ആരാണ് അനിത പുല്ലയില്... മോന്സന് മാവുങ്കലിന്റെ അറസ്റ്റോടെ ഇന്നലെ ചാനല് ചര്ച്ചകളില് നിറഞ്ഞ് പ്രമുഖ പ്രവാസി അനിത പുല്ലയില്; ലോക്നാഥ് ബഹ്റയെ മോന്സന് പരിചയപ്പെടുത്തിക്കൊടുത്തത് താനാണെന്ന് മനോരമ ചര്ച്ചയില് പറഞ്ഞു; എന്നാല് മാതൃഭൂമി ചര്ച്ചയില് ഉന്നതന്മാരെ പരിചയപ്പെടുത്തി കൊടുത്തത് താനാണെന്ന ആരോപണം നിഷേധിച്ച് അനിത
പുരാവസ്തു ട്രോള് പോലെ ഏത് വിശ്വസിക്കണം ഏത് വിശ്വസിക്കേണ്ട എന്ന നിലയിലാണ് മലയാളികള്. മോന്സന് മാവുങ്കലിനെ മുന് പൊലീസ് മേധാവി ലോക്നാഥ് ബെഹ്റയ്ക്ക് പരിചയപ്പെടുത്തിയത് താനാണെന്ന് അനിത പുല്ലയില് മനോരമ ന്യൂസിലെ ചാനല് ചര്ച്ചയിലാണ് വെളിപ്പെടുത്തല് നടത്തിയത്. സംഘടനയുടെ പേട്രണ് എന്ന നിലയിലാണ് ഡിജിപിക്കു പരിചയപ്പെടുത്തിയത് എന്നും ഷാനി പ്രഭാകറിന്റെ എടുത്തെടുത്തുള്ള ചോദ്യങ്ങള്ക്ക് മറുപടിയായി പറഞ്ഞു.
അതേസമയം മാതൃഭൂമി ചാനല് ചര്ച്ചയില് ആ നിലപാട് മാറ്റി. പുരാവസ്തു തട്ടിപ്പ് കേസ് പ്രതി മോണ്സന് മാവുങ്കലിന് പോലീസ് ഉന്നതന്മാരെ പരിചയപ്പെടുത്തി കൊടുത്തത് താനാണെന്ന ആരോപണം അനിത നിഷേധിച്ചു. മുന് ഡിജിപി ലോക്നാഥ് ബെഹറക്ക് താന് ഒരു പരാതിയും നല്കിയിട്ടില്ല. തനിക്കെതിരെ മോണ്സന് രണ്ടു സ്ത്രീകളെ കൊണ്ട് അപകീര്ത്തി കേസ് കൊടുപ്പിക്കാന് ശ്രമിച്ചുവെന്നും അനിത പറഞ്ഞു.
പ്രവാസി മലയാളി ഫെഡറേഷന്റെ കോര്ഡിനേറ്റാറാണ് താന്. ലോക കേരള സഭയിലെ അംഗം കൂടിയാണ്. രണ്ടു വര്ഷം മുമ്പ് എന്റെ പിതാവ് മരിച്ചപ്പോഴാണ് മോണ്സന് ആദ്യമായി എന്റെ വീട്ടിലേക്കെത്തുന്നത്. ആ ഘട്ടത്തിലാണ് അയാളുമായി പരിചയത്തിലാകുന്നത്. ഇറ്റലിയില് മാത്രമല്ല സംഘടനയിലെ സ്ത്രീ വിഭാഗത്തിന്റെ കോഓര്ഡിനേറ്റര് എന്ന നിലക്ക് വിവിധ രാജ്യങ്ങളിലുള്ളവരുമായും സര്ക്കാര് പ്രതിനിധികളുമായും അവര് ഇവിടെ വരുമ്പോള് ഞാന് ബന്ധപ്പെടാറുണ്ട്. അങ്ങനെയാണ് പോലീസ് ഉദ്യോഗസ്ഥരുമായും ബന്ധമുണ്ടാകുന്നത്.
ഇങ്ങനെയിരിക്കുമ്പോള് മോണ്സന്റെ വീട്ടിലേക്ക് ക്ഷണമുണ്ടായി. നിരവധി ആളുകള് അന്നവിടെ ഉണ്ടായിരുന്നു. ഒരു കള്ളത്തരവും അന്നൊന്നും ഞങ്ങള്ക്ക് മനസ്സിലായിരുന്നില്ല. പോലീസ് ഉദ്യോഗസ്ഥരുമായി ഞാന് മോണ്സനെ പരിചയപ്പെടുത്തി നല്കിയിട്ടില്ല. ഒപ്പം ഫോട്ടോയെടുത്ത് അത് തട്ടിപ്പിനായി ഉപയോഗിക്കുന്നത് ഇയാളുടെ പതിവാണെന്നും അനിത പറഞ്ഞു.
തന്നോട് നിരവധി പേര് മോണ്സനെ കുറിച്ച് പരാതി പറഞ്ഞതോടെയാണ് ഇയാളുടെ തട്ടിപ്പ് വിവരം താന് അറിയുന്നതെന്നും അനിത വ്യക്തമാക്കി. അനിതയാണ് മോണ്സനെ പോലീസ് ഉന്നതരുമായി പരിചയപ്പെടുത്തിയതെന്നും അനിതയുമായി ഇയാള് തെറ്റിയതോടെ പോലീസ് ഉന്നതരും കൈവിട്ടെന്നുമായിരുന്നു ചില റിപ്പോര്ട്ടുകള്. ഇറ്റലിയിലാണ് നിലവില് അനിതയുള്ളത്.
ഇറ്റാലിയന് പൗരത്വമുള്ള തൃശൂര്, മാള സ്വദേശിനിയാണ് അനിത പുല്ലയില്. അനധികൃത ഇടപാടുകള് അറിഞ്ഞതോടെ ഇവര് മോന്സനെ കൈയൊഴിഞ്ഞു.
തൃശൂര് സ്വദേശികളായ പീറ്റര്ബേബി ദമ്പതികളുടെ നാല് പെണ്മക്കളില് ഒരാളായ അനിത ഇറ്റാലിയന് പൗരനെ വിവാഹം കഴിച്ച്, പ്രവാസി മലയാളി ഫെഡറേഷന് ഉള്പ്പെടെയുള്ള സംഘടനകളുടെ ഭാരവാഹിയായിരുന്നു. ഇതേ സംഘടനയുടെ രക്ഷാധികാരിയായിരുന്നു മോന്സണ്. കേരളത്തിലെ ചില പ്രമുഖ വ്യവസായികളും സംഘടനയുമായി സഹകരിച്ചിട്ടുണ്ട്.
സംഘടനാ ഭാരവാഹിയെന്ന നിലയില് ഉന്നത ബന്ധമാണുള്ളത്. മോന്സണ് ഇത്തരം ബന്ധങ്ങള് ദുരുപയോഗിച്ച് വിദേശ ഇടപാടുകള് നടത്തിയെന്നു തിരിച്ചറിഞ്ഞതോടെയാണു കഴിഞ്ഞവര്ഷം ഇവര് തമ്മില് തെറ്റിയത്. അതോടെയാണ് മോന്സന്റെ കള്ളത്തരങ്ങള് പുറത്തായത്.
"
https://www.facebook.com/Malayalivartha