ശോഭനാ ജോര്‍ജ് കേരള ഖാദിബോര്‍ഡ് വൈസ് ചെയര്‍പേഴ്‌സണ്‍ സ്ഥാനം രാജിവെച്ചത് ഒരു സംഭവമായിരുന്നു. സന്തോഷത്തോടെ രാജി വയ്ക്കുന്നു എന്ന് പറഞ്ഞെങ്കിലും ആ സങ്കടം കാണാമായിരുന്നു. തന്നെ മാറ്റി ആസ്ഥാനത്ത് ചെറിയാന്‍ ഫിലിപ്പിനെ പ്രതിഷ്ഠിക്കാന്‍ നോക്കി. നല്ലവനായ ചെറിയാന്‍ അതേറ്റെടുത്തില്ല. ചെറിയാന്‍ കോണ്‍ഗ്രസിലും പോയി. കോണ്‍ഗ്രസില്‍ നിന്നും വന്ന തന്നെ കോണ്‍ഗ്രസുകാരെടുക്കില്ല. അതാണ് ശോഭനയെ സങ്കടപ്പെടുത്തിയത്.

നല്ല സഖാക്കളോട് ഉള്ളകാര്യം തുറന്ന് പറഞ്ഞു. കഞ്ഞി കുടിക്കാനുള്ള വകയുണ്ടെങ്കിലും ഒരു പദവി വേണം. അത്രമാത്രം മതി. എന്തായാലും ശോഭന ജോര്‍ജിന്റെ വിഷമം മനസിലാക്കിയ സിപിഎം വീണ്ടും സ്ഥാനം നല്‍കി. ശോഭനാ ജോര്‍ജിനെ ഔഷധി ചെയര്‍പേഴ്‌സന്‍ ആക്കാന്‍ തീരുമാനമായി.

മുഖ്യമന്ത്രിയുടെ നിര്‍ദേശപ്രകാരമാണ് കേരള ഖാദിബോര്‍ഡ് വൈസ് ചെയര്‍പേഴ്‌സണ്‍ രാജി എന്നാണ് സൂചനയുണ്ടായിരുന്നു. കഴിഞ്ഞ സര്‍ക്കാരിന്റെ കാലത്ത് ബോര്‍ഡ്, കോര്‍പ്പറേഷന്‍ ചെയര്‍മാന്‍ സ്ഥാനത്തേക്ക് ചുമതലയേറ്റവര്‍ രാജിവെക്കണമെന്ന നിര്‍ദേശം സര്‍ക്കാര്‍ നല്‍കിയിരുന്നു. ഇതിന്റെ അടിസ്ഥാനത്തിലാണ് രാജി.

മൂന്നര വര്‍ഷത്തെ ഉത്തരവാദിത്തം ഭംഗിയായി നിറവേറ്റിയെന്നായിരുന്നു രാജിക്ക് ശേഷം ശോഭന ജോര്‍ജിന്റെ പ്രതികരിച്ചിരുന്നു. പുതിയ സ്ഥാനങ്ങളെ കുറിച്ച് തീരുമാനിക്കേണ്ടത് പാര്‍ട്ടിയാണെന്നും അവര്‍ പ്രതികരിച്ചു. അത് ഇപ്പോള്‍ യാഥാര്‍ത്ഥ്യമായതില്‍ ശോഭനയ്ക്ക് സന്തോഷമുണ്ട്.

നന്നേ ചെറുപ്പത്തില്‍ രാഷ്ട്രീയ ജീവിതം ആരംഭിച്ച നേതാവാണ് ശോഭന ജോര്‍ജ്. കോണ്‍ഗ്രസ് നേതാവായിരുന്ന ശോഭന അഭിപ്രായ ഭിന്നതകളെ തുടര്‍ന്നാണ് സി.പി.എമ്മിലെത്തുന്നത്. ചെങ്ങന്നൂര്‍ ഉപതിരഞ്ഞെടുപ്പില്‍ സജി ചെറിയാന് വേണ്ടി രംഗത്തിറങ്ങിയ ശോഭനയ്ക്ക് സി.പി.എം. നല്‍കിയ പാരിതോഷികമായിരുന്നു ഖാദി ബോര്‍ഡ് വൈസ് ചെയര്‍മാന്‍ പദവി. മൂന്നു വര്‍ഷത്തിലേറെ നീണ്ടുനിന്ന പ്രവര്‍ത്തന കാലയളില്‍ ഖാദിയുടെ മുഖച്ഛായ തന്നെ ശോഭന മാറ്റിയെടുത്തു. നഷ്ടത്തില്‍നിന്നു പ്രതീക്ഷയിലേക്ക് ഖാദിയെ കൈപിടിച്ചുയര്‍ത്തി.

ഖാദിയില്‍ നിന്നും രാജി വച്ചെങ്കിലും പാര്‍ട്ടിയെ ന്യായീകരിക്കാനാണ് ശോഭന ജോര്‍ജ് ശ്രമിച്ചത്. ഞാന്‍ മാത്രമാണ് രാജി വെക്കാനായി താമസിച്ചത്. കുറേക്കാര്യങ്ങള്‍ തീര്‍ക്കണമെന്ന് സര്‍ക്കാര്‍ പറഞ്ഞതുകൊണ്ട് താമസിച്ചതാണ്. എനിക്ക് വേണ്ടി മാത്രം പാര്‍ട്ടിക്ക് തീരുമാനം മാറ്റാന്‍ സാധിക്കില്ലല്ലോ. മൂന്നര വര്‍ഷവും ശമ്പളമില്ലാതെ, ഒരു ആനുകൂല്യവും പറ്റാതെയാണ് ഞാന്‍ ജോലി ചെയ്തത്.

ഒരു മുട്ടായി കടലാസ് പോലും ഖാദി ബോര്‍ഡില്‍നിന്ന് ഞാന്‍ എടുത്തിട്ടില്ല. ഒരു ചായ കുടിച്ചാല്‍ പോലും അതിന്റെ പൈസ കൈയില്‍നിന്ന് കൊടുക്കും. എന്റെ റൂം കണ്ടപ്പോള്‍ മന്ത്രി പോലും ചോദിച്ചു, ഇതെന്താണ് ഇങ്ങനെ പൊളിഞ്ഞ് ഇളകിയ മുറി. പക്ഷേ, എന്നേക്കാള്‍ കഷ്ടമാണ് ഖാദിക്ക് വേണ്ടി പണിയെടുക്കുന്ന എന്റെ പെണ്ണുങ്ങളുടെ ജീവിതം. അതറിയുന്ന ഞാന്‍ സുഖിക്കാനോ ആനുകൂല്യങ്ങള്‍ പറ്റാനോ വന്നതല്ല. ചരിത്രത്തില്‍ ആദ്യമായി എല്ലാ യൂണിയന്‍കാരും രണ്ടു മന്ത്രിമാരും കൂടി വന്ന് കേരള സര്‍ക്കാരിന്റെ ആദരവ് നല്‍കിയാണ് എനിക്ക് യാത്രയയപ്പ് തന്നത്.

ഇന്ന് ഖാദി ബോര്‍ഡില്‍ കെട്ടിക്കിടക്കുന്ന തുണികളില്ല. കടഭാരങ്ങളില്ല. ഖാദി മാസ്‌ക് വിറ്റിട്ടായാലും തൊഴില്‍ കൊടുക്കാന്‍ സാധിക്കുന്നുണ്ട്. ഈ ഓണത്തിന് കുറച്ച് കച്ചവടം കിട്ടി. അതുകൊണ്ട്, എല്ലാം കൊണ്ടും നല്ലൊരു പ്രതീക്ഷയുടെ വക്കില്‍ തന്നെയാണ് ഖാദി ഇപ്പോഴുളളതെന്നും ശോഭന ജോര്‍ജ് പറഞ്ഞു.

എന്തായാലും ശോഭനയുടെ ഇനിയുള്ള ജീവിതം ഔഷധിയിലാണ്. യാഥൃശ്ചികമായി കിട്ടിയ ഈ സ്ഥാനം ശോഭന ജോര്‍ജ് പൊന്നുപോലെ നോക്കട്ടെ.