മാന്ദ്യത്തിലായിരുന്ന ട്രോള്‍ വിപണി മോന്‍സന്‍ മാവുങ്കലിന്റെ അറസ്റ്റോടെ സജീവമായിരിക്കുകയാണ്. മോന്‍സണുമായി ബന്ധപ്പെട്ട ട്രോളാണ് എവിടയും. മോശയുടെ വടിയും ഹനുമാന്റെ ഗദയും ഒന്നും വേണ്ട, വെള്ളം വീഞ്ഞാക്കുന്ന ഭരണിയുണ്ടോ അതു പറ...! എന്നുവരെ പോകുന്നു ട്രോള്‍.

തിരുകേശവും തിരുശേഷിപ്പും യേശുവിന്റെ കച്ചയും അയ്യപ്പന്‍ പാലിനു കൊണ്ടുവന്ന പുലിയുടെ കാല്‍പാദം പതിഞ്ഞ പാറയുമൊക്കെ തൊട്ടുതൊഴുതുകൊണ്ടിരുന്നവര്‍ ശിവന്റെയും പാര്‍വതിയുടെയും കല്യാണ ആല്‍ബം കാണുന്ന ബെഹ്‌റയേയും യേശുക്രിസ്തുവിനെ കുരിശില്‍ തറച്ച ആണിയേയും പാപിനിയായ സ്ത്രീയെ ആദ്യമെറിഞ്ഞ കല്ലിനെയും ട്രോളി രസിക്കുന്നു. യേശുവിനെ ഒറ്റിക്കൊടുത്ത വെള്ളിനാണയം മടിയൊന്നുമില്ലാതെ കുഞ്ഞാടുകള്‍ ഷെയര്‍ ചെയ്യുന്നു. മഹാവിഷ്ണുവിന്റെ സുദര്‍ശനചക്രത്തിന്റെ സ്‌പെയറും സാമൂഹികമാധ്യമങ്ങളില്‍ പറന്നുനടക്കുന്നു.

മറ്റൊരു കഥാപാത്രം മോന്‍സണു സിംഹാസനം ഉണ്ടാക്കിക്കൊടുത്ത തങ്കപ്പനാശാരിയാണ്. ടിപ്പുവിന്റെ സിംഹാസനമാണെന്നു പറഞ്ഞ് കയറിയിരിക്കുന്ന മുന്‍ ഡി.ജി.പി. ലോകനാഥ് ബെഹ്‌റയെ കണ്ടിട്ട് ചിരിയടക്കാന്‍ കഴിയുന്നില്ല അത് 750 രൂപയ്ക്ക് പണിതുകൊടുത്ത തങ്കപ്പനാശാരിക്ക്. ടിപ്പു ഒഴികെ എല്ലാവരും ആ സിംഹാസനത്തില്‍ ഇരുന്നിട്ടുണ്ടെന്നു മറ്റൊരു ട്രോളന്‍.

മഹാബലിയെ ചവിട്ടിത്താഴ്ത്തും മുമ്പ് വാമനന്‍ ഊരിവച്ച മെതിയടിക്കു വെറും അഞ്ചുകോടി രൂപയേയുള്ളൂ! പരശുരാമന്‍ യുദ്ധം ചെയ്ത് ബോറടിച്ചപ്പോള്‍ കടലിലേക്കു വലിച്ചെറിഞ്ഞ കോടാലിക്ക് 17,65,999 രൂപ മാത്രം. അലക്‌സാണ്ടര്‍ ചക്രവര്‍ത്തിയുടെ രണ്ട് തലയോടാണ് ഒരാള്‍ വില്‍പ്പനയ്ക്ക് വച്ചിരിക്കുന്നത്. ചക്രവര്‍ത്തി സ്‌കൂളില്‍ പഠിച്ചിരുന്നപ്പോഴുള്ള തലയോടിന് ഒരുകോടിയാണ് വില. വളര്‍ന്നപ്പോഴുള്ള തലയോട്ടിക്കു മൂന്നുകോടി. ഈ ട്രോളുണ്ടാക്കിയവന്റെ തല സമ്മതിക്കാതെവയ്യ.




നാടോടിക്കാറ്റിലെ പ്രശസ്തമായ ആ ഡയലോഗിന് പറ്റിയ ട്രോള്‍ റീമേക്ക് ചെയ്തിട്ടുണ്ട്. നീ കാറ്റ് കുത്തിവിട്ടതു നന്നായി അല്ലേല്‍ ഞാന്‍ ഒറ്റയ്ക്കായി പോയേനേ.. എന്ന് രാംദാസ് വിജയനോടു പറഞ്ഞത് ട്രോളന്മാര്‍ മാറ്റിയതിങ്ങനെ: നീയും മോന്‍സന്റെ അടുത്ത് പോയതു നന്നായി. ഇല്ലേല്‍ ഞാന്‍ ഒറ്റക്കായി പോയേനേ...

ചോദ്യം ചെയ്യലില്‍ മോന്‍സന്‍ മാവുങ്കലിനെ വെളിപ്പെടുത്തലുകള്‍ കേട്ട് അന്തം വിട്ടല്ല ക്രൈം ബ്രാഞ്ച് ഓഫിസര്‍മാര്‍ ഇരിക്കുന്നത്, മാറി നിന്ന് ചിരിക്കുകയാണത്രെ. എന്തിനാണ് ഇതൊക്കെ പറഞ്ഞ് ആള്‍ക്കാരെ പറ്റിക്കുന്നതെന്ന് ചോദിച്ചാല്‍, ഞാന്‍ ഇങ്ങനെ തള്ളല്‍ നടത്തിയാണ് ജീവിക്കുന്നത്, ഇത്രയും നാളും ജീവിച്ചത്. ഞാന്‍ അതിന് ആരെയും നിര്‍ബന്ധിച്ച് ഒന്നും വാങ്ങിപ്പിക്കാറില്ല.

'ഏയ് ഞാന്‍ ഡോക്ടറൊന്നുമല്ല. ആരെങ്കിലും ഡോക്ടര്‍ ചേര്‍ത്ത് എന്നെ വിളിച്ചാല്‍ ഞാനെന്തിന് തിരുത്താന്‍ പോകണം. തിരുത്താറുമില്ല...' ഇങ്ങനെയുള്ള ഉത്തരങ്ങളാണ് ചോദ്യം ചെയ്യലില്‍ വരുന്നത്. പൊലീസ് ഓഫിസര്‍മാരെ ഉള്‍പ്പെടെ പറ്റിച്ചതിനെക്കുറിച്ച് ചോദിക്കുമ്പോഴുള്ള മറുപടിയും രസകരമാണ്.

'ഞാന്‍ പറയുന്നു ഇത് മോശയുടെ വടിയാണെന്ന്: അവര്‍ അത് വിശ്വസിക്കുന്നു. ഞാന്‍ ആരോടും നിര്‍ബന്ധിച്ച് പറയാറില്ല. ഇത് മോശയുടെ വടിയല്ലെന്ന് തര്‍ക്കിക്കാന്‍ അവരും നില്‍ക്കാറില്ലാത്തതിനാല്‍ അങ്ങനെ മുന്നോട്ടുപോകുന്നു...'

കേരളത്തില്‍ മോന്‍സന്‍ മാവുങ്കലിന്റെ തട്ടിപ്പിന്റെ തമാശകള്‍ സാമൂഹിക മാധ്യമങ്ങളിലും നിറഞ്ഞൊഴുകുകയാണ്. മലയാളിയുടെ ഹാസ്യം ഏതറ്റം വരെയും കൊണ്ടുപോകാന്‍ പറ്റുന്ന തരത്തിലാണ് മോന്‍സന്റെ പുരാവസ്തു തട്ടിപ്പിന്റെ ട്രോളുകളിറങ്ങുന്നത്.