ഇരുമ്പനത്ത് മെഥനോളുമായി പോയ ടാങ്കര്‍ ലോറിയുടെ ടയറിനു തീപിടിച്ചു. ഐലന്‍ഡില്‍ നിന്ന് ബെംഗളുരുവിലേക്ക് പോയ ടാങ്കര്‍ ലോറിയുടെ ടയറിനാണ് തീപിടിച്ചത്. തലനാരിഴയ്ക്കാണ് വന്‍ ദുരന്തം ഒഴിവായത്. വാഹനത്തിലെ അഗ്നിശമന ഉപകരണം ഉപയോഗിച്ച്‌ ഡ്രൈവറും, സമീപത്തുണ്ടായിരുന്ന നാട്ടുകാരും കൃത്യസമയത്ത് തീ അണച്ചതുകൊണ്ട് ടയറില്‍ നിന്നും തീ ടാങ്കര്‍ ക്യാബിനിലേക്ക് കടക്കാതെ രക്ഷപ്പെട്ടു.

വൈകിട്ട് 6.15ന് സീപോര്‍ട്ട് എയര്‍പോര്‍ട്ട് റോഡില്‍ പോസ്റ്റ് ഓഫിസ് ജംക്‌ഷനു സമീപമായിരുന്നു അപകടമുണ്ടായത്.വാഹനത്തിന്റെ ബ്രേക്ക് സിസ്റ്റത്തിലെ തകരാറാണ് തീപിടിത്തത്തിനു കാരണമെന്ന് സംശയിക്കുന്നു.ഉടന്‍ തന്നെ അഗ്നിശമന സേനയും സ്ഥലത്തെത്തി തീ പൂര്‍ണമായും അണച്ചു.