ഇന്ത്യയെ ഈ ലോകകപ്പില്‍ പാകിസ്ഥാന്‍ തോല്‍പ്പിച്ചപ്പോള്‍ ആരാധകരുടെ ചങ്ക് പറിഞ്ഞിരുന്നു. എങ്കിലും കയറി വരുമെന്ന് വിചാരിച്ചെങ്കിലും ഒന്നും നടന്നില്ല. അവസാനം ഇന്ത്യ ഫോം ആയി വന്നപ്പോഴേക്കും കളിക്കാന്‍ കളിയില്ലാതായി. അതോടെ ദയനീയമായി ഇന്ത്യ നാട്ടിലേക്ക് മടങ്ങി. പാകിസ്ഥാന്‍ കപ്പ് ഉയര്‍ത്തുന്നത് കണ്ടോ എന്ന് ഇന്ത്യയില്‍ പോലുമുള്ള ചില കുബുദ്ധികള്‍ പ്രചരിപ്പിച്ചു. എന്നാല്‍ ഇന്നലെ ആസ്‌ട്രേലിയ പാകിസ്ഥാനെ വരിഞ്ഞ് മുറുക്കിയപ്പോള്‍ സത്യത്തില്‍ ജയിച്ചത് ഇന്ത്യന്‍ ആരാധകരായിരുന്നു.

രണ്ടാം സെമിയിലെ പോരാട്ടത്തില്‍ പാക്കിസ്ഥാനെ 5 വിക്കറ്റിനു കീഴടക്കി ഓസ്‌ട്രേലിയ ട്വന്റി20 ലോകകപ്പ് ഫൈനലിലെത്തി. സ്‌കോര്‍ പാക്കിസ്ഥാന്‍ 20 ഓവറില്‍ 176/4; ഓസീസ് 19 ഓവറില്‍ 177/5. ഞായറാഴ്ച നടക്കുന്ന കലാശക്കളിയില്‍ ന്യൂസീലന്‍ഡാണ് ഓസീസിന്റെ എതിരാളികള്‍. ഇതോടെ തീ പാറുന്ന ഫൈനലായി.

പലരുടേയും പ്രവചനം ഇതോടെ തകര്‍ന്നിരിക്കുകയാണ്. പാക്കിസ്ഥാന്‍, ന്യൂസീലന്‍ഡ് ഫൈനലിനായാണു കാത്തിരിക്കുന്നതെന്നും, ഫൈനലില്‍ പാക്കിസ്ഥാനെ നേരിടുന്നതില്‍ ന്യൂസീലന്‍ഡിന് കടുത്ത മാനസിക സമ്മര്‍ദം ഉണ്ടാകുമെന്നുമായിരുന്നു അക്തറുടെ പ്രവചനം. എന്നാല്‍, ട്വന്റി20യില്‍ അതെല്ലാം തകിടം മറിഞ്ഞു. ടൂര്‍ണമെന്റില്‍ പാക്കിസ്ഥാന്റെ ആദ്യ തോല്‍വിയാണിത്.

ആദ്യ സെമിയില്‍ ഇംഗ്ലണ്ടിനെതിരെ ന്യൂസീലന്‍ഡ് പുറത്തെടുത്ത പോരാട്ടവീര്യത്തിന്റെ തനി ആവര്‍ത്തനമായിരുന്നു രണ്ടാം സെമിയില്‍ ഓസീസിന്റെതും. 12.2 ഓവറില്‍ 96 റണ്‍സ് ചേര്‍ക്കുന്നതിനിടെ 5 മുന്‍നിര ബാറ്റര്‍മാരെ നഷ്ടമായ ഓസീസ് തോല്‍വിയെ അഭിമുഖീകരിച്ചതാണ്. എന്നാല്‍, മാര്‍ക്കസ് സ്‌റ്റോയ്‌നിസ് 31 പന്തില്‍ 2 വീതം ഫോറും സിക്‌സും അടക്കം പുറത്താകാതെ 40 റണ്‍സെടുത്തു, മാത്യു വെയ്ഡ് 17 പന്തില്‍ 2 ഫോറും 4 സിക്‌സും അടക്കം പുറത്താകാതെ 41 റണ്‍സെടുത്തു. ഇവരുടെ അവിസ്മരണീയ ബാറ്റിങ് ഓസീസിനെ വിജയത്തിലെത്തിച്ചു. അതും ഒരു ഓവര്‍ ബാക്കിനില്‍ക്കെ.

മത്സരം അവസാന ഓവര്‍ വരെ പോകുമെന്ന് പ്രതീക്ഷിച്ചതാണ്. 19ാം ഓവറിലെ അവസാന പന്തില്‍ ക്രിസ് വോക്‌സിനെ ഫോറടിച്ചാണ് ഡാര്‍യില്‍ മിച്ചെല്‍ ആദ്യ സെമിയില്‍ ന്യൂസീലന്‍ഡിനെ ജയത്തിലെത്തിച്ചതെങ്കില്‍, 19ാം ഓവറിലെ അവസാന പന്തില്‍ ഷഹീന്‍ അഫ്രീദിയെ സിക്‌സടിച്ച് വെയ്ഡ് ഓസീസിനെ ജയത്തിലെത്തിച്ചു. തോല്‍വിയെ അഭിമുഖീകരിച്ചതിനു ശേഷം ന്യൂസീലന്‍ഡും ഓസീസും മത്സരം 5 വിക്കറ്റിനു ജയിച്ചെന്നതു മറ്റൊരു യാദൃശ്ചികത.

ശരിക്കും അവസാന ഓവറുകള്‍ ആവേശം നിറഞ്ഞു. 5 വിക്കറ്റ് ശേഷിക്കെ, അവസാന 5 ഓവറില്‍ 62 റണ്‍സാണ് ഓസീസിനു വേണ്ടിയിരുന്നത്. മാര്‍ക്കസ് സ്‌റ്റോയ്‌നിസ് മാത്യു വെയ്ഡ് സഖ്യം 16ാം ഓവറില്‍ 12 റണ്‍സും 17ാം ഓവറില്‍ 13 റണ്‍സും നേടിയതോടെ അവസാന 18 പന്തില്‍ ഓസീസിനു വേണ്ടത് 37 റണ്‍സ്.ഹസന്‍ അലിയുടെ 18ാം ഓവറില്‍ 15 റണ്‍സ് പിറന്നതോടെ ഓസീസ് ജയപ്രതീക്ഷയിലായി. അതുവരെ പാക്കാസ്ഥാനായിരുന്നു മത്സരത്തില്‍ മേല്‍ക്കൈ. ഓസീസ് ജയത്തിന് അവസാന 2 ഓവറില്‍ വേണ്ടത് 22 റണ്‍സ്.

19ാം ഓവറിലെ ആദ്യ 2 പന്തില്‍ 2 റണ്‍സ് മാത്രം വഴങ്ങിയ ഷഹീന്‍ അഫ്രീദി നന്നായാണു തുടങ്ങിയത്. എന്നാല്‍ 3ാം പന്തില്‍ വെയ്ഡിന്റെ അനായാസ ക്യാച്ച് ഹസന്‍ അലി നിലത്തിട്ടതോടെ കാര്യങ്ങള്‍ കൈവിട്ടു. 3ാം പന്തില്‍ ഡബിള്‍ ഓടിയെടുത്ത വെയ്ഡ് പിന്നീടുള്ള 3 പന്തുകളില്‍ തുടര്‍ച്ചയായി സിക്‌സറടിച്ച് ഓസീസിനെ ജയത്തിലെത്തിച്ചത് അവശ്വസനീയതയോടെ നോക്കി നില്‍ക്കാനേ പാക്കിസ്ഥാന്‍ താരങ്ങള്‍ക്കും ആരാധകര്‍ക്കും കഴിഞ്ഞുള്ളു. വെയ്ഡാണു കളിയിലെ താരം.

ഇതോടെ ആസ്‌ട്രേലിയ സന്തോഷ കൊടുമുടിയിലായി. ജയിക്കാമായിരുന്ന ഒരു നിര്‍ണായക മത്സരം കൈവിട്ടതോടെ പാകിസ്ഥാന്‍ കരഞ്ഞുപോയി. എന്തായാലും പാകിസ്ഥാന്‍ ഫൈനല്‍ കാണാതെ പുറത്തായതോടെ ഇന്ത്യന്‍ ആരാധകരും സജീവമായി. ഇനി ഇന്ത്യന്‍ ആരാധകര്‍ ആവേശത്തോടെ ഫൈനല്‍ കാണും.