മോഹന്‍ലാലിന്റെ മകള്‍ വിസ്മയയ്ക്ക് ജന്മദിനാശംസകള്‍ സോഷ്യല്‍ മീഡിയയിലൂടെ അറിയിച്ചിരിക്കുകയാണ് മോഹന്‍ലാല്‍. ആശംസകള്‍ നേര്‍ന്നുകൊണ്ടാണ് മകളുടെ പുതിയ തുടക്കത്തെക്കുറിച്ച് മോഹന്‍ലാല്‍ മനസുതുറന്നിരിക്കുകയാണ്. 'ജന്മദിനാശംസകള്‍ മായക്കുട്ടി, ഈ വര്‍ഷം നിനക്ക് മനോഹരമായ ഒരു പുതിയ തുടക്കമാണ്. പുതിയ സ്വപ്നങ്ങള്‍ രൂപംകൊള്ളുന്നു, സിനിമയിലേക്കുള്ള നിന്റെ യാത്ര ആരംഭിക്കുന്നു. നീ ചെയ്യുന്ന എല്ലാ കാര്യങ്ങളിലും ആ ആവേശത്തിലും ധൈര്യത്തിലും എനിക്ക് വലിയ അഭിമാനമുണ്ട്. ഈ വര്‍ഷം ലോകം നിന്റെ കഴിവുകള്‍ തിരിച്ചറിയുന്ന വര്‍ഷമാകട്ടെ' എന്ന് മോഹന്‍ലാല്‍ കുറിച്ചു.

നേരത്തെ മോഹന്‍ലാല്‍ ആദ്യമായി സംവിധാനം ചെയ്ത 'ബറോസ്' എന്ന സിനിമയില്‍ വിസ്മയ സഹസംവിധായികയായി പ്രവര്‍ത്തിച്ചിരുന്നു.  ഇപ്പോള്‍ ജൂഡ് ആന്റണി ജോസഫ് സംവിധാനം ചെയ്യുന്ന 'തുടക്കം' എന്ന ചിത്രത്തിലൂടെയാണ് വിസ്മയ അഭിനയ രംഗത്തേക്ക് എത്തുന്നത്. ആക്ഷന്‍ പ്രധാന്യമുള്ള ചിത്രമായാണ് ഇത് ഒരുങ്ങുന്നത് എന്നാണ് റിപ്പോര്‍ട്ടുകള്‍. ചിത്രത്തിന്റെ ഫസ്റ്റ് ലുക്ക് പോസ്റ്ററുകള്‍ നേരത്തെ തന്നെ ശ്രദ്ധനേടിയിരുന്നു. മകള്‍ക്കൊപ്പം മോഹന്‍ലാലും ഈ സിനിമയില്‍ ഒരു പ്രധാന വേഷത്തില്‍ എത്തുന്നുണ്ട് എന്ന പ്രത്യേകതയുമുണ്ട്. കൂടാതെ നിര്‍മ്മാതാവ് ആന്റണി പെരുമ്പാവൂരിന്റെ മകന്‍ ആശിഷ് ആന്റണിയും ചിത്രത്തില്‍ കേന്ദ്ര കഥാപാത്രത്തെ അവതരിപ്പിക്കുന്നു. ആശിര്‍വാദ് സിനിമാസിന്റെ 37ാമത്തെ ചിത്രമാണ് 'തുടക്കം'.

വലിയൊരു സാങ്കേതിക നിരയാണ് ചിത്രത്തിന്പിന്നില്‍ അണിനിരക്കുന്നത്. ജോമോന്‍ ടി. ജോണ്‍ ഛായാഗ്രഹണവും ജേക്‌സ് ബിജോയ് സംഗീതവും നിര്‍വഹിക്കുന്നു. ചമന്‍ ചാക്കോയാണ് എഡിറ്റിംഗ്. 'ജവാന്‍', 'ഫാമിലി മാന്‍' തുടങ്ങിയ വമ്പന്‍ പ്രോജക്ടുകളില്‍ പ്രവര്‍ത്തിച്ച യാനിക് ബെനും സ്റ്റണ്ട് സില്‍വയുമാണ് ചിത്രത്തിലെ സംഘട്ടനരംഗങ്ങള്‍ ഒരുക്കുന്നത്. അഖില്‍ കൃഷ്ണ, ലിനീഷ് നെല്ലിക്കല്‍ എന്നിവര്‍ ചേര്‍ന്ന് തിരക്കഥയൊരുക്കുന്ന ഈ ചിത്രം ഓണത്തിന് തിയേറ്ററുകളില്‍ എത്തും.