ത്രിപുരയില്‍ നിയമസഭ തിരഞ്ഞെടുപ്പിലും ലോക്‌സഭ തിരഞ്ഞെടുപ്പിലും ബിജെപിയോട് ഏറ്റുമുട്ടി തകര്‍ന്നടിഞ്ഞ സിപിഎം മുനിസിപ്പല്‍ തിരഞ്ഞെടുപ്പിലും തോറ്റു തുന്നം പാടി. 324 മുനിസിപ്പല്‍ സീറ്റുകളില്‍ വെറും മൂന്നെണ്ണം മാത്രമാണ് പാര്‍ട്ടിക്ക് നേടാന്‍ കഴിഞ്ഞത്. 2015 ലെ തിരഞ്ഞെടുപ്പില്‍ മുന്നൂറോളം സീറ്റുകളും മുഴുവന്‍ മുനിസിപ്പാലിറ്റികളിലെ ഭരണവും കയ്യിലുണ്ടായിരുന്ന സിപിഎം കനലൊരു തരി പോലുമില്ലാതെയാണ് എരിഞ്ഞടങ്ങിയത്.

2018 ലെ നിയമസഭ തിരഞ്ഞെടുപ്പോടെയാണ് സിപിഎമ്മിന്റെ തകര്‍ച്ച ആരംഭിക്കുന്നത്. മൂന്നു പതിറ്റാണ്ടിന്റെ സിപിഎം ഭരണം അവസാനിപ്പിച്ചാണ് ബിജെപി അധികാരത്തിലേറിയത്. ഭരണം കയ്യിലുണ്ടായിരുന്ന സമയത്ത് എതിരാളികളെ ശ്വാസം വിടാന്‍ പോലും അനുവദിക്കാതെ തികച്ചും ഫാസിസ്റ്റ് ഭരണമായിരുന്നു സിപിഎം കാഴ്ച്ചവെച്ചത്. ബിജെപിയുടെ നേതാക്കള്‍ക്കെതിരെ നിരന്തരമായ ആക്രമണങ്ങളും സിപിഎം നടത്തിയിരുന്നു. ഇതിനെതിരെ ജനങ്ങളുടെ ശക്തമായ പ്രതികരണമായിരുന്നു ബിജെപിയെ അധികാരത്തിലേറ്റിയത്.

2019 ല്‍ നടന്ന ലോക്‌സഭ തിരഞ്ഞെടുപ്പിലും സിപിഎം ചിത്രത്തില്‍ പോലും ഇല്ലാതെ തുടച്ചു മാറ്റപ്പെട്ടു. അറുപത് ശതമാനത്തിലധികം വോട്ടുകള്‍ നേടി ലോക്‌സഭ തിരഞ്ഞെടുപ്പില്‍ വിജയിച്ച് വന്നിരുന്ന പാര്‍ട്ടി മൂന്നാം സ്ഥാനത്തേക്ക് പിന്തള്ളപ്പെട്ടു. ആകെയുള്ള കച്ചിത്തുരുമ്പായ മുനിസിപ്പാലിറ്റി ഭരണവും നഷ്ടപ്പെട്ടതോടെ ത്രിപുരയില്‍ തിരിച്ചു വരാനാകാത്ത വിധം തകര്‍ന്ന അവസ്ഥയിലാണിപ്പോള്‍ സിപിഎം.

തിരഞ്ഞെടുപ്പില്‍ വന്‍ മുന്നേറ്റം കാഴ്ച്ച വയ്ക്കുമെന്ന് പ്രഖ്യാപിച്ച് മത്സരത്തിനെത്തിയ തൃണമൂല്‍ കോണ്‍ഗ്രസിനും ചലനമുണ്ടാക്കാന്‍ കഴിഞ്ഞില്ല. ഒരു സീറ്റ് മാത്രമാണ് ഇവിടെ പാര്‍ട്ടിക്ക് ലഭിച്ചത്. കോണ്‍ഗ്രസാകട്ടെ ഒരു സീറ്റ് പോലും നേടാനാകാതെ തകര്‍ച്ചയുടെ പടുകുഴിയില്‍ വീണു.

ജനോപകാരപ്രദമായ നയങ്ങള്‍ക്കും ജനക്ഷേമ ഭരണത്തിനും ലഭിച്ച അംഗീകാരമാണിതെന്ന് ബിപ്ലബ് കുമാര്‍ ദേബ് വ്യക്തമാക്കി. പ്രധാനമന്ത്രി നരേന്ദ്രമോദിയുടെ വികസന നയത്തിന് ജനങ്ങള്‍ നല്‍കിയ പിന്തുണയാണ് വിജയത്തിന് കാരണമെന്നും അദ്ദേഹം ചൂണ്ടിക്കാട്ടി.