തുടര്‍ച്ചയായി രണ്ട് ദിവസം പെയ്ത മഴയുടെ കെടുതിയില്‍ നിന്നും സംസ്ഥാനം ഇപ്പോഴും കര കയറിയിട്ടില്ല. സംസ്ഥാനത്തെ പല ഡാമുകളും തുറന്നു വിട്ടു. പല ഡാമുകളിലും ഷട്ടറുകള്‍ തുറന്നെങ്കിലും വെള്ളം കുറയുന്നില്ല. അതിനിടയ്ക്കാണ് മറ്റൊരു മഴ കൂടി വരുന്നത്.

ഇടുക്കി ഡാമില്‍ വീണ്ടും റെഡ് അലര്‍ട്ട് പ്രഖ്യാപിച്ചു. ജലനിരപ്പ് 2398 അടിയില്‍ തുടരുന്നതിനാലാണിത്. വ്യാഴാഴ്ചത്തെ റൂള്‍ കര്‍വ് പ്രകാരം ബ്ലൂ അലര്‍ട്ട് ലെവല്‍ 2391.31 അടിയും റെഡ് അലര്‍ട്ട് ലെവല്‍ 2397.31 അടിയുമാണ്.

അടുത്ത 3 മണിക്കൂറില്‍ ആലപ്പുഴ, കോട്ടയം, തൃശൂര്‍, മലപ്പുറം, വയനാട്, കണ്ണൂര്‍ എന്നീ ജില്ലകളിലെ ഒറ്റപ്പെട്ടയിടങ്ങളില്‍ മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു.

തെക്കന്‍ തമിഴ്‌നാട് തീരത്ത് രൂപപ്പെട്ട ചക്രവാതച്ചുഴി നിലവില്‍ കോമോരിനു മുകളില്‍ സ്ഥിതി ചെയ്യുന്നതിനാല്‍ കേരളത്തില്‍ ഒക്ടോബര്‍ 25 വരെ ശക്തമായ മഴയ്ക്ക് സാധ്യതയെന്ന് കേന്ദ്ര കാലാവസ്ഥാ വകുപ്പ് അറിയിച്ചു. ചക്രവാതച്ചുഴിയില്‍നിന്ന് മധ്യ കിഴക്കന്‍ അറബിക്കടലില്‍ കര്‍ണാടക തീരം വരെ ഒരു ന്യുനമര്‍ദ പാത്തി നിലനില്‍ക്കുന്നു.

സംസ്ഥാനത്ത് അതിജാഗ്രത തുടരും. സംഭരണികളിലേക്കുള്ള നീരൊഴുക്ക്, മഴ എന്നിവ നിരന്തരം നിരീക്ഷിച്ചു വരികയാണ്. യെലോ അലര്‍ട്ട് ഉള്ള ജില്ലകളില്‍ ജാഗ്രതക്കുറവ് പാടില്ലെന്ന് റവന്യൂ മന്ത്രി കെ.രാജന്‍ പറഞ്ഞു.

കഴിഞ്ഞ ഞായറാഴ്ചയാണ് ഇടുക്കി അണക്കെട്ടിന്റെ മൂന്ന് ഷട്ടറുകള്‍ തുറന്നത്. 35 സെന്റീമീറ്റര്‍ വരെയാണ് ഒരോ ഷട്ടറും ഉയര്‍ത്തിയത്. ഘട്ടം ഘട്ടമായിട്ടായിരുന്നു ഷട്ടറുകള്‍ തുറന്നത്. മൂന്നാമത്തെ ഷട്ടര്‍ 11.05നും, രണ്ടാമത്തെ ഷട്ടര്‍ 11.59നും, നാലാമത്തെ ഷട്ടര്‍ 12.28നുമാണ് ഉയര്‍ത്തിയത്.

സെക്കന്‍ഡില്‍ ഒരുലക്ഷം ലിറ്റര്‍ വെള്ളമാണ് പുറത്തേക്ക് ഒഴുകുന്നത്. ചെറുതോണി പാലത്തില്‍ വാഹന ഗതാഗതത്തിന് നിയന്ത്രണം ഏര്‍പ്പെടുത്തിയില്ല. മന്ത്രിമാരായ റോഷി അഗസ്റ്റിനും, കെ കൃഷ്ണന്‍കുട്ടിയും അന്നത്തെ സാഹചര്യം വിലയിരുത്താനുണ്ടായിരുന്നു. പെരിയാര്‍ തീരത്തുള്ളവര്‍ ജാഗ്രത പാലിക്കാന്‍ ജില്ലാ ഭരണകൂടം നിര്‍ദേശം നല്‍കിയിരുന്നു.

മൂന്ന് വര്‍ഷത്തിന് ശേഷമാണ് അണക്കെട്ട് തുറന്നത്. 2403 അടിയാണ് ഇടുക്കി ഡാമിന്റെ ജലസംഭരണ ശേഷി. ഇത് നാലാം തവണയാണ് ഇടുക്കി അണക്കെട്ട് തുറക്കുന്നത്. വൈദ്യുതി പ്രതിസന്ധി നേരിടുന്ന ഈ സമയത്ത് ഇടുക്കി അണക്കെട്ട് തുറന്നത് വഴി കെ.എസ്.ഇ.ബിക്ക് ആറ് കോടിയിലേറെ രൂപയാണ് നഷ്ടമുണ്ടായത്.

സെക്കന്‍ഡില്‍ ഒരു ലക്ഷം ലിറ്റര്‍ വെള്ളമാണ് ചെറുതോണി ഡാമിലെ മൂന്ന് ഷട്ടറുകളിലൂടെ പുറത്തേക്കൊഴുകുന്നത്. ഒരു ദിവസം ഇത്രയും വെള്ളം ഉപയോഗിച്ച് 1.35 കോടി യൂണിറ്റ് വൈദ്യുതി ഉത്പാദിപ്പിക്കാം. കെ.എസ്.ഇ.ബി ഇപ്പോള്‍ വൈദ്യുതി വില്‍ക്കുന്ന ശരാശരി നിരക്കായ 4.5 രൂപ യൂണിറ്റിന് കണക്കാക്കിയാല്‍ 6.07 കോടി രൂപ നഷ്ടമുണ്ടാകുമെന്ന് അധികൃതര്‍ പറയുന്നു.

ഇപ്പോള്‍ മഴയും നീരൊഴുക്കും കുറവാണ്. എങ്കിലും കനത്ത മഴ പ്രവചിച്ച 22 വരെ ഇപ്പോഴത്തെ അളവില്‍ വെള്ളം തുറന്നുവിടുന്നത് തുടരും. 2397 അടിയില്‍ ജലനിരപ്പ് എത്തിയാല്‍ ഷട്ടറുകള്‍ അടയ്ക്കാന്‍ ആണ് കെ.എസ്.ഇ.ബിയുടെ തീരുമാനം. അഞ്ച് ദിവസം മുമ്പാണ് വൈദ്യുതി ഉത്പാദനം കൂട്ടണമെന്നാവശ്യപ്പെട്ട് കേരളത്തിന് കേന്ദ്ര ഊര്‍ജ സെക്രട്ടറിയുടെ കത്ത് ലഭിച്ചത്. ജലവൈദ്യുത പദ്ധതികളില്‍ നിന്ന് ഉത്പാദനം കൂട്ടണമെന്നാണ് കത്തിലെ ആവശ്യം. അറ്റകുറ്റപ്പണിക്ക് ഉത്പാദനം നിറുത്തിവയ്ക്കരുതെന്നും ആവശ്യപ്പെടുന്നുണ്ട്. ഇപ്പോള്‍ പരമാവധി വൈദ്യുതിയാണ് ഇടുക്കിയില്‍ ഉദ്പാദിപ്പിക്കുന്നത്.