വാടകവീട് നോക്കാൻ എത്തിയ യുവതിയെ സൗഹൃദം നടിച്ച് വിവിധ സ്ഥലങ്ങളിൽ കാറിൽ കൊണ്ടുപോയി പീഡിപ്പിച്ച സംഭവത്തിൽ യുവാവ് അറസ്റ്റിൽ.

രഘുനാഥപുരം സ്വദേശി കടയിൽ വീട്ടിൽ ഷാക്കർ (37) ആണ് അറസ്റ്റിലായത്.

ഭർത്താവ് ഉപേക്ഷിച്ച കടയ്ക്കാവൂർ സ്വദേശിനി എറണാകുളത്ത് ജോലി ചെയ്യുന്ന സഹോദരിയും കുട്ടികളുമായി താമസിക്കുന്നതിന് വാടക വീട് തിരക്കി വടശ്ശേരിക്കോണം ഭാഗത്ത് എത്തിയപ്പോഴാണ് പ്രതിയുമായി സൗഹൃദത്തിലായത്.

തുടർന്ന് യുവതിയെയും കുട്ടികളെയും സംരക്ഷിക്കാമെന്ന് വാഗ്ദാനം ചെയ്ത് വിവിധ സ്ഥലങ്ങളിൽ കാറിൽ കൊണ്ടുപോയി പീഡിപ്പിക്കുകയായിരുന്നു.

തുടർന്ന് യുവതിയുടെ പക്കൽ നിന്ന് 40,000 രൂപയും ടൂ വീലറും കരസ്ഥമാക്കിയ ശേഷം പ്രതി കടന്നു കളയുകയായിരുന്നു.

യുവതിയുടെ പക്കൽ നിന്ന് തട്ടിയെടുത്ത ടൂ വീലറും പ്രതിയുടെ പേരിലുള്ള കാറും പോലീസ് കണ്ടെടുത്തു.

ചടയമംഗലത്തും പരിസരത്തുമായി ഒളിവിൽ കഴിഞ്ഞ ഷാക്കർ ദളവാപുരത്ത് താമസിക്കുന്ന സഹോദരിയെ കാണാനെത്തിയപ്പോഴാണ് പൊലീസ് പിടികൂടിയത്.

തിരുവനന്തപുരം റൂറൽ എസ്പി പി.കെ. മധുവിന്റെ നിർദേശപ്രകാരം ഡിവൈഎസ്പി പി.നിയാസിന്റെ നേതൃത്വത്തിലുള്ള പൊലീസ് സംഘമാണ് പ്രതിയെ പിടികൂടിയത്.