മോന്‍സണ്‍ മാവുങ്കല്‍ കേസുമായി ബന്ധപ്പട്ട് പൊലീസിനെതിരെ ആഞ്ഞടിച്ച ഹൈക്കോടതി, അന്വേഷണം നടത്താന്‍ ഇ.ഡിക്ക് ഡി.ജി.പി കത്തു നല്‍കിയ ശേഷവും പ്രതി സ്വതന്ത്രനായി നടക്കുകയായിരുന്നെന്ന് ഓര്‍മ്മിപ്പിച്ചു.പുരാവസ്തു നിയമം പാലിച്ചാണോ മ്യൂസിയം പ്രവര്‍ത്തിച്ചിരുന്നതെന്നും ലൈസന്‍സുണ്ടോയെന്നും പൊലീസ് പരിശോധിച്ചില്ല.

മോന്‍സണ്‍ ഡോക്ടറാണെന്നും നിരവധി കാറുകളും പുരാവസ്തു ശേഖരവുമുണ്ടെന്നും പറയുന്നു. ആഡംബര ജീവിതം നയിച്ചിരുന്നെന്നും കൂടുതല്‍ സമയവും വിദേശത്തും ഡല്‍ഹിയിലും കറങ്ങി നടക്കുന്നെന്നും റിപ്പോര്‍ട്ടിലുണ്ട്.

സാധാരണക്കാരനായിരുന്നെങ്കില്‍ ജയിലിലടയ്ക്കുമായിരുന്നില്ലേ?പുരാവസ്തുക്കള്‍ക്ക് നമ്മളറിയാത്തൊരു ലോകമുണ്ട്. നമുക്ക് നഷ്ടപ്പെട്ട പുരാവസ്തുക്കള്‍ തിരിച്ചുകൊണ്ടുവരാന്‍ പ്രധാനമന്ത്രി ശ്രമിക്കുകയാണ്. മോശയുടെ അംശവടി, ടിപ്പുവിന്റെ സിംഹാസനം, ഗണേശ വിഗ്രഹം, കൈയെഴുത്തുരേഖകള്‍ തുടങ്ങിയവയുണ്ടെന്നു പറഞ്ഞിട്ടും ഇവയ്ക്ക് ലൈസന്‍സുണ്ടോയെന്ന് ആര്‍ക്കും തോന്നുന്ന സംശയം എന്തുകൊണ്ട് അന്വേഷിച്ചില്ല?

അങ്ങനെ ചെയ്തിരുന്നെങ്കില്‍ തട്ടിപ്പിന് തടയിടാന്‍ അന്നേ കഴിയുമായിരുന്നു. ആഗസ്റ്റില്‍ ഹര്‍ജിക്കാരന്‍ ഹൈക്കോടതിയിലെത്തുന്നതു വരെ മോന്‍സണ്‍ എല്ലാവര്‍ക്കും ‘വിശുദ്ധനായിരുന്നു’. ഇപ്പോള്‍ പോക്സോ കേസുള്‍പ്പെടെ നിലവിലുണ്ടെന്നും കോടതി വ്യക്തമാക്കി.