സുരേഷ് ഗോപി ബിജെപി സംസ്ഥാന അധ്യക്ഷനാകുമെന്ന തരത്തിലുള്ള ശക്തമായ ചര്‍ച്ചകളാണ് നടക്കുന്നത്. അതനുസരിച്ച് കേരളത്തില്‍ സുരേഷ് ഗോപി സജീവമാകുകയാണ്. എന്നാല്‍ ഇതറിഞ്ഞ് സംസ്ഥാന അദ്ധ്യക്ഷന്‍ കെ. സുരേന്ദ്രന്‍ ഡല്‍ഹിയില്‍ പാഞ്ഞെത്തി എല്ലാം തള്ളുകയാണ്.

ബി.ജെ.പി സംസ്ഥാന ഘടകത്തില്‍ നേതൃമാറ്റം ഉണ്ടാകുമെന്ന വാര്‍ത്തകള്‍ കെ. സുരേന്ദ്രന്‍ തള്ളി. അദ്ധ്യക്ഷനെ മാറ്റാന്‍ നീക്കം നടക്കുന്നതായുള്ള വാര്‍ത്തകള്‍ അഭ്യൂഹം മാത്രമാണ്. അതു സംബന്ധിച്ച് തനിക്ക് വിവരമൊന്നുമില്ലെന്നും സുരേന്ദ്രന്‍ ഡല്‍ഹിയില്‍ പറഞ്ഞു.

സംഘടനാ സംവിധാനം ശക്തിപ്പെടുത്താനുള്ള നടപടികള്‍ തുടരുകയാണ്. മഞ്ചേശ്വരത്ത് സ്ഥാനാര്‍ത്ഥിത്വം പിന്‍വലിക്കാന്‍ നിര്‍ബന്ധിച്ചെന്ന കേസില്‍ പൊലീസ് കള്ളമൊഴിയാണ് രേഖപ്പെടുത്തിയത്. പൊലീസ് അവകാശപ്പെടുന്നത് പോലെ ഒരു ഫോണ്‍ ഇല്ല. പാലാ ബിഷപ്പിന്റ വിവാദ പരാമര്‍ശവുമായി ബന്ധപ്പെട്ട് മുസ്‌ളിം സംഘടനകള്‍ വിവാദ ആരോപണങ്ങളാണ് ഉന്നയിക്കുന്നത്.

അതേസമയം ആറ് മാസത്തിനുള്ളില്‍ സംസ്ഥാന ബി ജെ പിയില്‍ അഴിച്ചുപണിയ്ക്ക് സാദ്ധ്യതയെന്നാണ് റിപ്പോര്‍ട്ട്. സംസ്ഥാന നേതൃത്വത്തിനെതിരെ സമീപകാലത്തുയര്‍ന്ന വിവാദങ്ങളുടെ പശ്ചാത്തലത്തിലാണ് നടപടിയെന്നാണ് പുറത്തുവരുന്ന റിപ്പോര്‍ട്ടുകള്‍.

സുരേഷ് ഗോപി എംപി പാര്‍ട്ടിയെ നയിക്കുമെന്ന് അഭ്യൂഹങ്ങളുണ്ട്. മികച്ച നേതാക്കളില്ലാത്തതും, അധികാരത്തിലെത്തുമെന്നുള്ള പ്രതീക്ഷ നല്‍കാന്‍ പറ്റാത്തതുമാണ് മറ്റു പാര്‍ട്ടികളില്‍ നിന്നുള്ള നേതാക്കള്‍ക്ക് ബി ജെ പിയിലേക്ക് വരുന്നതിനുള്ള തടസമെന്ന ആര്‍ എസ് എസ് കേന്ദ്ര നേതൃത്വത്തെ അറിയിച്ചിരുന്നു. ആളുകളെ അകര്‍ഷിക്കാന്‍ സുരേഷ്‌ഗോപിയ്ക്ക് കഴിയുന്നുണ്ടെന്നാണ് കേന്ദ്ര നേതൃത്വത്തിന്റേയും വിലയിരുത്തല്‍.

അടുത്തിടെയായി പൊതുപരിപാടികളിലും മറ്റുമുള്ള സുരേഷ് ഗോപിയുടെ സാന്നിദ്ധ്യമാണ് പാര്‍ട്ടിയെ നയിക്കാന്‍ അദ്ദേഹം എത്തുമെന്നുള്ള അഭ്യൂഹങ്ങള്‍ക്ക് ആക്കം കൂട്ടുന്നത്. കേന്ദ്ര നേതൃത്വത്തിന്റെ നിര്‍ദേശ പ്രകാരമാണ് സുരേഷ് ഗോപി കഴിഞ്ഞ ദിവസം പാല ബിഷപ്പിനെ സന്ദര്‍ശിച്ചതെന്നും സൂചനയുണ്ട്.

ക്രൈസ്തവ സമുദായത്തെ ഒപ്പം നിര്‍ത്താനുള്ള നടപടികള്‍ ഊര്‍ജിതമാക്കാനാണ് സുരേഷ് ഗോപിയ്ക്ക് കേന്ദ്ര നേതൃത്വം നല്‍കിയ നിര്‍ദേശം. അതേസമയം തത്കാലം പാര്‍ട്ടി പ്രവര്‍ത്തകനായി തുടരാനാണ് താത്പര്യമെന്നാണ് സുരേഷ് ഗോപിയുടെ പ്രതികരണം.

അതേസമയം ബി ജെ പി സംസ്ഥാന അദ്ധ്യക്ഷനാകുമെന്ന അഭ്യൂഹം തള്ളി സുരേഷ് ഗോപി നേരത്തെ രംഗത്തെത്തിയിരുന്നു. കേട്ടതൊന്നും ശരിയല്ലെന്നും തത്കാലം പാര്‍ട്ടി പ്രവര്‍ത്തകനായി തുടരാനാണ് താത്പര്യമെന്നും അദ്ദേഹം വ്യക്തമാക്കി.

അതേസമയം പ്രൊഫസര്‍ ടിജെ ജോസഫിന് ഉന്നത പദവി നല്‍കാന്‍ കേന്ദ്ര സര്‍ക്കാര്‍ നീക്കം നടക്കുകയാണ്. ദേശീയ ന്യൂനപക്ഷ കമ്മീഷന്‍ അംഗമാക്കാനാണ് ആലോചന. അതിലും സുരേഷ് ഗോപിയെയാണ് നിയോഗിച്ചത്. ഇന്നലെ സുരേഷ് ഗോപി പ്രൊഫസര്‍ ടിജെ ജോസഫിനെ സന്ദര്‍ശിച്ചു. എന്നാല്‍ എംപിയുടെ സന്ദര്‍ശനം സൗഹാര്‍ദ്ദപരം മാത്രമാണെന്നാണ് ജോസഫിന്റെ പ്രതികരണം. ഇനി ഒരുപാട് നല്ല കാര്യങ്ങള്‍ സംഭവിക്കട്ടെയെന്ന് പ്രൊഫസറിനെ ആശംസിച്ചാണ് സുരേഷ് ഗോപി എംപി മടങ്ങിയത്.

സംസ്ഥാനത്തെ മതതീവ്രവാദ പ്രവര്‍ത്തനത്തിന്റെ ഏറ്റവും ഭീകരമായ സംഭവമായിരുന്നു ജോസഫ് മാഷിന്റെ അനുഭവം. നാര്‍കോടിക് ജിഹാദ് വിവാദം കത്തിനില്‍ക്കുമ്പോള്‍ ജോസഫ് മാഷിന്റെ അനുഭവം വളരെയേറെ ചര്‍ച്ച ചെയ്യപ്പെട്ടിരുന്നു. ഈ സാഹചര്യത്തിലാണ് ബിജെപിയുടെ രാഷ്ട്രീയ നീക്കം. പ്രൊഫസര്‍ ടിജെ ജോസഫ് നിയമനം സ്വീകരിക്കാന്‍ താത്പര്യം അറിയിച്ചതായാണ് വിവരം. ഇക്കാര്യം സുരേഷ് ഗോപി എംപി കേന്ദ്രസര്‍ക്കാരിനെ അറിയിക്കും. ഇങ്ങനെ സുരേഷ് ഗോപി കത്തിക്കയറുമ്പോഴാണ് സുരേന്ദ്രന്റെ ഡല്‍ഹി സന്ദര്‍ശനം.