മരണക്കിടക്കയില്‍ നിന്നും തോളിലേറ്റിയ പോലീസ് ഇന്‍സ്‌പെക്ടര്‍ ടി. രാജേശ്വരിക്ക് അഭിനന്ദന പ്രവാഹം തീരുന്നില്ല. അവസാനം തമിഴാനാട് മുഖ്യമന്ത്രി നേരിട്ട് അഭിനന്ദനം നല്‍കി. ചെന്നൈ വെള്ളപ്പൊക്കത്തില്‍ പരിക്ക് പറ്റി അബോധാവസ്ഥയിലായ ആളെ ചുമലിലേറ്റി കൊണ്ടുപോകുന്നതിന്റെ വീഡിയോ പുറത്തുവന്നതിന് പിന്നാലെ രാജേശ്വരിയ്ക്ക് മുഖ്യമന്ത്രി എം.കെ. സ്റ്റാലിന്‍ അഭിനന്ദന സര്‍ട്ടിഫിക്കറ്റ് നല്‍കി. അതേറ്റു വാങ്ങുമ്പോള്‍ രാജേശ്വരിയുടെ കണ്ണ് നിറയുകയായിരുന്നു.

സമൂഹമാധ്യമങ്ങളില്‍ വൈറലായ 2 മിനിറ്റ് ദൈര്‍ഘ്യമുള്ള ദൃശ്യങ്ങളില്‍ ശക്തമായ കാറ്റിനെയും കനത്ത മഴയെയും അവഗണിച്ച് പരിക്കേറ്റയാളുടെ ജീവന്‍ രക്ഷിക്കാന്‍ രാജേശ്വരി ശ്രമിക്കുന്നത് കാണാമായിരുന്നു. പരിക്ക് പറ്റിയ വ്യക്തിയെ വാഹനത്തില്‍ കയറ്റുകയും മറ്റൊരാളോട് അയാളെ ആശുപത്രിയില്‍ എത്തിക്കാന്‍ ആവശ്യപ്പെടുന്നതും ദൃശ്യങ്ങളിലുണ്ട്.

ശക്തമായ കാറ്റില്‍ മരക്കൊമ്പ് കടപുഴകി വീണാണ് ഇയാള്‍ക്ക് പരിക്കേല്‍ക്കുന്നത്. ആശുപത്രിയില്‍ ചികിത്സയിലിരിക്കുന്ന ഉദയകുമാര്‍ അപകടനില തരണം ചെയ്തതായാണ് സൂചന. അതേ സമയം ഇദ്ദേഹം മരിച്ചതായ വ്യാജ വാര്‍ത്തയും പ്രചരിക്കുന്നുണ്ട്.

അപകടത്തിനും ഇരുട്ടിനുമെതിരെ മാനവികതയുടെ ദീപസ്തംഭം ഉയര്‍ത്തിയ അവര്‍ പുതിയ പ്രതീക്ഷ നല്‍കുന്നു എന്നാണ് സ്റ്റാലിന്‍ അഭിനന്ദിച്ചത്. ഉദയയുടെ ജീവന്‍ രക്ഷിച്ച ഛത്രം പോലീസ് സ്‌റ്റേഷന്‍ ഇന്‍സ്‌പെക്ടര്‍ ശ്രീമതി. രാജേശ്വരിയുടെ പ്രവൃത്തി അത്രയും വെളിച്ചമാണ്. ഞാന്‍ അദ്ദേഹത്തെ നേരിട്ട് വിളിച്ച് അഭിനന്ദിച്ചു എന്നും സ്റ്റാലിന്‍ ട്വിറ്ററില്‍ കുറിച്ചു.



ബോധരഹിതനായി വീണയാളെ ഇന്‍സ്‌പെക്ടര്‍ രാജേശ്വരി തോളിലേറ്റി ആശുപത്രിയിലെത്തിക്കാന്‍ സഹായിക്കുന്നതിന്റെ ദൃശ്യങ്ങള്‍ വളരെ വേഗമാണ് വൈറലായത്.

കനത്തമഴയില്‍ ചെന്നൈ ടി.പി. ഛത്രത്തിലെ സെമിത്തേരിയില്‍ ബോധരഹിതനായി വീണുകിടന്ന 28കാരനായ തോട്ടപ്പണിക്കാരന്‍ ഉദയകുമാറിനെ ആശുപത്രിയിലെത്തിക്കാനായാണ് രാജേശ്വരി ചുമലിലേറ്റിയത്. സംഭവത്തെക്കുറിച്ച് ഇന്‍സ്‌പെക്ടര്‍ രാജേശ്വരി പറഞ്ഞത് ഇങ്ങനെയാണ്.

ഈ പ്രദേശത്ത് ശക്തമായ മഴയായിരുന്നു. ജനങ്ങള്‍ക്ക് യാതൊരു വിധത്തതിലുള്ള ആപത്തും സംഭവിക്കരുതേ എന്ന ഉദ്ദേശത്തോടെ എല്ലാ പോലീസ് ഉദ്യോഗസ്ഥരും രക്ഷാപ്രവര്‍ത്തനത്തിന് ഇറങ്ങുകയായിരുന്നു. മഴ വകവെക്കാതെ വിശ്രമമില്ലാതെ നിരന്തരം ജോലി ചെയ്ത് വരുന്നതിനിടയിലാണ് സ്‌റ്റേഷനിലേക്ക് ഒരു സന്ദേശം എത്തുന്നത്. ശ്മശാനത്തില്‍ ഒരാള്‍ മരിച്ചു കിടക്കുന്നു എന്നായിരുന്നു സന്ദേശം.

ശക്തമായ കാറ്റില്‍ മരം കടപുഴകി വീണാണോ അതോ വെള്ളക്കെട്ടില്‍ മുങ്ങിയാണോ മരിച്ചത് എന്ന കാര്യത്തില്‍ നിശ്ചമില്ലാത്തത് കൊണ്ട് തന്നെ ബൈക്ക് എടുത്ത് സ്ഥലത്തേക്ക് പോയി. ശ്മശാനത്തിനകത്തോട്ട് പോകുമ്പോള്‍ ചുമരിനടുത്തായിട്ടായിരുന്നു അയാള്‍ ബോധരഹിതനായി കിടന്നിരുന്നത്. മരിച്ചിട്ടുണ്ടാകും എന്ന് കരുതി ശരീരം ആശുപത്രിയിലെത്തിക്കാം എന്ന് വിചാരിച്ചാണ് അദ്ദേഹത്തിനടുത്തേക്ക് പോയത്. എന്നാല്‍ ശരീരം എടുക്കുമ്പോഴാണ് അദ്ദേഹത്തിന് ജീവനുണ്ടെന്ന് മനസ്സിലാകുന്നത്. അപ്പോള്‍ തന്നെ അയാളെ തോളില്‍ എടുത്ത് ആശുപത്രിയില്‍ എത്തിക്കാനുള്ള ശ്രമമായിരുന്നു.

ജീപ്പില്‍ കയറ്റാന്‍ സാധിക്കാത്തത് കൊണ്ട് തന്നെ ബൈക്കില്‍ കൊണ്ട് പോകാനായിരുന്നു ഉദ്ദേശിച്ചത്. എന്നാല്‍ അപ്പോള്‍ തന്നെ കൂടെ ഉണ്ടായിരുന്ന പോലീസ് ഉദ്യോഗസ്ഥര്‍ ഓട്ടോയുമായി എത്തുകയായിരുന്നു.

മരിച്ചുവെന്നു കരുതിയ ഇയാളില്‍ ജീവന്റെ തുടിപ്പ് തിരിച്ചറിഞ്ഞാണ് രാജേശ്വരി അവസരോചിതമായി പ്രവര്‍ത്തിച്ചത്. കഴിഞ്ഞദിവസങ്ങളില്‍ സെമിത്തേരിയില്‍ പണിചെയ്തുവരുകയായിരുന്ന ഉദയകുമാര്‍ ശക്തമായ മഴകാരണം വീട്ടില്‍ പോകാനാകാതെ പെട്ടുപോകുകയായിരുന്നുവെന്നാണ് വിവരം.