സിപിഎമ്മിന്റെ അനിഷേധ്യ നേതാവാണ് പി ജയരാജന്‍. അദ്ദേഹം കേരളത്തിലുണ്ടാക്കിയ ഓളം ചെറുതല്ല. ജയരാജന് വേണ്ടി പിജെ ആര്‍മി രംഗത്തെത്തിയതാണ് അദ്ദേഹത്തിന്റെ വിജയത്തിനും പതനത്തിനും കാരണം. അവസാനം പാര്‍ട്ടിയില്‍ ഒതുക്കുന്ന നേതാവായി മാറി.

കഴിഞ്ഞ പാര്‍ലമെന്റ് തെരഞ്ഞെടുപ്പില്‍ കണ്ണൂര്‍ സെക്രട്ടറി സ്ഥാനം രാജി വയ്പ്പിച്ചാണ് സീറ്റ് നല്‍കിയത്. അതില്‍ തോറ്റതോടെ പിന്നെ വനവാസമായി. നിയമസഭാ സീറ്റ് നല്‍കണമെന്ന് വാദം വന്നെങ്കിലും നല്‍കിയില്ല. ഇതോടെ പിജെ ആര്‍മി രംഗത്തെത്തി. അത് പാര്‍ട്ടിക്കുള്ളില്‍ വലിയ വിമര്‍ശനമാകുകയും പിജെ തന്നെ ആര്‍മിയെ തള്ളി പറയുകയും ചെയ്തു.

ഇപ്പോഴിതാ സിപിഎം സംസ്ഥാന കമ്മിറ്റി അംഗം കൂടിയായ പി. ജയരാജനെ ഖാദി ബോര്‍ഡ് വൈസ് ചെയര്‍മാനാക്കാന്‍ സിപിഎം തീരുമാനിച്ചു. സംസ്ഥാന മന്ത്രിയാകേണ്ട ആളിനെയാണ് പിടിച്ച് ചെറിയ സ്ഥാനം നല്‍കുന്നത്. അതും ചെറിയാന്‍ ഫിലിപ്പ് ഉപേക്ഷിച്ച സ്ഥാനം.

സ്വപ്ന സുരേഷ് പുറത്തിറങ്ങിയതോടെ മുന്‍ സ്പീക്കര്‍ പി. ശ്രീരാമകൃഷ്ണനും യോഗം തെളിഞ്ഞു. ശ്രീരാമകൃഷ്ണനെ നോര്‍ക്ക വൈസ് ചെയര്‍മാനാക്കാനും കരഞ്ഞ് തളര്‍ന്ന ശോഭന ജോര്‍ജിനെ ഔഷധി ചെയര്‍പഴ്‌സനാക്കാനും സിപിഎം സംസ്ഥാന സെക്രട്ടേറിയറ്റില്‍ തീരുമാനമായി. സിപിഎംവിട്ടു കോണ്‍ഗ്രസിലേക്കു മടങ്ങിയ ചെറിയാന്‍ ഫിലിപ്പിനെയാണ് ഖാദി ബോര്‍ഡിലേക്ക് ആദ്യം പരിഗണിച്ചിരുന്നത്.

കെ.കെ. ലതികയെ വനിതാവികസന കോര്‍പ്പറേഷന്‍ ചെയര്‍പേഴ്‌സണാക്കും. നോര്‍ക്ക വൈസ് ചെയര്‍മാന്‍ ആയിരുന്ന കെ. വരദരാജനെ കെ.എസ്.എഫ്.ഇ. ചെയര്‍മാന്‍ സ്ഥാനത്തേക്ക് പരിഗണിക്കുന്നുണ്ട്. തിരുവിതാംകൂര്‍ ദേവസ്വം ബോര്‍ഡിനും പുതിയ പ്രസിഡന്റ് എത്തും. നിലവിലെ ബോര്‍ഡിന്റെ കാലാവധി നീട്ടേണ്ട എന്നാണ് സി.പി.എം. തീരുമാനം. ന്യൂനപക്ഷ വികസന ധനകാര്യ കോര്‍പ്പറേഷന്‍ ചെയര്‍മാന്‍ സ്ഥാനം കേരള കോണ്‍ഗ്രസ് എമ്മിന് നേരത്തേ നല്‍കിയിരുന്നു.

പി. ജയരാജന്‍ പാര്‍ട്ടിക്കാര്‍ക്ക് ആവേശമാണ്. അദ്ദേഹത്തിന്റെ ജിവിതമാണ് സാധാരണക്കാരെ ആകര്‍ഷിച്ചത്. കണ്ണൂര്‍ ജില്ലയിലെ കൂത്തുപറമ്പിനടുത്ത പാട്യം കിഴക്കേ കതിരൂരില്‍ കാരായി കുഞ്ഞിരാമന്റെയും പാറായില്‍ ദേവിയുടേയും മകനായി 1952 നവംബര്‍ 27ന് ജനിച്ചു. മുന്‍ എം.പി. പി. സതീദേവി സഹോദരിയാണ്.

സി.പി.എമ്മിന്റെ വിദ്യാര്‍ത്ഥിയുവജന പ്രസ്ഥാനങ്ങളിലൂടെയാണ് രാഷ്ട്രീയ പ്രവേശനം. ഏറെനാള്‍ എസ്.എഫ്.ഐയുടെ കണ്ണൂര്‍ ജില്ലാ പ്രസിഡന്റായും സെക്രട്ടറിയായും പ്രവര്‍ത്തിച്ചു. 1972ല്‍ സി.പി.എം അംഗമായി. 1980 മുതല്‍ 1990 വരെ സി.പി.എം കൂത്ത്പറമ്പ് ഏരിയാ കമ്മറ്റി സെക്രട്ടറിയായിരുന്നു.

1986ല്‍ സി.പി.എം കണ്ണൂര്‍ ജില്ലാക്കമ്മറ്റിയില്‍ അംഗമായി. 1990ല്‍ സി.പി.എമ്മിന്റെ കണ്ണൂര്‍ ജില്ലാ സെക്രട്ടേറിയറ്റിലേക്കും 1998 മുതല്‍ പാര്‍ട്ടി സംസ്ഥാന കമ്മറ്റി അംഗമായും തിരഞ്ഞെടുക്കപ്പെട്ടു. 1999ലെ തിരുവോണ നാളില്‍ രാഷ്ട്രീയ എതിരാളികളുടെ വധശ്രമത്തില്‍ നിന്ന് അത്ഭുതകരമായി രക്ഷപ്പെട്ടു.

2010ല്‍ സി.പി.എം കണ്ണൂര്‍ ജില്ലാ സെക്രട്ടറിയായിരുന്ന പി. ശശിയ്ക്ക് പകരക്കാരനായി ജില്ലാ ആക്ടിംഗ് സെക്രട്ടറിയായി. 2011 മുതല്‍ സി.പി.എം കണ്ണൂര്‍ ജില്ലാ സെക്രട്ടറിയായിരുന്ന ജയരാജന്‍ 2019ലെ ലോക്‌സഭ തിരഞ്ഞെടുപ്പില്‍ വടകരയില്‍ നിന്ന് മത്സരിക്കാനായ് സെക്രട്ടറി സ്ഥാനം ഒഴിഞ്ഞു.

മൂന്ന് തവണ കൂത്ത്പറമ്പില്‍ നിന്ന് നിയമസഭാംഗമായി. 2001ലായിരുന്നു ആദ്യ ജയം. തുടര്‍ന്ന് കോടതി വിധിയെ തുടര്‍ന്ന് എം.എല്‍.എ സ്ഥാനം നഷ്ടമായ 2005ല്‍ നടന്ന ഉപതിരഞ്ഞെടുപ്പിലും 2006ലെ നിയമസഭ തിരഞ്ഞെടുപ്പിലും കൂത്ത്പറമ്പില്‍ നിന്ന് വിജയിച്ചു. 2019ലെ ലോക്‌സഭ തിരഞ്ഞെടുപ്പില്‍ വടകരയില്‍ നിന്ന് മത്സരിച്ചെങ്കിലും കോണ്‍ഗ്രസിലെ കെ. മുരളീധരനോട് പരാജയപ്പെട്ടു. അതോടെ വനവാസത്തിലായിരുന്ന പി ജയരാജന്റെ മടങ്ങിവരവ് കൂടിയാണ്.