കാർബൺ ന്യൂട്രൽ കാട്ടാക്കടക്കായി കാണവിളയിലാദ്യ ചുവട്... കാർബർ ന്യൂട്രൽ കാട്ടാക്കട എന്ന വലിയ ലക്ഷ്യത്തിലേക്കുള്ള പ്രയാണത്തിന്റെ ക്യാമ്പയിൻ പ്രവർത്തനങ്ങൾ വിവിധ രൂപങ്ങളിൽ വ്യത്യസ്ത തലങ്ങളിൽ നടന്നുവരുന്ന ദിവസങ്ങളാണിത്. ഇതിന്റെ ആദ്യ ചുവട് മലയിൻകീഴ് പഞ്ചായത്തിലെ കുന്നംപാറ വാർഡിലെ കാണവിളയിൽ നിന്നായിരുന്നു.

പരിസ്ഥിതി സംരക്ഷണത്തിന്റെ ഭാഗമായുള്ള ഈ ആശയം ഏറ്റെടുക്കുന്നതിന് കുറച്ചധികം പേർ മുന്നോട്ടു വരുന്നുവെന്നുള്ളത് സന്തോഷമേകുന്നൊരു വസ്തുതയാണ്. ഈ വർഷത്തെ കേരളപ്പിറവി ദിനത്തിൽ പങ്കെടുത്ത ആദ്യ പരിപാടി ഇതുമായി ബന്ധപ്പെട്ട ഒന്നായിരുന്നുവെന്നുള്ളത് ഏറെ അഭിമാനകരം. മലയിൻകീഴ് ഗ്രാമപഞ്ചായത്തിലെ കുന്നംപാറ വാർഡ് പ്ലാസ്റ്റിക് മാലിന്യമുക്തമാക്കുന്നതിനുള്ള ക്യാമ്പയിന് ഇന്ന് തുടക്കം കുറിച്ചു.

ഭൂമിയിൽ ഏറ്റവും കൂടുതൽ അടിഞ്ഞുകൂടുന്ന അജൈവ മാലിന്യങ്ങളിലൊന്നാണ് പ്ലാസ്റ്റിക്ക്. മണ്ണിൽ ലയിച്ചു ചേരാതെ ഭൂമിയുടെ ഉപരിതലത്തിൽ ഇവ 4000 മുതൽ 5000 വർഷം വരെ പരിസ്ഥിതിക്ക് ദോഷമായി നിലനിൽക്കും. ഇത് കത്തിച്ച് നിർമാർജനം ചെയ്താൽ പുറന്തള്ളപ്പെടുന്ന ഡയോക്സിൻ എന്ന വിഷവാതകം മാരക രോഗങ്ങൾക്ക് വരെ കാരണമാകും.

സമൂഹത്തിൽ ഏറ്റവും കൂടുതൽ പ്ലാസ്റ്റിക് മാലിന്യങ്ങൾ സൃഷ്ടിക്കപ്പെടുന്നത് കടകളിൽ നിന്നും ലഭിക്കുന്ന ക്യാരി ബാഗുകളിലൂടെയാണ്. ഒറ്റത്തവണ ഉപയോഗ ശേഷം ഇവ വലിച്ചെറിയപ്പെടുകയാണ് പതിവ്. കടയിൽ പോകുമ്പോൾ ഒരു തുണിസഞ്ചി കയ്യിൽ കരുതുക എന്നതാണ് ഇതിനെ പ്രതിരോധിക്കുവാനുള്ള എളുപ്പമാർഗ്ഗം. എന്നാൽ ഒറ്റദിവസം കൊണ്ട് എല്ലാവരെയും ഈയൊരു ബോധതലത്തിലേക്ക് മാറ്റിയെടുക്കുക എന്നത് പ്രായോഗികമല്ല.

എന്നാൽ കടകളിൽ നിന്നും ഇത്തരം പ്ലാസ്റ്റിക്ക് കവറുകൾക്ക് പകരം തുണിസഞ്ചികൾ കിട്ടുന്ന അവസ്ഥ ഉണ്ടായാലോ... ഈയൊരു സാധ്യതയെ പ്രയോജനപ്പെടുത്തുകയാണ് കുന്നംപാറ വാർഡിലെ യുവ പഞ്ചായത്തംഗം ശ്രീ. രജിത്തിന്റെ നേതൃത്വത്തിൽ അവിടെ ചെയ്യുവാനുദ്ദേശിക്കുന്നത്. വ്യാപാരി വ്യവസായി നേതൃത്വത്തോട് ചർച്ചചെയ്ത് പ്ലാസ്റ്റിക്ക് ബാഗുകൾ പൂർണ്ണമായും വാർഡിനുള്ളിലെ കടകളിൽ നിന്നും ഒഴിവാക്കി.

ഇനി നടത്തുക വീടുവീടാന്തരമുള്ള പ്രചരണ പരിപാടികൾ... പ്ലാസ്റ്റിക് ബാഗുകൾക്ക് പകരം തുണിസഞ്ചികൾ വിതരണം ചെയ്തു കൊണ്ട് ഈ പരിപാടിയുടെ ഉദ്ഘാടനം ഇന്ന് നിർവഹിച്ചു. ഇന്നത്തെ ചെറിയ ചെറിയ ഇലയനക്കങ്ങൾ നാളത്തെ കൊടുങ്കാറ്റുകളായി മാറിയേക്കാം എന്ന പ്രതീക്ഷയിൽ നേരുന്നു...