാവ് സ്‌റ്റോപ്പില്‍ നിന്നും സെയിന്‍ എന്ന ബസില്‍ കയറി. KL 46 M 3355 എന്ന നമ്പറിലുള്ള ബസിന്റെ ഡ്രൈവര്‍ കയ്യില്‍ രാഖി ഒക്കെ കെട്ടിയ ഒരാള്‍ ആയിരുന്നു. ഞാന്‍ കയറിയപ്പോള്‍ തന്നെ അയാള്‍ എന്നെ ശ്രദ്ധിച്ചിരുന്നു. വെങ്ങളം എത്തിയപ്പോള്‍ രണ്ടു യാത്രക്കാര്‍ എന്റെ സീറ്റിന് സമീപം വന്നിരുന്നു. ഡ്രൈവര്‍ അസ്ഥാനത്ത് അവരോടെന്ന പോലെ ഒരു ചോദ്യം. 'ഈ വര്‍ഷവും ശബരിമല പോകുന്നോ?' ചോദ്യം പരിഹാസത്തോടെ. എന്നിട്ട് അശ്ലീല ചുവയോടെ എന്നെ ഒരു നോട്ടവും.

അത് കഴിഞ്ഞു വെസ്റ്റ് ഹില്‍ എത്തിയപ്പോഴാണ് പ്രശ്‌നം ഉണ്ടാവുന്നത്. ഇറങ്ങണം എന്നു പറഞ്ഞിട്ടും ബസ് നിര്‍ത്താതെ വളരെ ദൂരം കഴിഞ്ഞാണ് ബസ് നിര്‍ത്താന്‍ ഡ്രൈവര്‍ തയ്യാറായത്. അതിനിടയില്‍ എന്നെ അയാള്‍ തെറിയും പറഞ്ഞു. ഡ്രൈവര്‍ക്കെതിരെ ഞാന്‍ നടക്കാവ് പോലീസ് സ്‌റ്റേഷനില്‍ പരാതി നല്‍കിയിട്ടുണ്ടെന്നും ബിന്ദു ഫേസ്ബുക്കില്‍ കുറിച്ചു. സംഭവത്തിന്റെ ദൃശ്യങ്ങള്‍ സഹിതമാണ് ബിന്ദു പേസ്റ്റിട്ടിരിക്കുന്നത്.