ഈന്തപ്പഴ പാക്കറ്റുകള്‍ക്കടിയില്‍ കഞ്ചാവിന്റെ മണം!...കവറുകള്‍ മുഴുവന്‍ മാറ്റി നോക്കിയഉദ്യോഗസ്ഥർ കണ്ടെത്തിയത് എട്ട് കിലോ കഞ്ചാവ്....സംഭവത്തിൽ തമിഴ്നാട് സ്വദേശി അറസ്റ്റിൽ
ഈന്തപ്പഴ പാക്കറ്റുകള്‍ക്കടിയില്‍ എട്ട് കിലോ കഞ്ചാവ് ഒളിപ്പിച്ച്‌ കടത്താന്‍ ശ്രമിച്ച തമിഴ്നാട് സ്വദേശിയെ പൊലീസ് അറസ്റ്റ് ചെയ്തു. പുതുക്കോട്ടൈ സ്വദേശി എം രവിചന്ദ്രനാണ് (49) ആണ് എക്സൈസ് ചെക്പോസ്റ്റ് ടീമിന്റെ വാഹന പരിശോധനയ്ക്കിടെ പിടിയിലായത്. കെഎസ്‌ആര്‍ടിസി ബസിലാണ് ഇയാള്‍ കഞ്ചാവുമായി കടക്കാന്‍ ശ്രമിച്ചത്.
കഞ്ചാവിന് മുകളില്‍ ഈന്തപ്പഴ പാക്കറ്റുകള്‍ അടുക്കിവച്ച നിലയിലായിരുന്നു. ഈന്തപ്പഴം എടുത്തപ്പോള്‍ കഞ്ചാവിന്റെ മണം അനുഭവപ്പെട്ട ഉദ്യോഗസ്ഥന്‍ കവറുകള്‍ മുഴുവന്‍ മാറ്റിയപ്പോഴാണ് കഞ്ചാവ് കണ്ടെത്തിയത്. തിരുച്ചെന്തൂരില്‍ നിന്നും കോഴിക്കോട്ടേയ്ക്കാണ് ഇവ കൊണ്ടുപോകാന്‍ ശ്രമിച്ചതെന്നും, കോഴിക്കോട് ഹാര്‍ബര്‍ കേന്ദ്രീകരിച്ചാണ് കഞ്ചാവിന്റെ വില്‍പ്പന നടക്കുന്നതെന്നും പ്രതി മൊഴി നല്‍കി. ഇതിനു മുന്‍പും സമാനമായ രീതിയില്‍ ഇയാള്‍ പച്ചക്കറികള്‍ക്കും പഴങ്ങള്‍ക്കും അടിയില്‍ കഞ്ചാവ് ഒളിപ്പിച്ച്‌ കടത്തിയിരുന്നെന്നും എക്സൈസ് പറഞ്ഞു.
എക്സൈസ് ഇന്‍സ്പെക്ടര്‍ സിജോ വര്‍ഗീസ്, പ്രിവന്റീവ് ഓഫീസര്‍മാരായ മുഹമ്മദ് ഷെരീഫ്, സി ഷിബുകുമാര്‍, വി പ്രവീണ്‍, കെ വേണുഗോപാല്‍, വി ദേവകുമാര്‍, സിവില്‍ എക്സൈസ് ഓഫീസര്‍മാരായ ടി എസ് അനില്‍കുമാര്‍, എന്‍ രഞ്ജിത്ത് എന്നിവരടങ്ങുന്ന സംഘമാണ് പരിശോധന നടത്തിയത്.
https://www.facebook.com/Malayalivartha
