കോട്ടയത്തേത് കൊടും ക്രൂരത, കാല്പ്പാദം വെട്ടിയത് ജീവനോടെ, മനേഷ് നിലവിളിച്ചുകൊണ്ട് തോട്ടത്തിലൂടെ ഇഴഞ്ഞെന്ന് പ്രദേശവാസികള് ... കോട്ടയത്ത് ജനങ്ങളെ പരിഭ്രാന്തരാക്കിയ കൊലപാതകത്തിന്റെ കൂടുതല് നടുക്കുന്ന വിവരങ്ങള് പുറത്ത്...
കോട്ടയത്ത് ജനങ്ങളെ പരിഭ്രാന്തരാക്കിയ കൊലപാതകത്തിന്റെ കൂടുതല് നടുക്കുന്ന വിവരങ്ങളാണ് പുറത്ത് വരുന്നത്.പത്തനാട് മുണ്ടത്താനം സ്വദേശി മനേഷ് തമ്പാന് എന്ന യുവാവിനെ കൊലപ്പെടുത്തിയത് അതിക്രൂരമായാണ്.
ദേഹമാസകലം വെട്ടിപ്പരിക്കേല്പ്പിച്ച ശേഷം ജീവനോടെ കാല്പ്പാദം വെട്ടിമാറ്റുകയായിരുന്നെന്ന് പ്രതികള് മൊഴി നല്കിയെന്ന് പോലീസ് പറഞ്ഞു. മുഖ്യപ്രതി കടയിനിക്കാട് പുതുപ്പറമ്പില് 31കാരന് ജയേഷ്, മനേഷിനെ ആക്രമിച്ച് അവശനാക്കിയശേഷം,കാല്പ്പാദം കത്തികൊണ്ട് വെട്ടുകയായിരുന്നു.
കാല്പ്പാദം അറ്റ് പോരാഞ്ഞതിനാല് മറ്റ് പ്രതികള് മനേഷിനെ നിലത്തിട്ട് ചവിട്ടിപ്പിടിച്ചു. തുടര്ന്ന് ജയേഷ് കാല്പ്പാദം തിരിച്ച് മുറിച്ചെടുത്തു. ഈ സമയം മനേഷ് നിലവിളിച്ചുകൊണ്ട് തോട്ടത്തിലൂടെ ഇഴഞ്ഞെന്നാണ് പ്രദേശവാസികള് പോലീസിനോട് പറഞ്ഞത്.
പ്രതികള് മനേഷ് മരിച്ചെന്ന് ഉറപ്പാക്കിയ ശേഷം മുറിച്ചെടുത്ത കാല്പ്പാദവുമായി സ്ഥലത്തുനിന്നും രക്ഷപ്പെട്ടതെന്നും കറുകച്ചാല് പോലീസ് പറഞ്ഞു.പിന്നീട് കോട്ടയം കങ്ങഴ ഇടയപ്പാറ കവലയില് രക്തസാക്ഷി കുടീരത്തിന് തൊട്ടുമുന്പില് ഈ കാല്പ്പാദം കണ്ടെത്തിയത്. ഒക്ടോബര് 7നാണ് കോട്ടയത്തെ നടുക്കിയ ഈ കൊലപാതകം നടന്നത്.
സംഭവത്തിലെ കൂട്ടുപ്രതികളായ കങ്ങഴ വടക്കേറാട്ടുപടി കല്ലൂതാഴ്ചയില് ജിജോ വര്ഗീസ് (28), കങ്ങഴ പാണ്ടിയാംകുഴി കൈലാത്ത് സച്ചിന് സുരേഷ് (26) എന്നിവരെ കറുകച്ചാല് പോലീസ് പിടികൂടി. പ്രതികളായ ജയേഷും കുമരകം കവണാറ്റിന്കര സച്ചുവും മണിമല പോലീസ് സ്റ്റേഷനില് നേരത്തെ തന്നെ കീഴടങ്ങിയിരുന്നു. അതിക്രൂരമായ കൊലപാതകമാണ് നടന്നതെന്ന് പോലീസ് പറയുന്നു.
ആറുമാസം മുന്പ് ജയേഷിനെ വീട്ടില്ക്കയറി ആക്രമിച്ചതിന് പിന്നില് മനേഷാണെന്ന് ആരോപിച്ചായിരുന്നു കൊലപാതകം.കൊല്ലപ്പെട്ട മനേഷിന്റെ ദേഹത്ത് 25 മുറിവുകളാണ് കണ്ടെത്തിയത്. കാലിനും പുറത്തും തുടയിലും നെഞ്ചത്തുമാണ് കൂടുതല് പരിക്കുകള്. ആയുധങ്ങളുമായി എത്തിയ പ്രതികളെ കണ്ട മനേഷ് പഞ്ചായത്ത് റോഡില് നിന്നും 400 മീറ്ററോളം റബ്ബര്തോട്ടത്തിലൂടെ ഓടി. പിന്തുടര്ന്നെത്തിയ പ്രതികള് മനേഷിനെ വെട്ടിവീഴ്ത്തുകയായിരുന്നെന്ന് പോലീസ് പറഞ്ഞു.
വെള്ളിയാഴ്ച വൈദ്യപരിശോധനയ്ക്ക് ശേഷം പ്രതികളായ ജയേഷിനെയും സച്ചുവിനെയും സംഭവസ്ഥലത്ത് തെളിവെടുപ്പിനായി എത്തിച്ചപ്പോള് പ്രദേശത്ത് തടിച്ചുകൂടിയ ആളുകളോട് തനിക്കെതിരേ സാക്ഷി പറയുന്നവരുടെ തലയും കാലും ഇത്തരത്തില് അറക്കുമെന്ന് ജയേഷ് വിളിച്ചുപറഞ്ഞിരുന്നു. തന്നെ ആക്രമിച്ച കേസിലെ ആറ് പ്രതികളെക്കൂടി വെട്ടിക്കൊല്ലുമെന്നും പോലീസിന് മുന്പില് വെച്ച് ഇയാള് ഭീഷണി മുഴക്കി.തെളിവെടുപ്പിനുശേഷം കോടതിയില് ഹാജരാക്കിയ പ്രതികളെ റിമാന്ഡ് ചെയ്തു. 14 കേസുകളില് മുന്പ് പ്രതിയായ ജയേഷ്, സാക്ഷികളില്ലാത്തതിനാല് അതില്നിന്നെല്ലാം മോചിതനായി.
അതേസമയം കൊല്ലപ്പെട്ട മനേഷ് തമ്പാനെതിരെ കൊലപാതകശ്രമം അടക്കം നിരവധി കേസുകളുണ്ട്. ഫെബ്രുവരിയില് അറസ്റ്റിലായ ഇയാള് ജാമ്യത്തില് കഴിയുകയായിരുന്നു.
https://www.facebook.com/Malayalivartha
