ചെന്നൈ നഗരം പെരുമഴയാല്‍ വിറയ്ക്കുകയാണ്. അതിനിടെ മരണക്കയത്തില്‍ നിന്നും ഒരാളുടെ ജീവന്‍ രക്ഷിച്ച വനിത ഇന്‍സ്‌പെക്ടര്‍ രാജേശ്വരി നാടിന്റെ അഭിമാനമായി. രാജേശ്വരിയെ തേടി വലിയ അഭിനന്ദനങ്ങളാണ് വരുന്നത്. രാജേശ്വരിയുടെ ആത്മാര്‍ത്ഥതയ്ക്ക് മുമ്പില്‍ രാജ്യം പോലും നമിച്ചു.

പുരുഷ കേസരികള്‍ നോക്കി നില്‍ക്കുമ്പോഴാണ് യുവാവിനെ രാജേശ്വരി ഒറ്റയ്ക്ക് തോളിലേറ്റി ജീവന്‍ രക്ഷിച്ചത്. കഴിഞ്ഞ ദിവസമാണ് സംഭവമുണ്ടായത്. ചെന്നൈ നഗരത്തില്‍ ടിപി ഛത്രം മേഖലയില്‍ ശ്മശാനത്തിന് സമീപം അബോധവസ്ഥയില്‍ കണ്ടെത്തിയ യുവാവിനെയാണ് രാജേശ്വരി തോളിലേറ്റി രക്ഷാ പ്രവര്‍ത്തനം നടത്തിയത്.

യുവാവിനെ തോളിലേറ്റി പോകുന്ന രാജേശ്വരിയുടെ ദൃശ്യങ്ങള്‍ ഇതിനകം സമൂഹ്യ മാധ്യമങ്ങളില്‍ വൈറലായി കഴിഞ്ഞു. ശ്മശാനത്തിലെ ജിവനക്കാരനായ ഉദയകുമാറിനെ (28) നാട്ടുകാരാണ് കല്ലറയ്ക്ക് മുകളില്‍ അബോധാവസ്ഥയില്‍ കണ്ടെത്തിയത്. കനത്ത മഴയില്‍ മരംവീണപ്പോള്‍ ഇയാള്‍ അടിയില്‍പെടുകയായിരുന്നു. യുവാവ് മരിച്ചെന്ന അനുമാനത്തില്‍ നാട്ടുകാര്‍ പൊലീസിനെ വിവരം അറിയിച്ചു. തുടര്‍ന്ന് രാജേശ്വരിയുടെ നേതൃത്വത്തിലുളള പൊലീസ് സംഘം സ്ഥലത്തെത്തി രക്ഷാ പ്രവര്‍ത്തനം നടത്തുകയായിരുന്നു.

മരത്തിനടിയില്‍ നിന്ന് പുറത്ത് എടുത്തപ്പോള്‍ യുവാവിന് ജീവനുണ്ടെന്ന് മനസിലാക്കിയ ഇന്‍സ്‌പെക്ടര്‍ രാജേശ്വരി, ഉടന്‍തന്നെ യുവാവിനെ തോളിലേറ്റി വാഹനം തേടുകയായിരുന്നു. കുറച്ച് ദൂരം നടന്നതിന് ശേഷം ആശുപത്രിയിലേക്കുള്ള ഓട്ടോയില്‍ കയറ്റുന്നത് വരെ രജേശ്വരിയുടെ തോളിലായിരുന്നു യുവാവ്.

2015ലെ വെളളപ്പൊക്കത്തേക്കാള്‍ രൂക്ഷമാണ് ചെന്നൈയില്‍ ഇത്തവണ ഉണ്ടായിട്ടുളളതെന്നാണ് നിരീക്ഷിക്കപ്പെടുന്നത്. ഇതുവരെ പന്ത്രണ്ടോളം പേര്‍ക്ക് ദുരന്തത്തില്‍ ജീവന്‍ നഷ്ടപ്പെട്ടു. താഴ്ന്ന പ്രദേശങ്ങളിലെല്ലാം വെളളം കയറിയിട്ടുണ്ട്. വെളളക്കെട്ട് രൂക്ഷമായതോടെ നഗരത്തിലെ ഗതാഗതം പൂര്‍ണ്ണമായും സ്തംഭിച്ചിരിക്കുകയാണ്.

ശ്മശാനത്തില്‍ ജോലി ചെയ്യുന്ന ഉദയകുമാറിന് ഇത് രണ്ടാം ജന്മമാണ് രാജേശ്വരി സമ്മാനിച്ചത്. കനത്ത മഴയില്‍ മരം വീണപ്പോള്‍ ഉദയകുമാര്‍ അടിയില്‍പ്പെടുകയായിരുന്നു. രക്ഷപ്പെടാന്‍ ശ്രമിച്ചെങ്കിലും മഴ കനത്തതിനാല്‍ അബോധാവസ്ഥയിലായി. ഇയാള്‍ മരിച്ചതായി പ്രദേശവാസികള്‍ പൊലീസിനെ അറിയിച്ചു. ഉടന്‍ തന്നെ പ്രദേശത്തെത്തിയ ഇന്‍സ്‌പെക്ടര്‍ രാജേശ്വരിയും സംഘവും രക്ഷാപ്രവര്‍ത്തനത്തിന് നേതൃത്വം നല്‍കി. മരത്തിനിടയില്‍ നിന്ന് ഉദയകുമാറിനെ പുറത്തെടുത്തപ്പോള്‍ ഇയാള്‍ക്ക് ജീവനുണ്ടെന്ന് മനസ്സിലായി.



മറ്റ് പുരുഷന്‍മാര്‍ നോക്കി നില്‍ക്കെ ഉടന്‍ ഇയാളെ തോളിലേറ്റി കുതിച്ചു. ആദ്യം വാനില്‍ കയറ്റാന്‍ ശ്രമിച്ചെങ്കിലും നടന്നില്ല. ഉടന്‍ തന്നെ അതുവഴി വന്ന ഓട്ടോ വിളിച്ചു. രണ്ട് പേരോട് ഓട്ടോയില്‍ കയറാന്‍ രാജേശ്വരി പറഞ്ഞു. അവര്‍ കയറിയപ്പോള്‍ യുവാവിനെ അവരുടെ മടിയില്‍ വച്ചു. എത്രയും വേഗം ആശുപത്രിയിലെത്തിക്കാന്‍ രാജേശ്വരി ഓട്ടോക്കാരന് നിര്‍ദേശം നല്‍കി.

കനത്ത മഴയില്‍ ചെരുപ്പോ ഷൂസോ ഇല്ലാതെയായിരുന്നു രാജേശ്വരിയുടെ രക്ഷാപ്രവര്‍ത്തനം. രാജേശ്വരി കൃത്യസമയത്ത് അവസരോചിതമായി ഇടപെട്ടതിനാലാണ് ഉദയകുമാറിന് ജീവന്‍ തിരിച്ചുകിട്ടിയത്. ഇയാള്‍ ഇപ്പോള്‍ കീഴ്പാക്കം സര്‍ക്കാര്‍ ആശുപത്രിയില്‍ ചികിത്സയിലാണ്. രാജേശ്വരിയുടെ ഇടപെടലിനെ പ്രശംസിച്ച് രാജ്യത്തെ പ്രശസ്തരടക്കം രംഗത്തുവന്നു. രാജേശ്വരി യുവാവിനെ ചുമലിലേറ്റി നീങ്ങുന്ന വീഡിയോ ഓണ്‍ലൈനില്‍ ഇപ്പോഴും വൈറലാണ്. രാജേശ്വരിയാകട്ടെ ഒരാളെ രക്ഷിച്ചതിലുള്ള സന്തോഷത്തിലും.