നമ്മുടെ കേരളം അങ്ങനെയാണ്. ആരെങ്കിലും ഒരു പെട്ടിക്കട തുടങ്ങി പത്ത് ചക്രം കിട്ടി തുടങ്ങിയെന്നറിഞ്ഞാല്‍ പിന്നെയവിടെ പത്ത് തട്ടുകട കാണാം. അത് നമ്മുടെ കുഗ്രാമത്തിലല്ല അങ്ങ് ചന്ദ്രനിലായാലും ശരി. സാരമില്ല അത് നമ്മള്‍ മലയാളികളുടെ പൊതു സ്വഭാവമാണ്.

നമ്മുടെ ഫുഡ് ഫെസ്റ്റിന്റെ കാര്യമായാലും ഇതാണ് അവസ്ഥ. പാവം തുടര്‍ച്ചയായി ഭരണത്തിലായതിനാല്‍ ഡിവൈഎഫ്‌ഐകാര്‍ക്ക് ഒരു സമരവും നടത്താന്‍ പറ്റുന്നില്ല. ഭരണത്തിലല്ലെങ്കില്‍ കാണാമായിരുന്നു. ഈ യൂത്തന്‍മാരെ പോലെയൊന്നുമല്ല പേടിച്ചോടില്ല നിന്ന് അടി വാങ്ങിക്കും.

അങ്ങനെയാണ് ശബരിമലയിലെ ഹലാല്‍ വിവാദമുണ്ടായത്. അതിലെങ്ങനെ പച്ചപിടിക്കാം എന്ന ഗവേഷണത്തില്‍ എത്തിച്ചേര്‍ന്നത് പഴയ വീഞ്ഞ് പുതിയ കുപ്പിയിലിറക്കിയ ഫുഡ് ഫെസ്റ്റാണ്. പെറോട്ടയും ബീഫും പന്നിയിറച്ചിയുമെല്ലാം വിളമ്പി. അതും തിന്ന് മുരുകന്‍ കാട്ടാക്കട പറഞ്ഞത് ഒരു വശത്ത് അടിയായി കിടക്കുകയാണ്. ഡിഫിക്കാര്‍ക്ക് പുറമേ ഇപ്പോള്‍ കോണ്‍ഗ്രസുകാരും സിപിഐക്കാരും തുടങ്ങി എഐഎസ്എഫുകാരും ഫുഡ് ഫെസ്റ്റ് ഏറ്റെടുത്തുകഴിഞ്ഞു.

അപ്പോഴാണ് ചൈനയില്‍ നിന്നും ഭക്ഷണ കാര്യത്തിലുള്ള മറ്റൊരു വാര്‍ത്ത വരുന്നത്. ചൈനയിലെ കാങ്ങ് എന്ന വ്‌ലോഗറെ ഹോട്ടല്‍ വിലക്കിയിരിക്കുകയാണ്. മേലാല്‍ ഇങ്ങോട്ട് വരരുത്. ആദ്യം ഹോട്ടല്‍ സന്ദര്‍ശിച്ചപ്പോള്‍ കാങ് കഴിച്ചത് ഒന്നര കിലോ പന്നിയിറച്ചിയുടെ വിഭവം, അടുത്തതവണയാകട്ടെ മൂന്നര കിലോഗ്രാമിന് മുകളിലുള്ള കൊഞ്ച് വിഭവങ്ങള്‍. ഇതേ തുടര്‍ന്നു വ്‌ലോഗിങ്ങിന്റെ പേരില്‍ അമിതമായി ഭക്ഷണം കഴിച്ച വ്‌ലോഗറെ ഹോട്ടല്‍ വിലക്കി. റസ്റ്ററന്റില്‍ വന്ന് ലൈവ് വ്‌ലോഗിങ് നടത്തി ഭക്ഷണം പാഴാക്കി കളയുന്നവര്‍ക്കെതിരെ ചൈനീസ് ഭരണകൂടം കഴിഞ്ഞവര്‍ഷം നടപടികള്‍ ആരംഭിച്ചിരുന്നു.

ഇത്രയധികം ഭക്ഷണം കഴിച്ചത് മൂലം ഹോട്ടലിന് നഷ്ടം നേരിട്ടു. ഇതിനെത്തുടര്‍ന്നാണ് വിലക്ക്. തനിക്ക് ഒരുപാട് ഭക്ഷണം കഴിക്കാന്‍ സാധിക്കുന്നത് ഒരു തെറ്റാണോയെന്നാണ് കാങ്ങിനെ ചോദ്യം. ഒരു തരിപോലും പാഴാക്കി കളയുന്നുമില്ല! ഹോട്ടലിന്റെ ഈ നടപടിയില്‍ കാങ്ങിന്റെ ആരാധകര്‍ക്ക് എതിര്‍പ്പുണ്ട്. എന്നാല്‍ ഓരോ തവണ വരുമ്പോഴും കാങ് തന്റെ കീശകാലിയാക്കുകയാണെന്ന് ഉടമ പറയുന്നു.

സോയ പാല്‍ ആണ് കുടിക്കുന്നതെങ്കില്‍ 20 മുതല്‍ 30 കുപ്പിവരെ അകത്താക്കും. പന്നിയിറച്ചികൊണ്ടുള്ള വിഭവമാമെങ്കില്‍ ട്രേയിലുള്ളത് മുഴുവന്‍ കഴിക്കും. സാധാരണഗതിയില്‍ ആളുകള്‍ ടോങ്‌സ് ഉപയോഗിച്ചാണ് അത് കഴിക്കുക. കാങ്ങാകട്ടെ ട്രേ മുഴുവനായുമാണ് എടുക്കുക. കാങിന്റെ ഈ പരിപാടി കാരണം ഇനി മുതല്‍ തന്റെ ഹോട്ടലില്‍ ലൈവ് വ്‌ലോഗിങ് അനുവദിക്കില്ലെന്ന നിലപാടിലാണ് ഉടമ.

അതേസമയം നമ്മുടെ ഇന്ത്യയില്‍ തക്കാളിയാണ് താരം. ലോക്ഡൗണും കോവിഡ് ആധികളും പിന്നിട്ട് ജനം നടുനിവര്‍ത്തുമ്പോഴേക്കും ഇന്ധന, പാചകവാതക വില കൈ പൊള്ളിച്ചു. ഇപ്പോള്‍ പച്ചക്കറിവിലയും പിടിച്ചാല്‍ കിട്ടാതെ കുതിക്കുകയാണ്.

ഈ സമയത്ത് ഒരു ദിവസത്തേക്ക് വ്യത്യസ്തമായ രണ്ട് ഓഫറുകളുമായി തമിഴ്‌നാട്ടിലെ ഒരു ബിരിയാണിക്കട ശ്രദ്ധേയമാകുകയാണ്. തമിഴ്‌നാട്ടിലെ കാഞ്ചീപുരം സേതുപക്കത്തിലെ ഒരു ചെറിയ ബിരിയാണിക്കടയാണ് ആമ്പുര്‍, ഒരു കിലോഗ്രാം ബിരിയാണി മേടിക്കുമ്പോള്‍ അരക്കിലോഗ്രാം തക്കാളി സൗജന്യമായി നല്‍കുന്നു.

ഇത് കൂടാതെ ഒരു കിലോ തക്കാളിയുമായി എത്തുന്നവര്‍ക്ക് ഈ ഹോട്ടലില്‍ ചിക്കന്‍ ബിരിയാണി സൗജന്യം എന്നതാണ് രണ്ടാമത്തെ ഓഫര്‍. ചൊവ്വാഴ്ച ഒരു ദിവസത്തേക്ക് മാത്രമായിരുന്നു ഈ ഓഫര്‍. രാവിലെ മുതല്‍ തന്നെ കടയ്ക്കു മുന്‍പില്‍ ആളുകളുടെ നീണ്ടനിരയായിരുന്നു.

350 ല്‍ അധികം ആളുകള്‍ ബിരിയാണി വാങ്ങിക്കഴിഞ്ഞു. ഇവിടെ അരക്കിലോ ബിരിയാണിക്ക് 80 രൂപയാണ്, ഒരു കിലോ തക്കാളിക്ക് ചെന്നൈയില്‍ 140 രൂപവരെ കൊടുക്കണം. എന്തായാലും തക്കാളിയുമായി വന്നു ബിരിയാണി മേടിച്ചത് മൂന്ന് പേര്‍ മാത്രമായിരുന്നു. എന്തായാലും കൊള്ളാം.