ചുമ്മാതല്ല ട്രോളുകള്‍ പറക്കുന്നത്. അത്രയ്ക്കും പുരാവസ്തുക്കളാണ് മോന്‍സന്‍ മാവുങ്കലിന്റെ മ്യൂസിയത്തിലുള്ളത്. പക്ഷെ എല്ലാം വ്യാജമെന്ന് മാത്രം.

ടിപ്പുവിന്റെ വാള്‍, നൈസാമിന്റെ വാള്‍, ശിവജിയുടെ ഭഗവത്ഗീത, ഔറംഗസബിന്റെ മോതിരം, 4500 വര്‍ഷം പഴക്കമുള്ള ദാരുശില്പം, മോശയുടെ വടി, നബിയുടെ മണ്‍വിളക്ക്, 650 കിലോ തൂക്കമുള്ള പഞ്ചലോഹ നന്ദി വിഗ്രഹം, മൈസൂര്‍ കൊട്ടാരത്തിന്റെ ആധാരം, തിരുവിതാംകൂര്‍ രാജാവിന്റെ ഇരിപ്പിടം, സത്യസായി ബാബയുടെ ഒന്നരക്കിലോയുള്ള സ്വര്‍ണ പാദുകം, 40 കോടി രൂപവരെ വിലയുള്ള വാച്ചുകള്‍, ലോകത്തില്‍ ആദ്യം അച്ചടിച്ച ബൈബിള്‍, രവിവര്‍മ്മ, ഡാവിഞ്ചി എന്നിവരുടെ പെയിന്റിംഗുകള്‍, മദര്‍തെരേസ, സെന്റ് ആന്റണി, അല്‍ഫോണ്‍സാമ്മ എന്നിവരുടെ തിരുശേഷിപ്പുകള്‍, സദ്ദാം ഹുസൈന്റെ ഖുര്‍ആന്‍ അങ്ങനെ പോകുന്നു മോന്‍സന്റെ ചരിത്ര താളുകള്‍.

അതേ സമയം അയ്യപ്പനെ തൊട്ടുകളിച്ചതോടെ കളി മാറി. ആഞ്ഞടിച്ച് പന്തളം കൊട്ടാരം രംഗത്തെത്തി. മോന്‍സണ്‍ മാവുങ്കലിന്റെ കൈവശമുണ്ടായിരുന്ന വ്യാജ ചെമ്പോല പന്തളം കൊട്ടാരത്തിന്റേതെന്ന പേരില്‍ പ്രചരിപ്പിച്ചതിന് പിന്നില്‍ ഗൂഢാലോചന നടന്നതായി പന്തളം കൊട്ടാരം പറഞ്ഞു. ശബരിമല സ്ത്രീ പ്രവേശനത്തിനെതിരെയുള്ള ഭക്തജന സമരം തകര്‍ക്കാനാണ് വ്യാജ ചെമ്പോല അവതരിപ്പിച്ചത്.

ഇത്തരം ഒരു ചെമ്പോലയെക്കുറിച്ച് പന്തളം കൊട്ടാരത്തിന് അറിവില്ല. ആധികാരികത പരിശോധിക്കണമെന്നാവശ്യപ്പെട്ട് പുരാവസ്തു വകുപ്പിന് പരാതി നല്‍കുമെന്ന് കൊട്ടാരം നിര്‍വാഹക സംഘം പ്രസിഡന്റ് ശശികുമാര വര്‍മ്മ പറഞ്ഞു. വ്യാജരേഖയെങ്കില്‍ നിയമ നടപടി സ്വകരിക്കും. ചെമ്പോലയുടെ പേരില്‍ പ്രചരിപ്പിച്ചത് കള്ളക്കഥകളാണെന്ന് മോന്‍സന്റെ അറസ്‌റ്റോടെ വ്യക്തമായതായി ശബരിമല തന്ത്രി കണ്ഠരര് രാജവരര് പറഞ്ഞു.

അതേസമയം പുരാവസ്തു തട്ടിപ്പ് കേസില്‍ അറസ്റ്റിലായ മോന്‍സണ്‍ മാവുങ്കലിന്റെ ചോദ്യം ചെയ്യല്‍ തുടരുന്നു. അന്വേഷണം വിലയിരുത്താന്‍ ക്രൈം ബ്രാഞ്ച് മേധാവി എസ് ശ്രജിത്ത് ഇന്ന് കൊച്ചിയിലെത്തും. കസ്റ്റഡി കാലാവധി അവസാനിക്കുന്നതിനാല്‍ വൈകിട്ട് നാലരയോടെ മോന്‍സണെ കോടതിയില്‍ ഹാജരാക്കും. വീണ്ടും കസ്റ്റഡിയില്‍ വാങ്ങാനാണ് അന്വേഷണ സംഘത്തിന്റെ തീരുമാനം.

വ്യാജ രേഖകള്‍ ചമച്ചതിന്റെ വിവരങ്ങള്‍ തേടി അന്വേഷണ സംഘം കൊച്ചിയിലും ചേര്‍ത്തലയിലുമുള്ള മോന്‍സണിന്റെ വീടുകളില്‍ നേരത്തെ പരിശോധന നടത്തിയിരുന്നു. ഇവിടങ്ങളില്‍ നിന്നും ലഭിച്ച തെളിവുകളെക്കുറിച്ചും ഇയാളോട് ചോദിച്ചറിയും.

മോന്‍സണ്‍ മാവുങ്കലിന്റെ ഭൂമിയിടപാടുകളെക്കുറിച്ചും െ്രെകം ബ്രാഞ്ച് അന്വേഷിക്കുന്നുണ്ട്. മോന്‍സണിന്റെയും ജീവനക്കാരുടെയും ബാങ്ക് അക്കൗണ്ട് വിവരങ്ങളും പരിശോധിക്കും. ഇതുവരെ കണ്ടെത്തിയ അക്കൗണ്ടുകളില്‍ വലിയ തുകയൊന്നുമില്ല. തട്ടിയെടുത്ത പണം മോന്‍സണ്‍ ആര്‍ഭാട ജവിതത്തിന് വേണ്ടിയായിരുന്നു ഉപയോഗിച്ചിരുന്നതെന്ന് അന്വേഷണ സംഘം പറഞ്ഞു. സ്വന്തം കുടുംബവുമായി ഇയാള്‍ക്ക് വലിയ അടുപ്പമൊന്നുമുണ്ടായിരുന്നില്ല.

മോന്‍സണ്‍ മാവുങ്കലിന്റ 'പുരാവസ്തുക്കള്‍' വിശദമായി പരിശോധിക്കണമെന്ന് ആവശ്യപ്പെട്ട് ക്രൈംബ്രാഞ്ച് പുരാവസ്തുവകുപ്പിനെ സമപിച്ചു. ഇവയുടെ യഥാര്‍ത്ഥ പഴക്കവും വിലയും തിട്ടപ്പെടുത്തി കേസിന് കൂടുതല്‍ ബലം നല്‍കുന്നതിന്റെ ഭാഗമായാണ് നടപടി. 'ടിപ്പുസുല്‍ത്താന്റെ സിംഹാസനം' മുതല്‍ 'മോശയുടെ അംശവടി' വരെയുള്ള പുരാവസ്തുക്കളുടെയെല്ലാം കാലപ്പഴക്കം കണ്ടെത്താന്‍ കാര്‍ബണ്‍ ഡേറ്റിംഗ്, കമ്പാരറ്റവ് ഡേറ്റിംഗ് തുടങ്ങിയ പരിശോധനകള്‍ നടത്തണം. പുരാവസ്തു വകുപ്പിന്റ പ്രത്യേക സമിതിയാകും ഇവ പരിശോധിക്കുക.