കഴിഞ്ഞ ദിവസമാണ് ബ്ലാക്ക് ഫംഗസ് ബാധിച്ച്‌ വണ്ടൂര്‍ സ്വദേശി മരിച്ച റിപ്പോർട്ടുകൾ പുറത്ത് വന്നത്. ഇപ്പോഴിതാ സംഭവത്തില്‍ ഡോക്ടര്‍മാരുടെ അനാസ്ഥ ആരോപിച്ച്‌ ബന്ധുക്കള്‍ രംഗത്ത് ത്തിയിരിക്കുകയാണ്. കോവിഡ് ബാധിച്ച്‌ മഞ്ചേരി മെഡിക്കല്‍ കോളേജില്‍ പ്രവേശിപ്പിച്ച ഇദ്ദേഹം ഈ മാസം പതിനാറിന്‌ കോവിഡ് നെഗറ്റീവായതായി കണ്ടെത്തിയിരുന്നു. എന്നാല്‍ ഇതിനു പിന്നാലെ കണ്ണിനു ചൊറിച്ചിലും നിറംമാറ്റവും വീക്കവും കണ്ടെത്തിയെങ്കിലും പ്രമേഹം മൂര്‍ച്ഛിച്ചതാണെന്ന് ഡോക്ടര്‍മാർ മറുപടി നൽകുകയായിരുന്നു.

അതോടൊപ്പം തന്നെ വണ്ടൂര്‍ കുറ്റിയില്‍ കാരക്കപ്പറമ്പ് റോഡിലെ മുണ്ടാണിയില്‍ വാലഞ്ചേരി അഹമദ്കുട്ടിയുടെ മരണവുമായി ബന്ധപ്പെട്ടാണ് മഞ്ചേരി മെഡിക്കല്‍ കോളേജ് ആശുപത്രി അധികൃതര്‍ക്കെതിരേ ആരോപണങ്ങളുമായി ഇദ്ദേഹത്തിന്റെ ബന്ധുക്കൾ രംഗത്ത് എത്തിയിരിക്കുന്നത്. ഇദ്ദേഹത്തിന് ദിവസം ചെല്ലുന്തോറും കാഴ്ചശക്തി നഷ്ടപ്പെട്ടുതുടങ്ങിയിരുന്നു. ഇതു ശ്രദ്ധയില്‍പ്പെടുത്തിയപ്പോഴും ഗൗരവമായി പരിഗണിക്കാന്‍പോലും തയ്യാറാകാതെ തുള്ളിമരുന്നു മാത്രമാണ് നല്കിയത് എന്നും ബദുക്കൾ ആരോപിച്ചു. ഇതുസംബന്ധിച്ച പരാതി ആരോഗ്യവകുപ്പ് മന്ത്രിയടക്കമുള്ളവര്‍ക്ക് നല്കുമെന്നും ഇവര്‍ പറയുകയുണ്ടായി.

അതേസമയം കഴിഞ്ഞ ദിവസം കേരളത്തിൽ 19,675 പേര്‍ക്ക് കോവിഡ്-19 സ്ഥിരീകരിച്ചു. എറണാകുളം 2792, തിരുവനന്തപുരം 2313, തൃശൂര്‍ 2266, കോഴിക്കോട് 1753, കോട്ടയം 1682, മലപ്പുറം 1298, ആലപ്പുഴ 1256, കൊല്ലം 1225, പാലക്കാട് 1135, പത്തനംതിട്ട 1011, കണ്ണൂര്‍ 967, ഇടുക്കി 927, വയനാട് 738, കാസര്‍ഗോഡ് 312 എന്നിങ്ങനേയാണ് ജില്ലകളില്‍ ഇന്ന് രോഗ ബാധ സ്ഥിരീകരിച്ചത്.

കഴിഞ്ഞ 24 മണിക്കൂറിനിടെ 1,19,594 സാമ്പിളുകളാണ് പരിശോധിച്ചത്. പ്രതിവാര ഇന്‍ഫെക്ഷന്‍ പോപ്പുലേഷന്‍ റേഷ്യോ (WIPR) പത്തിന് മുകളിലുള്ള 422 തദ്ദേശ സ്വയംഭരണ പ്രദേശങ്ങളിലായി 841 വാര്‍ഡുകളാണുള്ളത്. ഇവിടെ കര്‍ശന നിയന്ത്രണമുണ്ടാകും.

സംസ്ഥാനത്തെ വിവിധ ജില്ലകളിലായി 4,81,195 പേരാണ് ഇപ്പോള്‍ നിരീക്ഷണത്തിലുള്ളത്. ഇവരില്‍ 4,57,822 പേര്‍ വീട്/ഇന്‍സ്റ്റിറ്റിയൂഷണല്‍ ക്വാറന്റൈനിലും 23,373 പേര്‍ ആശുപത്രികളിലും നിരീക്ഷണത്തിലാണ്. 1701 പേരെയാണ് പുതുതായി ആശുപത്രിയില്‍ പ്രവേശിപ്പിച്ചത്. നിലവില്‍ 1,61,026 കോവിഡ് കേസുകളില്‍, 13.3 ശതമാനം വ്യക്തികള്‍ മാത്രമാണ് ആശുപത്രി/ഫീല്‍ഡ് ആശുപത്രികളില്‍ പ്രവേശിപ്പിക്കപ്പെട്ടിട്ടുള്ളത്.

കഴിഞ്ഞ ദിവസങ്ങളിലുണ്ടായ 142 മരണങ്ങളാണ് കോവിഡ്-19 മൂലമാണെന്ന് ഇന്ന് സ്ഥിരീകരിച്ചത്. ഇതോടെ ആകെ മരണം 24,039 ആയി. രോഗം സ്ഥിരീകരിച്ചവരില്‍ 52 പേര്‍ സംസ്ഥാനത്തിന് പുറത്ത് നിന്നും വന്നവരാണ്. 18,924 പേര്‍ക്ക് സമ്പര്‍ക്കത്തിലൂടെയാണ് രോഗം ബാധിച്ചത്. 595 പേരുടെ സമ്പര്‍ക്ക ഉറവിടം വ്യക്തമല്ല. 104 ആരോഗ്യ പ്രവര്‍ത്തകര്‍ക്കാണ് രോഗം ബാധിച്ചത്.