പൊതുമരാമത്ത് മന്ത്രി മുഹമ്മദ് റിയാസ് വെറുമൊരു മന്ത്രിയെന്ന് ധരിച്ച എ.എന്‍. ഷംസീര്‍ പെട്ടുപോയി. മുഖ്യമന്ത്രിയുമായുള്ള മുഹമ്മദ് റിയാസിന്റെ ബന്ധം മറന്നു പോയി. റിയാസ് മാപ്പ് പറഞ്ഞെന്ന തരത്തില്‍ ചാനലുകള്‍ക്ക് വാര്‍ത്ത ചോര്‍ത്തി കൊടുത്തതിന് പിന്നാലെ ശക്തമായി റിയാസ് രംഗത്ത് വരികയായിരുന്നു. കരാറുകാരുടെ കാര്യത്തില്‍ റിയാസ്് ഉറച്ച് നിന്നു. ആരും കരാറുകാരെ കൂട്ടി വരരുത് എന്ന് ഒരിക്കല്‍ കൂടി മുന്നറിയിപ്പ് നല്‍കി. മാത്രമല്ല പാര്‍ട്ടി സെക്രട്ടറി പോലും രംഗത്തെത്തി റിയാസിനെ ന്യായീകരിച്ചു. ഇത് സൂചിപ്പിക്കുന്നത് ഷംസീറിന് തിരിച്ചടി കിട്ടും എന്നാണ്.

മന്ത്രി റിയാസിന്റെ പ്രസ്താവന സര്‍ക്കാരിന്റെ പൊതു നിലപാട് അനുസരിച്ചാണെന്നും മന്ത്രിക്ക് ഇക്കാര്യത്തില്‍ പൂര്‍ണ പിന്തുണയാണുള്ളതെന്നും സി.പി.എം സംസ്ഥാന സെക്രട്ടറി എ. വിജയരാഘവന്‍ പറഞ്ഞു. ശുപാര്‍ശകള്‍ ഇല്ലാതെ കാര്യങ്ങള്‍ വേഗത്തില്‍ നടക്കണം, അതാണ് ഈ സര്‍ക്കാരിന്റെ നിലപാടെന്നും വിജയരാഘവന്‍ വ്യക്തമാക്കി.

കരാറുകാരെക്കൂട്ടി എം.എല്‍.എമാര്‍ കാണാന്‍ വരരുതെന്ന മന്ത്രി മുഹമ്മദ് റിയാസിനറെ പ്രസ്താവന വിവാദമായിരുന്നു. എന്നാല്‍ താന്‍ പറഞ്ഞതില്‍ ഉറച്ച് നില്‍ക്കുകയാണെന്ന് ആവര്‍ത്തിച്ച മന്ത്രി, ഖേദം പ്രകടിപ്പിച്ചിട്ടില്ലെന്നും ഇടതുപക്ഷ നയവും നിലപാടുമാണ് താന്‍ വ്യക്തമാക്കിയതെന്നും കോഴിക്കോട്ട് പറഞ്ഞു. നിയമസഭയില്‍ പറഞ്ഞത് നല്ല ബോധ്യത്തോടെയാണ്. പറഞ്ഞതില്‍ നിന്ന് ഒരടി പിന്നോട്ടില്ലെന്നും റിയാസ് വ്യക്തമാക്കി. ഇതോടെ പെട്ട് പോയത് ഷംസീറാണ്.

അതേസമയം പാര്‍ട്ടി കോണ്‍ഗ്രസിന് മുന്നോടിയായുള്ള ലോക്കല്‍ സമ്മേളനങ്ങളിലേക്ക് സംസ്ഥാന സി.പി.എം കടന്നിരിക്കെ, ചില വകുപ്പുകള്‍ക്കും മന്ത്രിമാരുടെ പ്രവര്‍ത്തനങ്ങള്‍ക്കുമെതിരെ ഒളിഞ്ഞും തെളിഞ്ഞും പാര്‍ട്ടിക്കകത്ത് വിമര്‍ശനങ്ങള്‍ ഉയരുകയാണ്. സി.പി.എമ്മിന്റെ കഴിഞ്ഞ നിയമസഭാ കക്ഷിയോഗത്തില്‍ പൊതുമരാമത്ത് മന്ത്രി പി.എ. മുഹമ്മദ് റിയാസിനെതിരെ, മറ്റൊരു സംസ്ഥാന കമ്മിറ്റിയംഗമായ എ.എന്‍. ഷംസീര്‍ എം.എല്‍.എ രംഗത്തെത്തിയതാണ് ഏറ്റവുമൊടുവില്‍ വിവാദമായത്.

എം.എല്‍.എമാര്‍ കരാറുകാരെയും കൂട്ടി മന്ത്രിയെ കാണാന്‍ വരരുതെന്നാണ് നിയമസഭയില്‍ മന്ത്രി റിയാസ് പറഞ്ഞത്. എം.എല്‍.എമാര്‍ക്കെതിരെ ദുസ്സൂചന നല്‍കന്നതാണിതെന്നും മണ്ഡലത്തിലെ പ്രശ്‌നങ്ങള്‍ പരിഹരിക്കാന്‍ എം.എല്‍.എമാര്‍ക്ക് പലരെയും കൂട്ടി മന്ത്രിയെ കാണാന്‍ വരേണ്ടിവരുമെന്നും ഷംസീര്‍ വിമര്‍ശിച്ചെന്നാണ് വാര്‍ത്ത. ഇത് നിഷേധിച്ച മന്ത്രി റിയാസ്, നിയമസഭയില്‍ പറഞ്ഞ കാര്യത്തില്‍ താനുറച്ചു നില്‍ക്കുന്നതായും വ്യക്തമാക്കി.

പൊതുമരാമത്ത് വകുപ്പില്‍ നിന്ന് കിഫ്ബി വഴിയുള്ള പദ്ധതികള്‍ക്ക് അനാവശ്യ കാലതാമസം വരുന്നുവെന്ന ആക്ഷേപം നേരത്തേ മുതല്‍ ഭരണകക്ഷിയില്‍ ശക്തമാണ്. പത്തനാപുരം മണ്ഡലത്തിലെ റോഡ് നിര്‍മ്മാണവുമായി ബന്ധപ്പെട്ട് കെ.ബി. ഗണേശ് കുമാര്‍ നിയമസഭയില്‍ ആഞ്ഞടിച്ചപ്പോള്‍, അതില്‍ കാര്യമുണ്ടെന്ന് വാദിച്ച് ഗണേശിനെ ഷംസീര്‍ പിന്തുണച്ചു.

വ്യവസായവകുപ്പിന് കീഴിലെ ഇന്‍കെലിനെതിരെ, തിരുവനന്തപുരം മെഡിക്കല്‍കോളേജ് വികസനക്കാര്യം ഉന്നയിക്കവേ കടകംപള്ളി സുരേന്ദ്രനും കഴിഞ്ഞ ദിവസം വിമര്‍ശനമുയര്‍ത്തിയിരുന്നു. ഇന്‍കെല്‍ ഐ.എ.എസുകാരുടെ താവളമാണെന്ന കടകംപള്ളിയുടെ വിമര്‍ശനം മന്ത്രി പി. രാജീവ് കൈയോടെ നിഷേധിച്ചു. സ്വന്തം മണ്ഡലത്തിലെ കരാറുകാരുമായി എം.എല്‍.എമാര്‍ വരുന്നതില്‍ തെറ്റില്ലെന്നും മറ്റ് മണ്ഡലങ്ങളിലെ കാര്യത്തിന് വരേണ്ടെന്നുമാണ് താന്‍ നിയമസഭയില്‍ പറഞ്ഞതെന്നാണ് മന്ത്രി റിയാസ് ഇന്നലെ പ്രതികരിച്ചത്. എന്തായാലും റിയാസിനെ ഒറ്റപ്പെടുത്താന്‍ ശ്രമിച്ച ഷംസീറിന് പണി പുറകെ തന്നെ കിട്ടും.