പോലീസുദ്യോഗസ്ഥരെ വധിക്കാന്‍ ദിലീപ് ഗൂഢാലോചന നടത്തിയെന്ന കേസിന്റെ മുന്നോട്ടുള്ള പോക്ക് സംബന്ധിച്ച് സര്‍ക്കാരില്‍ പുനരാലോചന. ഹൈക്കോടതിയില്‍ നിന്നും അന്വേഷണ സംഘത്തിന് കിട്ടിയ തട്ട് നാണക്കേടായെന്ന കണക്കുകൂലിലാണ് സര്‍ക്കാര്‍.

ആഭ്യന്തര വകുപ്പുമായി കൂടിയാലോചന നടത്തി മാത്രം മുന്നോട്ടു പോയാല്‍ മതിയെന്നാണ് സര്‍ക്കാര്‍ തീരുമാനം. ഒരു കാരണവശാലും ജുഡീഷ്യറിയെ വെറുപ്പിക്കരുതെന്ന സൂചന സര്‍ക്കാര്‍ നല്‍കിക്കഴിഞ്ഞു.

സര്‍ക്കാരും പോലീസും ചേര്‍ന്ന് ജുഡീഷ്യറിയെ കളങ്കപെടുത്തിയെന്ന ചിന്തയാണ് ഹൈക്കോടതിക്കുള്ളത്. വാദിയുടെ വാദങ്ങള്‍ മാത്രം കണക്കിലെടുത്ത് സംസാരിക്കരുതെന്ന ഹൈക്കോടതിയുടെ വിരട്ട് ഫലിച്ചു. കേസില്‍ വാദി സര്‍ക്കാരാണ്. തീരെ ദുര്‍ബലമായ വാദങ്ങള്‍ മുന്നോട്ടുവച്ച് സര്‍ക്കാരിനെ ക്രൈംബ്രാഞ്ച് മോശമാക്കിയെന്ന ചിന്തയാണ് സര്‍ക്കാരിനുള്ളത്. ദുര്‍ബലമായ വാദങ്ങളാണ് പ്രോസിക്യൂഷന്‍ അവതരിപ്പിച്ചതെന്ന ഹൈക്കോടതിയുടെ ആക്ഷേപമുന സര്‍ക്കാരിലേക്ക് തന്നെയാണ് നീങ്ങുന്നത്.

നടിയെ ആക്രമിച്ച കേസിലെ അന്വേഷണ ഉദ്യോഗസ്ഥനായ സി.ഐ ബൈജു പൗലോസിനെ ദിലീപ് നേരിട്ട് ഭീഷണിപ്പെടുത്തിയെന്ന പ്രോസിക്യൂഷന്‍ വാദം ഹൈക്കോടതി തള്ളിയത് സര്‍ക്കാരിന് നാണക്കേടായി. വിചാരണക്കോടതിയില്‍ വച്ച് ഭീഷണിപ്പെടുത്തിയെന്ന് പറയുന്ന ദിവസം കേസ് നടന്നത് അങ്കമാലി കോടതിയിലെന്ന് ഹൈക്കോടതി വിധി പ്രസ്താവത്തില്‍ പറയുന്നു.

വീട്ടുകാര്‍ക്കെല്ലാം സുഖമല്ലേയെന്ന് ബൈജു പൗലോസിനോട് ദിലീപ് പറഞ്ഞത് ഭീഷണിയായി കണക്കാക്കാനാകില്ലന്നും ഉത്തരവില്‍ കോടതി നിരീക്ഷിക്കുന്നു.

ദിലീപിനെതിരെ പ്രേരണാക്കുറ്റം നിലനില്‍ക്കില്ലന്നാണ് കോടതി പറഞ്ഞത്.പ്രേരണയുടെ അടിസ്ഥാനത്തില്‍ കൃത്യം ചെയ്തതായി പ്രോസിക്യൂഷന് തെളിയിക്കാനായില്ല. പ്രതികള്‍ ക്രിമിനല്‍ ഗൂഡാലോചന നടത്തിയതായി സ്ഥാപിക്കാന്‍ പ്രോസിക്യൂഷന് സാധിച്ചിട്ടില്ലെന്നും ഹൈക്കോടതി വ്യക്തമാക്കുന്നു. മുഖ്യസാക്ഷി ബാലചന്ദ്രകുമാര്‍ ഭീഷണിപ്പെടുത്തിയെന്ന ദിലീപിന്റെ ആരോപണങ്ങള്‍ ഈ ഘട്ടത്തില്‍ പരിശോധിക്കുന്നില്ലെന്നും കോടതി നിരീക്ഷിക്കുന്നു. പ്രതികളെ കസ്റ്റഡിയില്‍ ചോദ്യം ചെയ്യേണ്ട സാഹചര്യമില്ലെന്നും ജസ്റ്റിസ് പി.ഗോപിനാഥിന്റെ ഉത്തരവിലുണ്ട്.പ്രതികള്‍ ക്രൈംബ്രാഞ്ച് പറഞ്ഞതെല്ലാം അനുസരിക്കുന്നവരാണെന്ന് കോടതിക്കറിയാം. അപ്പോള്‍ കസ്റ്റഡി എന്തിന് എന്ന് കോടതി ചോദിക്കുമ്പോള്‍ മറുപടി നല്‍കാന്‍ പ്രോസിക്യൂഷന് ബുദ്ധിമുട്ടുണ്ട്. ഈ സാഹചര്യത്തില്‍ അപ്പീലുമായി സുപ്രീം കോടതിയില്‍ പോയാലും കളി പാളും.

പ്രതികള്‍ സാക്ഷികളെ സ്വാധീനിക്കാന്‍ ശ്രമിച്ചാല്‍ ജാമ്യം റദ്ദാക്കാന്‍ പ്രോസിക്യൂഷന് കോടതിയെ സമീപിക്കാം. മുന്‍കൂര്‍ ജാമ്യം നല്‍കുന്നത് അന്വേഷണത്തിന് തടസമാകില്ലെന്നും കോടതി വ്യക്തമാക്കുന്നു. പ്രതികള്‍ അന്വേഷണവുമായി സഹകരിക്കണം, ആവശ്യപ്പെടുമ്പോള്‍ ചോദ്യം ചെയ്യലിന് ഹാജരാകണം. ദിലീപിന് മേല്‍ ആരോപിക്കപ്പെട്ട ഗൂഢാലോചനക്കുറ്റം പ്രഥമദൃഷ്ട്യാ നിലനില്‍ക്കുന്നതല്ല. ഹൈക്കോടതി
ഫോണുകള്‍ ഹാജരാക്കാത്തത് നിസ്സഹകരണമായി കണക്കാക്കാനാകില്ല

കേസിലുള്ള എഫ്‌ഐആര്‍ റദ്ദാക്കണമെന്ന ദിലീപിന്റെ വാദം അംഗീകരിച്ചാല്‍ അത് സര്‍ക്കാരിന് കൂടുതല്‍ നാണക്കേടാവും. ഇത് സര്‍ക്കാര്‍ പ്രതീക്ഷിക്കുന്നുണ്ട് കാരണം എഫ് ഐ ആറിന്റെ അടിസ്ഥാന ശില തന്നെ ചോദ്യം ചെയ്യപ്പെട്ടിരിക്കുകയാണ്.

കേസിന്റെ വാദപ്രതിവാദത്തിനിടെ കോടതിയ്ക്ക് നേരെ ഉയര്‍ന്ന വിമര്‍ശനങ്ങള്‍ക്കും കോടതി വിധി പ്രസ്താവത്തില്‍ മറുപടി പറയുന്നുണ്ട്. പാതി വെന്ത വസ്തുതകള്‍ കൊണ്ട് കോടതി നടപടികളെ ചോദ്യം ചെയ്യരുതെന്നും നീതിന്യായ സംവിധാനത്തെക്കുറിച്ച് ധാരണയില്ലാതെയാണ് വിമര്‍ശനങ്ങള്‍ ഉയരുന്നതെന്നും കോടതി പറയുന്നു. മുഖ്യധാര ചാനലുകള്‍, സോഷ്യല്‍ മീഡിയ എന്നിവ കേസ് കൈകാര്യം ചെയ്ത രീതിയില്‍ അഭിപ്രായപ്രകടനം നടത്തി. കോടതി നടത്തിയ നിരീക്ഷണങ്ങളെ ആഴത്തില്‍ പരിശോധിച്ചു. അഭിപ്രായ സ്വാതന്ത്ര്യത്തെ കോടതികള്‍ തന്നെ സംരക്ഷിക്കുന്നുണ്ട്. എന്നാല്‍ അത് നിയമ സംവിധാനത്തെ അബ്യൂസ് ചെയ്യാനുള്ള ലൈസന്‍സായി കണക്കാക്കരുതെന്നും കോടതി ആവശ്യപ്പെടുന്നു.

അതായത് ഇത്തരം നടപടികള്‍ തുടര്‍ന്നാല്‍ പണി കിട്ടുമെന്ന് ചുരുക്കം. കോടതിയെ ആക്ഷേപിക്കുന്നവര്‍ക്കെതിരെ കോടതിക്ക് സ്വമേധയാ നടപടികളി ലേക്ക് പ്രവേശിക്കാം.