കഴിഞ്ഞ ദിവസമാണ് കരിപ്പൂര്‍ വിമാനത്താവളം വഴി രണ്ട് കിലോയിലധികം സ്വര്‍ണം കടത്താന്‍ ശ്രമിച്ച മലപ്പുറം സ്വദേശി പി.ഷഹാന പിടിയിലായത്. ഷാര്‍ജ-കോഴിക്കോട് എയര്‍ ഇന്ത്യ എക്‌സ്പ്രസ് വിമാനത്തിലെ കാബിന്‍ ക്രൂവായിരുന്നു.

എന്നാൽ സംഭവത്തിൽ കേസിൽ അറസ്റ്റിലായ യുവതി പൊലീസിന് നേരെ ആത്മഹത്യാ ഭീഷണി മുഴക്കി എന്നുള്ള റിപ്പോർട്ടുകളാണ് ഇപ്പോൾ പുറത്ത് വരുന്നത്. തന്റെ പേരില്‍ കേസെടുക്കരുതെന്നും കേസെടുത്താൽ താന്‍ ആത്മഹത്യ ചെയ്യുമെന്നുമായിരുന്നു യുവതി ഭീഷണി മുഴക്കിയത്.

കരിപ്പൂര്‍ വിമാനത്താവളത്തില്‍ നിന്നും 99 ലക്ഷം രൂപയുടെ സ്വര്‍ണവുമായിട്ടായിരുന്നു യുവതിയെ അറസ്റ്റ് ചെയ്തത്. 99 ലക്ഷം രൂപയുടെ സ്വര്‍ണം മിശ്രിത രൂപത്തിലാക്കി അടിവസ്ത്രത്തിനുള്ളിലാക്കി ഒളിപ്പിച്ചു കടത്താനായിരുന്നു യുവതിയുടെ പദ്ധതി.

പിടിയിലായതോടെ യുവതി പരിഭ്രാന്തിയിലായി. താൻ ഇതിനു മുൻപും സ്വർണം കടത്തിയിട്ടുണ്ടെന്നും ഇത് ചെറുതാണെന്നുമായിരുന്നു യുവതി ഉദ്യോഗസ്ഥരോട് പറഞ്ഞത്.

സ്വർണക്കള്ളക്കടത്തിന്റെ താവളമെന്ന വിളിപ്പേര് ഇപ്പോൾ കേരളത്തിനു സ്വന്തമാണ്. റിപ്പോർട്ട് ചെയ്യപ്പെടുന്ന സ്വർണക്കള്ളക്കടത്ത് കേസുകൾ മാത്രമാണു പുറം ലോകമറിയുന്നത്. അതിലും എത്രയോ ഇരട്ടി സ്വർണം നികുതി വെട്ടിച്ചു പല രൂപത്തിൽ കേരളത്തിലേക്ക് എത്തുന്നുണ്ട്.

സ്വർണക്കള്ളക്കടത്തു വർധിക്കാനുള്ള കാരണം നികുതി വെട്ടിച്ചാൽ ലഭിക്കുന്ന ലാഭം മാത്രമല്ല, കേരളത്തിലേക്കാൾ കുറഞ്ഞ വിലയ്ക്ക് സ്വർണം കിട്ടുന്ന ഇടങ്ങളുണ്ടെന്നതു കൂടിയാണ്. സംസ്ഥാനത്തെ നാലു വിമാനത്താവളങ്ങളിലൂടെയാണ് അനധികൃതമായി കിലോ കണക്കിന് സ്വർണം എത്തുന്നത്.

സ്വർണം പിടിക്കുന്ന വാർത്തകൾ പതിവായിട്ടും അനസ്യൂതം ഈ കള്ളക്കടത്ത് തുടർന്നുകൊണ്ടേയിരിക്കുന്നു. ഗർഭനിരോധന ഉറകളിൽ ഒളിപ്പിച്ചും മലദ്വാരത്തിനുള്ളിലാക്കിയും ക്യാപ്സൂൾ രൂപത്തിലും ദ്രവരൂപത്തിലാക്കിയുമൊക്കെയാണ് സ്വർണം കടത്തുന്നത്.

വിമാനത്താവളത്തില്‍ പിടിക്കപ്പെടുന്ന സ്വര്‍ണം ആര്‍ക്കുവേണ്ടി കൊണ്ടുവരുന്നു എന്ന ചോദ്യത്തിന് ഒരിക്കലും ഉത്തരം കിട്ടാറില്ല. കടത്തുന്നതിന്റെ 10 ശതമാനം മാത്രമാണ്പിടികൂടുന്നത്. അന്വേഷണം കടത്തുന്നവരില്‍ മാത്രമായി ഒതുങ്ങും.