സംസ്ഥാനത്ത് ‌ഇന്ന് ഉച്ചയ്ക്കുശേഷം മഴ കനക്കും. എട്ട് ജില്ലകളിൽ ഓറഞ്ച് അലർട്ടും ആറ് ജില്ലകളിൽ യെലോ അലർട്ടും പ്രഖ്യാപിച്ചു. പത്തനംതിട്ട, കോട്ടയം, ഇടുക്കി, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ ജില്ലകളിലാണ് ഓറഞ്ച് അലർട്ട്. ഈ ജില്ലകളിൽ അതിശക്തമായ മഴയ്ക്ക് സാധ്യതയുണ്ട്. തിരുവനന്തപുരം, കൊല്ലം, ആലപ്പുഴ, എറണാകുളം, തൃശൂർ, കാസർകോട് ജില്ലകളിലാണ് യെലോ അലർട്ട് പ്രഖ്യാപിച്ചിരിക്കുന്നത്.
അതേസമയം മലവെള്ളത്തിന്റെ കുത്തൊഴുക്കിനെത്തുടര്‍ന്നു കുട്ടനാടന്‍ പാടശേഖരങ്ങളില്‍ മടവീഴ്ച വ്യാപകമാകുന്നു.

ജില്ലയില്‍ 22 പാടങ്ങളിലായി 26 മടവീഴ്ചയാണ് ഉണ്ടായിരിക്കുന്നത്. പുളിങ്കുന്ന് കൃഷിഭവന്‍പരിധിയിലെ ശ്രീമൂലമംഗലം കായല്‍, വെളിയനാട് കൃഷിഭവന്‍ പരിധിയില്‍വരുന്ന കുഴിയടി- പാലിയേക്കരി പാടശേഖരം എന്നിവിടങ്ങളില്‍ കഴിഞ്ഞദിവസം മടവീഴ്ചയുണ്ടായതാണു നിലവില്‍ അവസാനത്തേത്. 596 ഏക്കര്‍വരുന്ന ശ്രീമൂലമംഗലം പാടശേഖരത്തില്‍ 284 കര്‍ഷകരാണുള്ളത്. പുഞ്ചക്കൃഷിക്കായി നിലമൊരുക്കല്‍ ജോലികള്‍ അവസാനഘട്ടത്തിലെത്തി നില്‍ക്കെയാണു വട്ടക്കായലിനോടുചേര്‍ന്നുള്ള പുറംബണ്ടില്‍ ഇന്നലെ മടവീണത്. കുട്ടനാട് പാക്കേജ്പ്രകാരം പുറംബണ്ടു ബലപ്പെടുത്തിയ ഭാഗത്താണു മടവീണത്.