കെ- റെയിലില്‍ സി.പി.ഐക്കും എല്‍.ഡി.എഫിനും ഒരു അഭിപ്രായം മാത്രമേ ഉള്ളൂവെന്ന് സി.പി.ഐ സംസ്ഥാന സെക്രട്ടറി കാനം രാജേന്ദ്രന്‍ മാധ്യമ പ്രവര്‍ത്തകരോട് പറഞ്ഞു. കെ- റെയില്‍ എല്‍.ഡി.എഫിന്‍റെ പരിപാടിയാണ്. പദ്ധതി സര്‍ക്കാര്‍ നടപ്പിലാക്കും. കെ-റെയിലിനെ കുറിച്ച്‌ അറിവില്ലാത്തവരാണ് പദ്ധതിയെ എതിര്‍ക്കുന്നത്.

പാരിസ്ഥിതിക ആഘാത പഠനം ഉള്‍പ്പെടെ നടക്കുന്നുണ്ട്. പുതിയ പദ്ധതികള്‍ എക്കാലത്തും ആശങ്കകള്‍ ഉണ്ടാക്കിയിട്ടുണ്ട്. അതിനാല്‍ ജനങ്ങള്‍ക്ക് അഭിപ്രായം പറയാന്‍ അവകാശമുണ്ട്. സര്‍ക്കാര്‍ ഈ ആശങ്കകള്‍ അകറ്റിയാണ് മുന്നോട്ടു പോവുന്നതെന്നും അലൈന്‍മെന്‍റ് ഉറപ്പിക്കുന്ന പ്രവൃത്തികള്‍ നടത്താനാണ് ഇപ്പോള്‍ എല്ലാവരും സഹകരിക്കേണ്ടതെന്നും അദ്ദേഹം കൂട്ടിച്ചേര്‍ത്തു.

കോടഞ്ചേരി നോളജ് സിറ്റി വിവാദത്തില്‍ അന്വേഷണ റിപ്പോര്‍ട്ട്​ വന്നിട്ട് പ്രതികരിക്കാമെന്നും സ്ഥലം ഇപ്പോള്‍ സന്ദര്‍ശിക്കാന്‍ ഉദ്ദേശിക്കുന്നില്ലെന്നും കാനം പറഞ്ഞു. എസ്. രാജേന്ദ്രനെ സി.പി.ഐ സ്വാഗതം ചെയ്യുമോ എന്ന മാധ്യമ പ്രവര്‍ത്തകരുടെ ചോദ്യത്തിന് നിരവധിപേര്‍ പാര്‍ട്ടിയിലേക്ക് വരുന്നുണ്ടെന്നും പ്രാദേശിക ചര്‍ച്ചകളുടെ അടിസ്ഥാനത്തിലാണ് അവ നടക്കുകയെന്നും അദ്ദേഹം വ്യക്തമാക്കി.